ਅੰਮ੍ਰਿਤਸਰ, 16 ਜਨਵਰੀ (ਪੋਸਟ ਬਿਊਰੋ)- ਡ੍ਰੋਨ ਦੇ ਰਾਹੀਂ ਪਾਕਿਸਤਾਨ ਤੋਂ ਹੈਰੋਈਨ ਅਤੇ ਹੱਥਿਆਰ ਮੰਗਵਾਉਣ ਦੇ ਕੇਸ ਵਿੱਚ ਅੰਮ੍ਰਿਤਸਰ ਦੇਹਾਤੀ ਪੁਲਸ ਨੇ ਅੰਬਾਲਾ ਕੈਂਟ ਦੇ ਇੱਕ ਫੌਜੀ ਜਵਾਨ ਰਾਹੁਲ ਚੌਹਾਨ ਦੇ ਭਰਾ ਰੋਹਿਤ ਚੌਹਾਨ ਨੂੰ ਇਸ ਕੇਸ ਵਿੱਚ ਸ਼ਾਮਲ ਕਰ ਲਿਆ ਹੈ। ਪਤਾ ਲੱਗਾ ਹੈ ਕਿ ਰੋਹਿਤ ਦੇ ਬੈਂਕ ਖਾਤੇ ਤੋਂ ਡ੍ਰੋਨ ਖਰੀਦਣ ਦੇ ਬਾਅਦ ਭੁਗਤਾਨ ਕੀਤਾ ਗਿਆ ਸੀ। ਰੋਹਿਤ ਚੌਹਾਨ ਹਰਿਆਣਾ ਦੇ ਕਰਨਾਲ ਦਾ ਵਸਨੀਕ ਹੈ। ਇਸ ਕੇਸ ਵਿੱਚ ਫੌਜ ਦੇ ਜਵਾਨ ਸਹਿਤ ਪੰਜ ਲੋਕਾਂ ਨੂੰ ਗ੍ਰਿਫ਼ਤਾਰੀ ਪਹਿਲਾ ਹੀ ਹੋ ਚੁੱਕੀ ਹੈ। ਰੋਹਿਤ ਹਾਲੇ ਪੁਲਸ ਦੀ ਗ੍ਰਿਫ਼ਤ ਤੋਂ ਬਾਹਰ ਹੈ।
ਇਸ ਦੌਰਾਨ ਪੁੁਲਸ ਦੀ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਰੋਹਿਤ ਨੇ ਆਪਣੇ ਭਰਾ ਰਾਹੁਲ ਚੌਹਾਨ ਨੂੰ ਪੁਲਸ ਤੋਂ ਛਿਪਾਉਣ ਵਿੱਚ ਕਾਫੀ ਮਦਦ ਕੀਤੀ ਸੀ। ਐਸ ਐਸ ਪੀ ਦੇਹਾਤੀ ਵਿਕਰਮ ਦੁਗਲ ਨੇ ਦੱਸਿਆ ਕਿ ਰੋਹਿਤ ਦੀ ਗ੍ਰਿਫ਼ਤਾਰੀ ਲਈ ਪੁਲਸ ਟੀਮ ਰਵਾਨਾ ਕੀਤੀ ਗਈ ਹੈ। ਉਨ੍ਹਾਂ ਨੇ ਦਾਅਵਾ ਕੀਤਾ ਹੈ ਕਿ ਰੋਹਿਤ ਦੀ ਗ੍ਰਿਫ਼ਤਾਰੀ ਦੇ ਬਾਅਦ ਇਸ ਕੇਸ ਵਿੱਚ ਹੋਰ ਵੀ ਰਾਜ਼ ਫਾਸ਼ ਹੋ ਸਕਦੇ ਹਨ। ਪੁਲਸ ਨੂੰ ਖੁਫੀਆ ਵਿਭਾਗ ਤੋਂ ਸੂਚਨਾ ਮਿਲੀ ਸੀ ਕਿ ਫਤਾਹਪੁਰ ਜੇਲ੍ਹ ਵਿੱਚ ਬੰਦ ਤਰਨਤਾਰਨ ਦਾ ਬਲਕਾਰ ਸਿੰਘ ਪਾਕਿਸਤਾਨ ਤੋਂ ਹੈਰੋਈਨ ਅਤੇ ਹਥਿਆਰਾਂ ਦੀ ਖੇੇਪ ਡ੍ਰੋਨ ਦੇ ਰਾਹੀਂ ਮੰਗਵਾ ਰਿਹਾ ਹੈ। ਇਸ ਕੰਮ ਲਈ ਉਸਨੇ ਫੌਜੀ ਜਵਾਨ ਰਾਹੁਲ ਚੌਹਾਨ ਦੀ ਮਦਦ ਲਈ ਸੀ। ਜਦ ਪੁਲਸ ਨੇ ਰਾਹੁਲ ਨੂੰ ਗ਼੍ਰਿਫ਼ਤਾਰ ਕੀਤਾ ਤਾਂ ਉਸ ਨੇ ਪੁੱਛਗਿੱਛ ਵਿੱਚ ਜੇਲ੍ਹ ਵਿੱਚ ਬੰਦ ਸਰਵਨ ਸਿੰਘ ਅਤੇ ਲਖਵਿੰਦਰ ਸਿੰਘ ਦਾ ਨਾਮ ਲਿਆ। ਇਸ ਦੌਰਾਨ ਪੁਲਸ ਅੰਮ੍ਰਿਤਸਰ ਦੇ ਧਨੋਆ ਖੁਰਦ ਪਿੰਡ ਦੇ ਧਰਮਿੰਦਰ ਸਿੰਘ ਨੂੰ ਵੀ ਗ਼੍ਰਿਫ਼ਤਾਰ ਕਰ ਚੁੱਕੀ ਸੀ। ਜਾਂਚ ਵਿੱਚ ਪਤਾ ਲੱਗਾ ਸੀ ਕਿ ਰਾਹੁਲ ਚੌਹਾਨ ਨੇ ਕੁਝ ਸਮੇਂ ਪਹਿਲਾਂ ਆਨਲਾਈਨ ਆਰਡਰ ਦੇ ਕੇ ਦੋ ਡ੍ਰੋਨ ਖਰੀਦੇ ਸੀ, ਜਿਸ ਦਾ ਭੁਗਤਾਨ ਰਾਹੁਲ ਦੇ ਭਰਾ ਰੋਹਿਤ ਦੇ ਬੈਂਕ ਖਾਤੇ ਤੋਂ ਕੀਤਾ ਗਿਆ ਸੀ।