ਹੁਸ਼ਿਆਰਪੁਰ, 16 ਜਨਵਰੀ (ਪੋਸਟ ਬਿਊਰੋ)- ਭਾਰਤ ਦੀ ਸੁਰੱਖਿਆ 'ਚ ਮੋਹਰੀ ਭੂਮਿਕਾ ਨਿਭਾਉਣ ਲਈ ਜਾਣੇ ਜਾਂਦੇ ਹੁਸ਼ਿਆਰਪੁਰ ਜ਼ਿਲ੍ਹੇ ਦਾ ਓਦੋਂ ਹੋਰ ਵੀ ਮਾਣ ਵਧ ਗਿਆ, ਜਦੋਂ ਗੜ੍ਹਦੀਵਾਲਾ ਕਸਬੇ ਦੀ ਤਾਨੀਆ ਸ਼ੇਰਗਿੱਲ ਨੇ 72ਵੇਂ ਆਰਮੀਡੇਅ ਮੌਕੇ ਹੋਈ ਪਰੇਡ ਦੌਰਾਨ ਮਰਦਾਂ ਦੀਆਂ ਫ਼ੌਜ ਟੁਕੜੀਆਂ ਦੀ ਅਗਵਾਈ ਕੀਤੀ।
ਜਬਲਪੁਰ ਦੇ ਇੱਕ ਸਿਗਨਲ ਟਰੇਂਨਿੰਗ ਸੈਂਟਰ 'ਚ ਤਾਇਨਾਤ ਤਾਨੀਆ ਅਜਿਹੀ ਮਹਿਲਾ ਅਧਿਕਾਰੀ ਬਣੀ ਹੈ, ਜਿਸ ਨੂੰ ਮਰਦਾਂ ਦੀ ਪਰੇਡ ਦੀ ਅਗਵਾਈ ਕਰਨ ਦਾ ਮੌਕਾ ਮਿਲਿਆ ਹੈ। ਉਸ ਦੇ ਪਿਤਾ, ਦਾਦਾ ਤੇ ਪੜਦਾਦਾ ਵੀ ਫ਼ੌਜ 'ਚ ਸੇਵਾਵਾਂ ਨਿਭਾ ਚੁੱਕੇ ਹਨ। ਕੱਲ੍ਹ ਜਦੋਂ ਤਾਨੀਆ ਨੇ ਫ਼ੌਜ ਦੇ ਮੁਖੀ ਨੂੰ ਸਲਾਮੀ ਦੇਣ ਵਾਲੀਆਂ ਟੁਕੜੀਆਂ ਦੀ ਅਗਵਾਈ ਕੀਤੀ ਤਾਂ ਉਸ ਦੇ ਮਾਪੇ ਭਾਵੁਕ ਹੋ ਉਠੇ।ਤਾਨੀਆ ਦੇ ਪਿਤਾ ਤਿੰਨ ਸਾਲ ਪਹਿਲਾਂ ਸੀ ਆਰ ਪੀ ਐਫ ਤੋਂ ਬਤੌਰ ਕਮਾਡੈਂਟ ਸੇਵਾ-ਮੁਕਤ ਹੋਏ ਹਨ। ਉਨ੍ਹਾ ਕਿਹਾ ਕਿ ਉਨ੍ਹਾਂ ਨੂੰ ਆਪਣੀ ਧੀ ਦੀ ਇਸ ਪ੍ਰਾਪਤੀ 'ਤੇ ਮਾਣ ਹੈ। ਉਨ੍ਹਾਂ ਕਿਹਾ ਕਿ ਪਰੇਡ ਦੀ ਅਗਵਾਈ ਕਰਨ ਦਾ ਮੌਕਾ ਕਿਸਮਤ ਨਾਲ ਮਿਲਦਾ ਹੈ। ਤਾਨੀਆ ਬਚਪਨ ਤੋਂ ਹੀ ਫ਼ੌਜ 'ਚ ਭਰਤੀ ਹੋਣ ਦਾ ਸੁਪਨਾ ਵੇਖਦੀ ਸੀ ਤੇ ਇਹ ਸੁਪਨਾ 2017 'ਚ ਪੂਰਾ ਹੋਇਆ ਜਦੋਂ ਉਹ ਆਫ਼ੀਸਰ ਟਰੇਨਿੰਗ ਅਕੈਡਮੀ ਚੇਨਈ ਤੋਂ ਪਾਸ ਆਉੂਟ ਹੋਈ। ਉਨ੍ਹਾਂ ਦੱਸਿਆ ਕਿ ਸਿਖਲਾਈ ਦੌਰਾਨ ਵੀ ਉਹ ਬਿਹਤਰੀਨ ਕੈਡਿਟ ਸਾਬਤ ਹੋਈ ਸੀ। ਤਾਨੀਆ ਨੇ ਮੁੰਬਈ ਤੋਂ ਸਕੂਲ ਦੀ ਪੜ੍ਹਾਈ ਕੀਤੀ ਅਤੇ ਨਾਗਪੁਰ ਯੂਨੀਵਰਸਿਟੀ ਤੋਂ ਬੀ ਟੈੱਕ ਦੀ ਡਿਗਰੀ ਹਾਸਲ ਕੀਤੀ ਸੀ।