ਅਮਾਨ, 15 ਜਨਵਰੀ (ਪੋਸਟ ਬਿਊਰੋ)- ਜਾਰਡਨ ਦੇ ਕਿੰਗ ਅਬਦੁੱਲਾ ਨੇ ਖਾੜੀ ਦੇਸ਼ਾਂ ਵਿਚ ਇਸਲਾਮਿਕ ਸਟੇਟ ਦੇ ਮੁੜ ਸੰਗਠਿਤ ਹੋਣ ਦੀ ਜਾਣਕਾਰੀ ਦੇ ਕੇ ਪੱਛਮੀ ਦੁਨੀਆ ਨੂੰ ਹੈਰਾਨ ਕਰ ਦਿੱਤਾ ਹੈ। ਉਨ੍ਹਾਂ ਨੇ ਫ੍ਰਾਂਸੀਸੀ ਟੀ ਵੀ ਚੈਨਲ ਨੂੰ ਦਿੱਤੇ ਇਕ ਇੰਟਰਵਿਊ ਵਿਚ ਕਿਹਾ ਕਿ ਇਹ ਖਤਰਨਾਕ ਸੰਗਠਨ ਦੱਖਣੀ ਸੀਰੀਆ ਵਿਚ ਹੀ ਨਹੀਂ, ਬਲਕਿ ਪੱਛਮੀ ਇਰਾਕ ਵਿਚ ਵੀ ਇੱਕ ਵਾਰ ਫਿਰ ਸਰਗਰਮ ਹੋਣ ਲੱਗ ਪਿਆ ਹੈ। ਇਸ ਮੌਕੇ ਜਾਰਡਨ ਦੇ ਰਾਜਾ ਨੇ ਕਿਹਾ ਕਿ ਸਾਨੂੰ ਇਸਲਾਮਿਕ ਸਟੇਟ ਦੇ ਨਵੇਂ ਸਿਰੇ ਤੋਂ ਉਭਰਨ ਵੇਲੇ ਨਿਪਟਣ ਦੇ ਇੰਤਜ਼ਾਮ ਕਰਨੇ ਹੋਣਗੇ, ਕਿਉਂਕਿ ਇਸ ਦੇ ਕਈ ਵਿਦੇਸ਼ੀ ਲੜਾਕੇ ਇਸ ਵੇਲੇ ਸੀਰੀਆ ਤੋਂ ਲੀਬੀਆ ਵੱਲ ਰੁਖ ਕਰ ਚੁੱਕੇ ਹਨ। ਉਨ੍ਹਾਂ ਨੇ ਇਸਲਾਮਿਕ ਸਟੇਟ ਨੂੰ ਰੋਕਣ ਲਈ ਯੂਰਪ ਨੂੰ ਖਾਸ ਕਰ ਕੇ ਧਿਆਨ ਦੇਣ ਨੂੰ ਕਿਹਾ ਹੈ। ਕਿੰਗ ਅਬਦੁੱਲਾਹ ਨੇ ਕਿਹਾ ਕਿ ਲੀਬੀਆ ਦੀ ਸਰਹੱਦ ਯੂਰਪ ਦੇ ਦੇਸ਼ਾਂ ਨਾਲ ਲੱਗਦੀ ਹੈ, ਇਸ ਲਈ 2020 ਵਿਚ ਯੂਰਪ ਲਈ ਇਹ ਚਰਚਾ ਦਾ ਵਿਸ਼ਾ ਹੋਣਾ ਚਾਹੀਦਾ ਹੈ। ਉਨ੍ਹਾਂ ਨੇ ਜ਼ੋਰ ਦੇ ਕੇ ਕਿਹਾ ਕਿ ਸੀਰੀਆ ਦੇ ਇਦਲਿਬ ਸ਼ਹਿਰ ਵਿੱਚੋਂ ਭੱਜੇ ਲੜਾਕੇ ਉੱਤਰ ਅਫਰੀਕੀ ਦੇਸ਼ ਲੀਬੀਆ ਵਿਚ ਹਨ ਅਤੇ ਯੂਰਪ ਅਤੇ ਇਸ ਦੇਸ਼ ਦੇ ਵਿਚਾਲੇ ਸਿਰਫ ਭੂ-ਮੱਧ ਸਾਗਰ ਹੈ, ਜਿਸ ਨੂੰ ਪਾਰ ਕਰ ਕੇ ਇਹ ਲੜਾਕੇ ਯੂਰਪ ਵਿਚ ਦਾਖਲ ਹੋ ਸਕਦੇ ਹਨ। ਕਿੰਗ ਅਬਦੁੱਲਾਹ ਨੇ ਕਿਹਾ ਕਿ ਲੀਬੀਆ ਦੇ ਗ੍ਰਹਿ ਯੁੱਧ ਨੂੰ ਰੋਕਣ ਦੇ ਨਾਂ ਉੱਤੇ ਤੁਰਕੀ ਨੇ ਜਿਵੇਂ ਉਥੇ ਫੌਜ ਭੇਜਣ ਦਾ ਫੈਸਲਾ ਕੀਤਾ ਹੈ, ਉਸ ਨਾਲ ਖੇਤਰ ਵਿਚ ਉਲਝਣ ਦੇ ਹਾਲਾਤ ਵਧ ਗਏ ਹਨ। ਮੱਧ-ਪੂਰਬ ਵਿਚ ਸ਼ਾਂਤੀ ਤੇ ਸਥਿਰਤਾ ਦੇ ਪੱਖ ਤੋਂ ਅਹਿਮ ਜਾਰਡਨ ਅੱਜ ਤੱਕ ਗੁਆਂਢੀ ਸੀਰੀਆ ਦੇ 13 ਲੱਖ ਸ਼ਰਨਾਰਥੀਆਂ ਨੂੰ ਪਨਾਹ ਦੇ ਚੁੱਕਾ ਹੈ।