ਨਾਭਾ, 13 ਜਨਵਰੀ (ਪੋਸਟ ਬਿਊਰੋ)- ਇਥੇ ਥਾਣਾ ਸਦਰ ਦੀ ਪੁਲਸ ਨੇ ਜਗਦੀਪ ਸਿੰਘ ਪੁੱਤਰ ਰਘਬੀਰ ਸਿੰਘ ਵਾਸੀ ਪਿੰਡ ਸਮਲਾ ਦੀ ਸ਼ਿਕਾਇਤ ਉੱਤੇ ਪਿੰਡ ਡਕੋਲੀ, ਡੇਰਾਬਸੀ ਦੇ ਬੀਰ ਸਿੰਘ, ਉਸ ਦੀ ਪਤਨੀ ਬਲਜੀਤ ਕੌਰ, ਬੇਟੇ ਕਾਲਾ ਸਿੰਘ ਅਤੇ ਬੇਟੀ ਮਨਪ੍ਰੀਤ ਕੌਰ ਦੇ ਖਿਲਾਫ ਠੱਗੀ ਦਾ ਮਾਮਲਾ ਦਰਜ ਕੀਤਾ ਹੈ।
ਪੁਲਸ ਅਧਿਕਾਰੀਆਂ ਦੇ ਦੱਸਣ ਅਨੁਸਾਰ ਜਗਦੀਪ ਸਿੰਘ ਦਾ ਵਿਆਹ 10 ਅਕਤੂਬਰ 2018 ਨੂੰ ਮਨਪ੍ਰੀਤ ਕੌਰ ਨਾਲ ਹੋਇਆ ਸੀ। ਉਸ ਤੋਂ 15 ਦਿਨਾਂ ਬਾਅਦ ਮਨਪ੍ਰੀਤ ਕੌਰ ਨੇ ਪਤੀ, ਸੱਸ ਅਤੇ ਸਹੁਰੇ ਨਾਲ ਕਲੇਸ਼ ਸ਼ੁਰੂ ਕਰ ਦਿੱਤਾ। ਫਿਰ ਝਗੜੇ ਤੋਂ ਬਾਅਦ 20 ਹਜ਼ਾਰ ਰੁਪਏ, ਕੱਪੜੇ, ਗਹਿਣੇ ਅਤੇ ਹੋਰ ਸਾਮਾਨ ਲੈ ਕੇ ਪੇਕੇ ਚਲੀ ਗਈ ਤੇ ਮਨਪ੍ਰੀਤ ਕੌਰ ਦਾ ਨਾਂ ਬਦਲ ਕੇ ਉਸ ਦੇ ਮਾਪਿਆਂ ਨੇ ਤਲਾਕ ਕਰਵਾਏ ਬਿਨਾਂ ਇਕ ਹੋਰ ਲੜਕੇ ਨਾਲ ਵਿਆਹ ਕਰ ਦਿੱਤਾ ਅਤੇ ਉਸ ਦੇ ਮਾਪਿਆਂ ਨੇ ਜਗਦੀਪ ਸਿੰਘ ਅਤੇ ਉਸ ਦੇ ਰਿਸ਼ਤੇਦਾਰਾਂ ਖਿਲਾਫ ਤੰਗ ਕਰਨ ਦੀ ਸ਼ਿਕਾਇਤ ਪੁਲਸ ਨੂੰ ਕਰ ਦਿੱਤੀ ਅਤੇ ਫਿਰ ਇਕ ਲੱਖ ਰੁਪਏ ਲੈ ਕੇ ਸਮਝੌਤਾ ਕਰ ਲਿਆ।
ਬਾਅਦ ਦੀ ਜਾਂਚ ਵਿੱਚ ਪਤਾ ਲੱਗਾ ਕਿ ਇਸ ਲੜਕੀ ਦਾ ਵੱਖ-ਵੱਖ ਲੜਕਿਆਂ ਨਾਲ ਪਹਿਲਾਂ ਵਿਆਹ ਕਰਵਾਇਆ ਜਾਂਦਾ ਤੇ ਫਿਰ ਤੰਗ ਕਰਨ ਦਾ ਦੋਸ਼ ਲਾ ਕੇ ਪੈਸੇ ਲੈ ਕੇ ਮਾਮਲਾ ਮੁਕਾਇਆ ਜਾਂਦਾ ਹੈ। ਇਸ ਤੋਂ ਬਾਅਦ ਕੇਸ ਦਰਜ ਕੀਤਾ ਗਿਆ ਹੈ। ਪੁਲਸ ਨੇ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਵੀ ਕੀਤੀ ਹੈ। ਸਥਾਨਕ ਡੀ ਐੱਸ ਪੀ ਅਨੁਸਾਰ ਮਾਪਿਆਂ ਨੇ ਲੜਕੀ ਦਾ ਨਾਂ ਬਦਲ ਕੇ ਉਸ ਦਾ 4 ਥਾਂ ਵਿਆਹ ਕੀਤਾ ਅਤੇ ਉਸ ਦੇ 2 ਲੜਕੇ ਵੀ ਹੋਏ ਹਨ। ਇਕ ਲੜਕਾ ਮਨਪ੍ਰੀਤ ਕੌਰ ਦੇ ਕੋਲ ਹੈ। ਦੂਜਾ ਪਹਿਲੀ ਥਾਂ ਵਾਲੇ ਸਹੁਰਿਆਂ ਨੇ ਰੱਖ ਲਿਆ ਸੀ। ਇਸ ਵਿਆਹ ਕਾਰਨ ਠੱਗਿਆ ਗਿਆ ਲੜਕਾ ਖੇਤੀ ਕਰਦਾ ਹੈ। ਪੀੜਤ ਜਗਦੀਪ ਸਿੰਘ (24 ਸਾਲ) ਨੇ ਦੱਸਿਆ ਕਿ ਮੇਰਾ ਪਹਿਲਾ ਵਿਆਹ ਪੇਧਨ ਪਿੰਡ ਵਿਚ ਹੋਇਆ ਸੀ। ਤਲਾਕ ਪਿੱਛੋਂ ਮੈਂ ਦੂਜਾ ਵਿਆਹ ਮਨਪ੍ਰੀਤ ਕੌਰ ਨਾਲ ਕਰਾਇਆ, ਜੋ ਜਾਅਲਸਾਜ਼ ਨਿਕਲੀ। ਉਸ ਔਰਤ ਦੇ ਚਾਰੇ ਵਿਆਹਾਂ ਦੇ ਸਬੂਤ ਪੁਲਸ ਨੂੰ ਦੇ ਦਿੱਤੇ ਹਨ। ਪੁਲਸ ਦੋਸ਼ੀਆਂ ਦੀ ਗ੍ਰਿਫਤਾਰੀ ਲਈ ਛਾਪੇਮਾਰੀ ਕਰ ਰਹੀ ਹੈ।