ਟੋਕੀਓ, 14 ਜਨਵਰੀ (ਪੋਸਟ ਬਿਊਰੋ)- ਜਾਪਾਨ ਦੇ ਮਸ਼ਹੂਰ ਅਰਬਪਤੀ ਅਤੇ ਆਨਲਾਈਨ ਫੈਸ਼ਨ ਰਿਟੇਲਰ ਜੋਜੋ ਦੇ ਸੀ ਈ ਓ ਯੂਸਾਕੋ ਮਾਏਜਾਵਾ ਚੰਦ ਦੀ ਸੈਰ 'ਤੇ ਜਾਣ ਵਾਲੇ ਦੁਨੀਆ ਦੇ ਪਹਿਲੇ ਸੈਲਾਨੀ ਹੋਣਗੇ। ਜਲਦੀ ਹੀ ਉਹ ਅਮਰੀਕਾ ਦੀ ਪ੍ਰਾਈਵੇਟ ਕੰਪਨੀ ਸਪੇਸਐਕਸ ਰਾਕੇਟ ਨਾਲ ਚੰਦ 'ਤੇ ਘੁੰਮਣ ਜਾਣ ਵਾਲੇ ਹਨ।
ਯੂਸਾਕੋ ਮਾਏਜਾਵਾ ਇਸ ਮੂਨ ਟਿ੍ਰਪ ਉਤੇ ਇਕੱਲੇ ਨਹੀਂ ਜਾਣਾ ਚਾਹੰੁਦੇ। ਇਸ ਸ਼ਾਨਦਾਰ ਤੇ ਰੋਮਾਂਚਕ ਸਫਰ ਲਈ ਉਹ ਇੱਕ ਗਰਲਫਰੈਂਡ ਲੱਭ ਰਹੇ ਹਨ। ਇਸ ਲਈ ਉਨ੍ਹਾਂ ਨੇ ਬਾਕਾਇਦਾ ਆਨਲਾਈਨ ਐਡ ਦਿੱਤਾ ਹੈ। ਯੂਸਾਕੋ ਮਾਏਜਾਵਾ ਨੇ ਪਿੱਛੇ ਜਿਹੇੇ ਜਾਪਾਨੀ ਐਕਟਰੈਸ ਨਾਲ ਬ੍ਰੇਕਅਪ ਦੀਆਂ ਗੱਲਾਂ ਕਨਫਰਮ ਕੀਤੀਆਂ ਸਨ। ਇਸ ਤੋਂ ਬਾਅਦ ਉਹ ਫਿਰ ਤੋਂ ਰਿਲੇਸ਼ਨਸ਼ਿਪ 'ਚ ਜਾਣ ਨੂੰ ਤਿਆਰ ਹਨ। ਮੂਨ ਟਿ੍ਰਪ ਨੂੰ ਬਹੁਤ ਖਾਸ ਬਣਾਉਣ ਲਈ ਉਨ੍ਹਾਂ ਨੇ ਇੰਟਰਨੈਟ ਉੱਤੇ ਜੋ ਐਡ ਦਿੱਤੀ ਹੈ, ਉਸ ਮੁਤਾਬਕ ਮਾਏਜਾਵਾ ਦੀ ਗਰਲਫਰੈਂਡ ਬਣਨ ਲਈ ਲੜਕੀ ਦੀ ਉਮਰ 20 ਤੋਂ ਵੱਧ ਹੋਣੀ ਚਾਹੀਦੀ ਹੈ। ਲੜਕੀ ਬਹੁਤ ਖੂਬਸੂਰਤ ਤੇ ਸਿੰਗਲ ਹੋਣੀ ਚਾਹੀਦੀ ਹੈ। ਨਾਲ ਉਹ ਜ਼ਿੰਦਾਦਿਲ ਵੀ ਹੋਵੇ।
ਇੱਕ ਟੀ ਵੀ ਸ਼ੋਅ 'ਚ ਯੂਸਾਕੋ ਮਾਏਜਾਵਾ ਨੇ ਇਹ ਗੱਲ ਕਹੀ। ਉਨ੍ਹਾਂ ਕਿਹਾ, ‘‘ਜ਼ਿੰਦਗੀ ਦੇ ਇਸ ਪੜਾਅ 'ਚ ਆ ਕੇ ਮੈਂ ਕੁਝ ਇਕੱਲਾਪਣ ਜਿਹਾ ਮਹਿਸੂਸ ਕਰ ਰਿਹਾ ਸੀ, ਇਸ ਲਈ ਮੈਂ ਚੰਦ ਦੀ ਸੈਰ ਕਰਨ ਦਾ ਫੈਸਲਾ ਲਿਆ। ਬਜਪਨ ਤੋਂ ਮੈਨੂੰ ਚੰਦ ਨਾਲ ਪਿਆਰ ਹੈ। ਇਹ ਮੇਰੇ ਜੀਵਨ ਦਾ ਸੁਫਨਾ ਹੈ।”