ਓਟਵਾ, 14 ਜਨਵਰੀ (ਪੋਸਟ ਬਿਊਰੋ) : ਆਸਟਰੇਲੀਆ ਦੇ ਜੰਗਲਾਂ ਵਿੱਚ ਲੱਗੀ ਅੱਗ ਨੂੰ ਬੁਝਾਉਣ ਵਿੱਚ ਮਦਦ ਕਰਨ ਲਈ 69 ਕੈਨੇਡੀਅਨਾਂ ਦਾ ਇੱਕ ਹੋਰ ਗਰੱੁਪ ਆਸਟਰੇਲੀਆ ਰਵਾਨਾ ਹੋ ਰਿਹਾ ਹੈ।
ਵਿਦੇਸ਼ ਮੰਤਰੀ ਫਰੈਂਕੌਇਸ ਫਿਲਿਪ ਸ਼ੈਂਪੇਨ ਨੇ ਦੱਸਿਆ ਕਿ ਆਸਟਰੇਲੀਆ ਵੱਲੋਂ ਮਦਦ ਮੰਗੇ ਜਾਣ ਤੋਂ ਬਾਅਦ ਹੀ ਇਨ੍ਹਾਂ ਕੈਨੇਡੀਅਨਾਂ ਨੂੰ ੳੱੁਧਰ ਭੇਜਿਆ ਗਿਆ ਹੈ। ਇਸ ਸਮੇਂ ਵੀ ਆਸਟਰੇਲੀਆ ਭਰ ਦੇ ਜੰਗਲਾਂ ਵਿੱਚ 200 ਥਾਂਵਾਂ ਉੱਤੇ ਅੱਗ ਲੱਗੀ ਹੋਈ ਹੈ। ਸੱਭ ਤੋਂ ਵੱਧ ਨੁਕਸਾਨ ਨਿਊ ਸਾਊਥ ਵੇਲਜ਼ ਤੇ ਵਿਕਟੋਰੀਆ ਨੂੰ ਝੱਲਣਾ ਪੈ ਰਿਹਾ ਹੈ। ਇਨ੍ਹਾਂ ਦੋਵਾਂ ਇਲਾਕਿਆਂ ਵਿੱਚ ਹੀ ਬਹੁਤੀ ਆਬਾਦੀ ਰਹਿੰਦੀ ਹੈ।
ਦ ਕੈਨੇਡੀਅਨ ਇੰਟਰਜੈਂਸੀ ਫੌਰੈਸਟ ਫਾਇਰ ਸੈਂਟਰ ਦਾ ਕਹਿਣਾ ਹੈ ਕਿ 27 ਇੰਸੀਡੈਂਟ ਮੈਨੇਜਮੈਂਟ ਸਟਾਫ ਵੀਰਵਾਰ ਨੂੰ ਮੈਲਬੌਰਨ ਲਈ ਰਵਾਨਾ ਹੋਵੇਗਾ। ਉਨ੍ਹਾਂ ਤੋਂ ਬਾਅਦ ਦੋ ਹੋਰ ਇੰਸੀਡੈਂਟ ਮੈਨੇਜਰ ਤੇ 40 ਫਾਇਰਫਾਈਟਰਜ਼ ਵੀਕੈਂਡ ਉੱਤੇ ਆਸਟਰੇਲੀਆ ਜਾਣਗੇ। ਕੈਨੇਡੀਅਨਾਂ ਦੇ ਇਸ ਛੇਵੇਂ ਬੈਚ ਨੂੰ ਆਸਟਰੇਲੀਆ ਮਦਦ ਲਈ ਭੇਜਿਆ ਗਿਆ ਹੈ। ਹੁਣ ਉੱਥੇ ਮਦਦ ਕਰਨ ਲਈ ਗਏ ਕੈਨੇਡੀਅਨਾਂ ਦੀ ਗਿਣਤੀ 160 ਤੋਂ ਵੀ ਵੱਧ ਹੋ ਗਈ ਹੈ।
21 ਮਾਹਿਰਾਂ ਦਾ ਪਹਿਲਾ ਗਰੁਪ ਦਸੰਬਰ ਦੇ ਸ਼ੁਰੂ ਵਿੱਚ ਹੀ ਆਸਟਰੇਲੀਆ ਲਈ ਰਵਾਨਾ ਹੋ ਗਿਆ ਸੀ ਤੇ ਇਹ ਗਰੱੁਪ ਪਿਛਲੇ ਹਫਤੇ ਕੈਨੇਡਾ ਵਾਪਿਸ ਵੀ ਆ ਗਿਆ ਹੈ।