ਦੁਬਈ, 14 ਜਨਵਰੀ (ਪੋਸਟ ਬਿਊਰੋ)- ਦੁਬਈ ਵਿੱਚ ਪਰਸੋਂ ਭਿਆਨਕ ਤੂਫਾਨ ਆਇਆ। ਚੰਗੀ ਬਾਰਸ਼ ਹੋਈ, ਪੂਰੇ ਦੁਬਈ ਵਿੱਚ ਥਾਂ-ਥਾਂ ਪਾਣੀ ਭਰ ਗਿਆ, ਪਰ ਇਸ ਵਿੱਚ ਕੁੱਝ ਅਜਿਹਾ ਹੋਇਆ, ਜਿਸਦਾ ਇੰਤਜ਼ਾਰ ਇੱਕ ਫੋਟੋਗ੍ਰਾਫ਼ਰ ਨੂੰ ਪਿਛਲੇ ਸੱਤ ਸਾਲਾਂ ਤੋਂ ਸੀ। ਇਹ ਨਜਾਰਾ ਸੀ ਬੁਰਜ ਖਲੀਫਾ ਉੱਤੇ ਬਿਜਲੀ ਡਿੱਗਣ ਦਾ।
ਇਸ ਫੋਟੋਗ੍ਰਾਫ਼ਰ ਨੇ ਇਸ ਨਜਾਰੇ ਨੂੰ ਆਪਣੇ ਕੈਮਰੇ ਵਿੱਚ ਕੈਪਚਰ ਕਰਨ ਲਈ ਪੂਰੀ ਰਾਤ ਰੇਗਿਸਤਾਨ ਵਿੱਚ ਹੋ ਰਹੀ ਬਾਰਿਸ਼ ਵਿੱਚ ਇੱਕ ਕੈਂਪ ਲਾਇਆ ਤਾਂ ਕਿ ਪ੍ਰਫ਼ੈਕਟ ਸ਼ਾਟ ਲੈ ਸਕੇ। ਆਖ਼ਿਰ ਉਸ ਫੋਟੋਗ੍ਰਾਫ਼ਰ ਨੂੰ ਤਸਵੀਰ ਮਿਲੀ। ਇਸ ਫੋਟੋਗ੍ਰਾਫ਼ਰ ਦਾ ਨਾਮ ਹੈ ਜੋਹੇਬ ਅੰਜੁਬ। ਜੋਹੇਬ ਨੇ ਸ਼ੁੱਕਰਵਾਰ ਰਾਤ ਆਏ ਤੂਫਾਨ ਵੇਲੇ ਦੁਨੀਆ ਦੀ ਸਭ ਤੋਂ ਉੱਚੀ ਇਮਾਰਤ ਉੱਤੇ ਡਿੱਗਦੀ ਹੋਈ ਬਿਜਲੀ ਦੀ ਤਸਵੀਰ ਲਈ। ਉਹ ਪੂਰੀ ਰਾਤ ਇੱਕ ਰੇਗਿਸਤਾਨ ਵਿੱਚ ਬਾਰਿਸ਼ ਵਿੱਚ ਛੋਟੇ ਜਿਹੇ ਕੈਂਪ ਵਿੱਚ ਸੀ ਤਾਂ ਕਿ ਵਧੀਆ ਤਸਵੀਰ ਲੈ ਸਕੇ। ਫੋਟੋ ਲੈਣ ਤੋਂ ਬਾਅਦ ਜੋਹੇਬ ਨੇ ਦੱਸਿਆ ਕਿ ਇਸ ਤਸਵੀਰ ਨੇ ਮੇਰੇ ਲਈ ਸਾਲ 2020 ਦੀ ਚੰਗੀ ਸ਼ੁਰੁਆਤ ਕੀਤੀ ਹੈ। ਮੇਰੇ ਲਈ ਉਹ ਪਲ ਬੜਾ ਕੀਮਤੀ ਸੀ, ਜਦੋਂ 2720 ਫੁੱਟ ਉੱਚੇ ਬੁਰਜ ਖਲੀਫੇ ਦੇ ਸਭ ਤੋਂ ਉਪਰਲੇ ਹਿੱਸੇ ਉੱਤੇ ਬਿਜਲੀ ਟਕਰਾਈ।
ਜੋਹੇਬ ਅੰਜੁਮ ਦੀ ਇਹ ਤਸਵੀਰ ਬੁਰਜ ਖਲੀਫੇ ਦੇ ਪ੍ਰਸ਼ਾਸਨ ਅਤੇ ਦੁਬਈ ਦੇ ਰਾਜਕੁਮਾਰ ਸ਼ੇਖ ਹਮਦਾਨ ਨੇ ਵੀ ਆਪਣੇ ਟਵਿਟਰ ਹੈਂਡਲ ਤੋਂ ਸ਼ੇਅਰ ਕੀਤੀ ਹੈ। ਇਸ ਮੌਕੇ ਜੋਹੇਬ ਨੇ ਦੱਸਿਆ ਕਿ ਜਦੋਂ ਬਿਜਲੀ ਟਕਰਾਈ ਤਾਂ ਦੁਬਈ ਦਾ ਪੂਰਾ ਅਸਮਾਨ ਨੀਲੇ ਰੰਗ ਦੀ ਰੋਸ਼ਨੀ ਨਾਲ ਰੰਗਿਆ ਗਿਆ। ਦੁਬਈ ਦੇ ਮੀਡੀਆ ਮੁਤਾਬਕ 1996 ਤੋਂ ਬਾਅਦ ਦੁਬਈ ਸਣੇ ਯੂ ਏ ਈ ਦੇ ਕਈ ਹਿੱਸਿਆਂ ਵਿੱਚ ਇੰਨੀ ਬਾਰਸ਼ ਹੋਈ ਹੈ। ਇੰਨਾ ਭਿਆਨਕ ਤੂਫਾਨ ਆਇਆ ਹੈ।