‘ਗੰਗੂਬਾਈ ਕਾਠੀਆਵਾੜੀ’ ਵਿੱਚ ਆਪਣੇ ਕਿਰਦਾਰ ਦੇ ਲਈ ਆਲੀਆ ਭੱਟ ਕਾਫੀ ਮਿਹਨਤ ਕਰ ਰਹੀ ਹੈ। ਕੁਝ ਦਿਨ ਪਹਿਲਾਂ ਖਬਰ ਆਈ ਸੀ ਕਿ ਉਹ ਫਿਲਮ ਲਈ ਕਾਠੀਆਵਾੜੀ ਬੋਲੀ ਸਿੱਖ ਰਹੀ ਹੈ। ਸੰਜੇ ਲੀਲਾ ਭੰਸਾਲੀ ਦੀ ਇਹ ਫਿਲਮ ਹੁਸੈਨ ਜ਼ੈਦੀ ਦੀ ਕਿਤਾਬ ‘ਮਾਫੀਆ ਕਵੀਂਸ ਆਫ ਮੁੰਬਈ’ 'ਤੇ ਆਧਾਰਤ ਹੈ। ਇਸ ਵਿੱਚ ਮੁੰਬਈ ਦੀਆਂ ਗਲੀਆਂ ਵਿੱਚ ਰਹਿਣ ਵਾਲੀ ਇੱਕ ਅਜਿਹੀ ਮਹਿਲਾ ਦੀ ਕਹਾਣੀ ਹੈ, ਜੋ ਬਾਅਦ ਵਿੱਚ ਰੈੱਡ ਲਾਈਟ ਏਰੀਆ ਕਮਾਠੀਪੁਰਾ ਦੀ ਮਸ਼ਹੂਰ ਅਤੇ ਤਾਕਤਵਰ ਮਾਫੀਆ ਬਣ ਜਾਂਦੀ ਹੈ। ਫਿਲਮ ਵਿੱਚ ਇਹ ਕਿਰਦਾਰ ਆਲੀਆ ਭੱਟ ਨਿਭਾ ਰਹੀ ਹੈ। ਕਿਉਂਕਿ ਗੰਗੂਬਾਈ ਗੁਜਰਾਤ ਦੇ ਕਾਠੀਆਵਾੜ ਦੀ ਸੀ, ਇਸ ਲਈ ਆਲੀਆ ਨੂੰ ਕਾਠੀਆਵਾੜੀ ਸਿੱਖਣੀ ਪੈ ਰਹੀ ਹੈ।
ਖਬਰ ਹੈ ਕਿ ਉਹ ਇਸ ਬੋਲੀ ਦੇ ਮੁਸ਼ਕਲ ਸ਼ਬਦ ਵੀ ਸਿੱਖ ਰਹੀ ਹੈ। ਫਿਲਮ ਵਿੱਚ ਉਸ ਨੂੰ ਇਹ ਸ਼ਬਦ ਗੁੱਸੇ ਵਿੱਚ ਬੋਲਣੇ ਹਨ ਤੇ ਇਸ ਦੇ ਲਈ ਉਹ ਆਪਣੀ ਟੀਮ ਤੋਂ ਇਨ੍ਹਾਂ ਸ਼ਬਦਾਂ ਦੇ ਮਤਲਬ ਵੀ ਪੁੱਛਦੀ ਹੈ। ਸੂਤਰਾਂ ਦੀ ਮੰਨੀਏ ਤਾਂ ਆਲੀਆ ਦੇ ਲਈ ਇਸ ਤਰ੍ਹਾਂ ਦੇ ਸ਼ਬਦ ਸੁਣਨਾ ਅਤੇ ਬੋਲਣਾ ਕਾਫੀ ਹੈਰਾਨੀ ਜਨਕ ਹੈ। ਦੱਸਣਾ ਬਣਦਾ ਹੈ ਕਿ ਸੰਜੇ ਲੀਲਾ ਭੰਸਾਲੀ ਇਸ ਫਿਲਮ ਬਾਰੇ ਕਾਫੀ ਚੌਕਸੀ ਵਰਤ ਰਹੇ ਹਨ। ਉਹ ਚਾਹੁੰਦੇ ਹਨ ਕਿ ਆਲੀਆ ਕਾਠੀਆਵਾੜੀ ਭਾਸ਼ਾ ਵਿੱਚ ਨਿਪੁੰਨ ਬਣ ਜਾਏ, ਇਸ ਲਈ ਉਹ ਮੁੰਬਈ ਦੇ ਕੁਝ ਮਸ਼ਹੂਰ ਗੁਜਰਾਤੀ ਥੀਏਟਰ ਕਲਾਕਾਰਾਂ ਨਾਲ ਗੱਲ ਕਰ ਰਹੇ ਹਨ, ਜੋ ਫਿਲਮ ਦੇ ਲਈ ਕਾਠੀਆਵਾੜੀ ਭਾਸ਼ਾ ਸਿਖਾਉਣ ਵਿੱਚ ਕੁਝ ਮਦਦ ਕਰ ਸਕਣ। ਕਿਹਾ ਜਾ ਰਿਹਾ ਹੈ ਕਿ ਫਿਲਮ ਦੀ ਸ਼ੂਟਿੰਗ ਦੇ ਨਾਲ ਹੀ ਆਲੀਆ ਭਾਸ਼ਾ ਸਿੱਖਣ ਦੀ ਟਰੇਨਿੰਗ ਵੀ ਲਵੇਗੀ।