ਵਾਸ਼ਿੰਗਟਨ, 13 ਜਨਵਰੀ (ਪੋਸਟ ਬਿਊਰੋ)- ਇੱਕ ਮਹਿਲਾ ਨੇ ਇੱਕੋ ਸਾਲ ਵਿੱਚ ਦੋ ਵਾਰ ਦੋ-ਦੋ ਬੱਚਿਆਂ ਨੂੰ ਜਨਮ ਦੇ ਦਿੱਤਾ ਹੈ। ਫਲੋਰੀਡਾ ਵਿੱਚ ਰਹਿਣ ਵਾਲੀ ਇਸ ਮਾਂ ਨੇ ਪਹਿਲੀ ਵਾਰ ਮਾਰਚ 2019 ਵਿੱਚ ਦੋ ਬੱਚਿਆਂ ਨੂੰ ਜਨਮ ਦਿੱਤਾ ਸੀ ਅਤੇ ਇਸ ਦੇ ਬਾਅਦ ਦਸੰਬਰ ਵਿੱਚ ਵੀ ਉਨ੍ਹਾਂ ਦੇ ਦੋ ਬੱਚੇ ਹੋਏ ਸਨ।
ਅਲੈਗਜੈਂਡਰੀਆ ਵੋਲਸਟਿਨ ਨਾਂਅ ਦੀ ਮਹਿਲਾ ਨੇ ਕਿਹਾ ਕਿ ਉਨ੍ਹਾਂ ਨੂੰ ਅਜਿਹਾ ਮਹਿਸੂਸ ਹੋ ਰਿਹਾ ਹੈ ਜਿਵੇਂ ਉਨ੍ਹਾਂ ਨੂੰ ਦੋ ਵਾਰ ਇਨਾਮ ਮਿਲ ਗਿਆ ਹੋਵੇ। ਮਾਰਚ ਵਿੱਚ ਜੁੜਵਾਂ ਬੱਚਿਆਂ ਨੂੰ ਜਨਮ ਦੇਣ ਦੇ ਬਾਅਦ ਵੋਲਸਟਿਨ ਮਈ ਵਿੱਚ ਪ੍ਰੈਗਨੈਂਟ ਹੋ ਗਈ ਤਾਂ ਡਾਕਟਰ ਨੇ ਓਦੋਂ ਹੀ ਕਹਿ ਦਿੱਤਾ ਸੀ ਕਿ ਦੋਬਾਰਾ ਜੁੜਵਾਂ ਬੱਚੇ ਹੋਣ ਦੀ ਸੰਭਾਵਨਾ ਹੈ। ਵੋਲਸਟਿਨ ਨੇ ਕਿਹਾ ਕਿ ਉਨ੍ਹਾਂ ਦੀ ਗ੍ਰੈਂਡਮਦਰ ਨੇ ਵੀ ਦੋ ਵਾਰ ਜੁੜਵਾਂ ਬੱਚਿਆਂ ਨੂੰ ਜਨਮ ਦਿੱਤਾ ਸੀ, ਪ੍ਰੰਤੂ ਉਨ੍ਹਾਂ ਬੱਚਆਂ ਦੀ ਮੌਤ ਹੋ ਗਈ ਸੀ। ਇਸ ਲਈ ਵੋਲਸਟਿਨ ਨੇ ਕਿਹਾ ਕਿ ਉਨ੍ਹਾਂ ਨੂੰ ਅਜਿਹਾ ਲੱਗਦਾ ਹੈ ਕਿ ਗ੍ਰੈਂਡਮਦਰ ਨੇ ਉਨ੍ਹਾਂ ਨੂੰ ਆਪਣੇ ਦੋ ਬੱਚੇ ਗਿਫਟ ਕੀਤੇ ਹਨ। ਅਮਰੀਕੀ ਸਰਕਾਰ ਦੇ ਅੰਕੜਿਆਂ ਮੁਤਾਬਕ ਔਸਤਨ ਇੱਕ ਹਜ਼ਾਰ ਡਲਿਵਰੀ ਵਿੱਚ ਜੁੜਵਾਂ ਬੱਚੇ ਹੋਣ ਦੀ ਸੰਭਾਵਨਾ ਕਰੀਬ 36 ਵਾਰ ਹੁੰਦੀ ਹੈ।
ਵੋਲਸਟਿਨ ਨੇ ਕਿਹਾ ਕਿ ਚਾਰੋਂ ਬੱਚੇ ਠੀਕ ਹਨ। ਦਸੰਬਰ ਵਿੱਚ ਦੋਵਾਂ ਦਾ ਜਨਮ ਪ੍ਰੀਮੈਚਿਓਰ ਹੋਇਆ ਸੀ। ਇੱਕ ਨੂੰ ਹਸਪਤਾਲ ਤੋਂ ਛੁੱਟੀ ਮਿਲ ਗਈ ਹੈ, ਦੂਸਰੇ ਨੂੰ ਕੁਝ ਦਿਨਾਂ ਵਿੱਚ ਘਰ ਭੇਜ ਦਿੱਤਾ ਜਾਏਗਾ। ਪਹਿਲਾਂ ਵੀ ਵੋਲਸਟਿਨ ਦੀ ਇੱਕ ਧੀ ਹੈ, ਇਸ ਲਈ ਉਨ੍ਹਾਂ ਨੂੰ ਪੰਜ ਬੱਚਿਆਂ ਦੀ ਦੇਖਭਾਲ ਕਰਨੀ ਹੋਵੇਗੀ।