ਪੁਣੇ, 13 ਜਨਵਰੀ (ਪੋਸਟ ਬਿਊਰੋ)- ਮਹਾਰਾਸ਼ਟਰ ਦੇ ਪੁਣੇ ਸ਼ਹਿਰ ਵਿੱਚ 40 ਲੱਖ ਰੁਪਏ ਦੀ ਫਿਰੌਤੀ ਲਈ ਇੱਕ 17 ਸਾਲਾ ਲੜਕੇ ਦਾ ਉਸ ਦੇ ਦੋਸਤ ਨੇ ਅਗਵਾ ਕਰ ਕੇ ਹੱਤਿਆ ਕਰ ਦਿੱਤੀ। ਅਬਦੂਲਾਹਦ ਸਿਦੀਕੀ ਨਾਮ ਦੇ ਮੁੰਡੇ ਦੀ ਲਾਸ਼ ਕੱਲ੍ਹ ਇਥੇ ਸਾਵਿਤਰੀਬਾਈ ਫੂਲੇ ਪੁੁਣੇ ਯੂਨੀਵਰਸਿਟੀ ਦੇ ਕੰਪਲੈਕਸ ਵਿੱਚ ਮਿਲੀ ਸੀ।
ਪੁਲਸ ਨੇ ਦੱਸਿਆ ਕਿ ਦੋਸ਼ੀ ਉਮਰ ਨਾਸਿਰ ਸ਼ੇਖ (20) ਆਪਣੇ ਦੋਸਤ ਸਿਦੀਕੀ ਨੂੰ ਪਾਰਟੀ ਦੇ ਬਹਾਨੇ ਕੱਲ੍ਹ ਸ਼ਾਮ ਪਿੰਪਰੀ ਚਿੰਚਵਾੜ ਦੇ ਦਾਪੋਡੀ ਇਲਾਕੇ ਵਿੱਚ ਲੈ ਗਿਆ। ਘੁੰਮਣ ਮਗਰੋਂ ਉਹ ਉਸ ਯੂਨੀਵਰਸਿਟੀ ਵਿੱਚ ਲੈ ਗਿਆ ਜਿੱਥੇ ਉਸ ਨੇ ਗਲਾ ਦਬਾ ਕੇ ਉਸ ਦੀ ਹੱਤਿਆ ਕਰ ਦਿੱਤੀ। ਉਸ ਦੇ ਬਾਅਦ ਸ਼ੇਖ ਨੇ ਸਿਦੀਕੀ ਦੇ ਮੋਬਾਈਲ ਫੋਨ ਦੀ ਵਰਤੋਂ ਕਰ ਕੇ ਸਿਦੀਕੀ ਦੇ ਇੱਕ ਦੋਸਤ ਨੂੰ ਬੁਲਾਇਆ ਅਤੇ ਸਿਦੀਕੀ ਦੇ ਵੱਡੇ ਭਰਾ ਨੂੰ ਸਿਦੀਕੀ ਦੇ ਅਗਵਾ ਦੀ ਖ਼ਬਰ ਦੇਣ ਨੂੰ ਕਿਹਾ। ਜਦੋਂ ਸਿਦੀਕੀ ਦੇ ਭਰਾ ਨੇ ਫੋਨ ਕੀਤਾ ਤਾਂ ਸ਼ੇਖ ਨੇ ਉਸ ਤੋਂ 40 ਲੱਖ ਰੁਪਏ ਦੀ ਮੰਗ ਕੀਤੀ। ਉਸ ਦੇ ਬਾਅਦ ਪਰਵਾਰ ਨੂੰ ਪੁਲਸ ਨੂੰ ਦੱਸਿਆ। ਉਸਦਾ ਪਰਵਾਰ ਪੁਣੇ ਦੇ ਪਿੰਪਰੀ ਚਿੰਚਵਾੜ ਇਲਾਕੇ ਵਿੱਚ ਕਬਾੜ ਦਾ ਕੰਮ ਕਰਦਾ ਹੈ। ਕਾਲ ਰਿਕਾਡਿੰਗ ਵਿੱਚ ਸ਼ੇਖ ਦੀ ਆਵਾਜ਼ ਪਛਾਨਣ ਤੋਂ ਬਾਅਦ ਪੁਲਸ ਨੇ ਉਸ ਨੂੰ ਗ੍ਰਿਫ਼ਤਾਰ ਕਰ ਲਿਆ। ਸ਼ੇਖ ਨੇ ਪੁਲਸ ਨੂੰ ਦੱਸਿਆ ਕਿ ਉਸ ਨੇ ‘ਖ਼ਤਰਨਾਕ ਖ਼ਿਲਾੜੀ-2' ਨਾਮ ਦੀ ਫਿਲਮ ਦੇਖਣ ਦੇ ਬਾਅਦ ਪੈਸੇ ਦੇ ਲਈ ਆਪਣੇ ਦੋਸਤ ਨੂੰ ਅਗਵਾ ਕਰਨ ਦੀ ਯੋਜਨਾ ਬਣਾਈ ਸੀ।