* ਨਵੀਂ ਮਿਜ਼ਾਈਲ 3500 ਕਿਲੋਮੀਟਰ ਤਕ ਮਾਰ ਕਰ ਸਕੇਗੀ
ਵਿਸ਼ਾਖਾਪਟਨਮ, 19 ਜਨਵਰੀ, (ਪੋਸਟ ਬਿਊਰੋ)- ਭਾਰਤ ਨੇ ਐਤਵਾਰ ਨੂੰ ਆਂਧਰਾ ਪ੍ਰਦੇਸ਼ ਵਿੱਚ ਸਮੁੰਦਰ ਕੰਢੇ 3500 ਕਿਲੋਮੀਟਰ ਦੀ ਮਾਰਕ ਸਮਰੱਥਾ ਵਾਲੀ ਐਟਮੀ ਹਥਿਆਰ ਲਿਜਾਣ ਦੇ ਸਮਰੱਥ ਪਣਡੁੱਬੀ ਕੇ-4 ਬੈਲਿਸਟਿਕ ਮਿਜ਼ਾਈਲ ਦਾ ਸਫਲ ਪ੍ਰੀਖਣ ਕੀਤਾ ਹੈ। ਡੀ ਆਰ ਡੀ ਓ ਵੱਲੋਂ ਬਣਾਈ ਗਈ ਮਿਜ਼ਾਈਲ ਨੂੰ ਨੇਵੀ ਦੀਆਂ ਦੇਸ ਅੰਦਰ ਹੀ ਬਣਾਈਆਂ ਆਈ ਐੱਨ ਐੱਸ ਅਰੀਹੰਤ ਕੈਟੇਗਰੀ ਦੀਆਂ ਐਟਮੀ ਪਣਡੁੱਬੀਆਂ ਨਾਲ ਲੈਸ ਕੀਤਾ ਜਾਵੇਗਾ।
ਸਰਕਾਰੀ ਸਰੋਤਾਂ ਤੋਂ ਮਿਲੀ ਜਾਣਕਾਰੀ ਮੁਤਾਬਕ ਐਟਮੀ ਹਮਲਾ ਕਰਨ ਵਿੱਚ ਸਮਰੱਥ ਇਸ ਮਿਜ਼ਾਈਲ ਦੀ ਮਾਰ ਵਿੱਚ ਪਾਕਿਸਤਾਨ, ਚੀਨ ਅਤੇ ਦੱਖਣੀ ਏਸ਼ੀਆ ਦੇ ਕਈ ਦੇਸ਼ ਆ ਸਕਦੇ ਹਨ। ਬੀਤੀ 20 ਦਸੰਬਰ ਨੂੰ ਡਿਫੈਂਸ ਰਿਸਰਚ ਐਂਡ ਡਿਵੈਲਪਮੈਂਟ ਆਰਗੇਨਾਈਜ਼ੇਸ਼ਨ (ਡੀ ਆਰ ਡੀ ਓ) ਨੇ ਪਿਨਾਕਾ ਮਿਜ਼ਾਈਲ ਦਾ ਓਡੀਸ਼ਾ ਕੰਢੇ ਸਫਲ ਪ੍ਰੀਖਣ ਕੀਤਾ ਸੀ। ਉਸ ਮਿਜ਼ਾਈਲ ਦੀ ਮਾਰਕ ਸਮਰੱਥਾ 90 ਕਿਲੋਮੀਟਰ ਹੋ ਗਈ ਹੈ। ਡੀ ਆਰ ਡੀ ਓ ਵੱਲੋਂ ਵਿਕਸਿਤ ਕੀਤੀ ਪਿਨਾਕਾ ਮਿਜ਼ਾਈਲ 90 ਕਿਲੋਮੀਟਰ ਤਕ ਦੁਸ਼ਮਣ ਦੇ ਇਲਾਕੇ ਵਿੱਚ ਹਮਲਾ ਕਰਨ ਦੇ ਸਮਰੱਥ ਹੈ।
ਪਿਛਲੀ 17 ਨਵੰਬਰ ਨੂੰ 2000 ਕਿਲੋਮੀਟਰ ਦੀ ਮਾਰਕ ਸਮਰੱਥਾ ਵਾਲੀ ਬੈਲਿਸਟਿਕ ਮਿਜ਼ਾਈਲ ਅਗਨੀ-2 ਦਾ ਰਾਤ ਵੇਲੇ ਸਫਲਤਾ ਨਾਲ ਪ੍ਰੀਖਣ ਕੀਤਾ ਗਿਆ ਸੀ। ਦੇਸ਼ ਵਿੱਚ ਬਣਾਈ ਗਈ 21ਮੀਟਰ ਲੰਬੀ, ਇਕ ਮੀਟਰ ਚੌੜੀ, 17 ਟਨ ਭਾਰ ਵਾਲੀ ਇਹ ਮਿਜ਼ਾਈਲ 1000 ਕਿਲੋਗ੍ਰਾਮ ਤਕ ਧਮਾਕਾਖੇਜ਼ ਸਮੱਗਰੀ ਲਿਜਾ ਸਕਦੀ ਹੈ।