ਓਟਵਾ, 12 ਜਨਵਰੀ (ਪੋਸਟ ਬਿਊਰੋ) : ਫੈਡਰਲ ਕੰਜ਼ਰਵੇਟਿਵਾਂ ਦੀ ਲੀਡਰਸਿ਼ਪ ਦੌੜ ਰਸਮੀ ਤੌਰ ੳੱੁਤੇ ਸੋਮਵਾਰ ਨੂੰ ਸ਼ੁਰੂ ਹੋ ਜਾਵੇਗੀ।
ਪਾਰਟੀ ਵੱਲੋਂ ਸ਼ਨਿੱਚਰਵਾਰ ਨੂੰ ਇਸ ਮੁਕਾਬਲੇ ਦੇ ਸਬੰਧ ਵਿੱਚ ਨਿਯਮ ਜਾਰੀ ਕੀਤੇ ਗਏ। ਹੁਣ ਉਮੀਦਵਾਰਾਂ ਕੋਲ 300,000 ਡਾਲਰ ਇਕੱਠੇ ਕਰਨ ਤੇ 3000 ਦਸਤਖ਼ਤ ਜਮ੍ਹਾਂ ਕਰਨ ਲਈ ਦੋ ਮਹੀਨੇ ਦਾ ਹੀ ਸਮਾਂ ਹੈ ਤਾਂ ਹੀ ਚੋਣਪੱਤਰ ਉੱਤੇ ਉਨ੍ਹਾਂ ਦਾ ਨਾਂ ਆ ਸਕਦਾ ਹੈ। ਸ਼ਨਿੱਚਰਵਾਰ ਨੂੰ ਜਾਰੀ ਕੀਤੇ ਬਿਆਨ ਵਿੱਚ ਲੀਡਰਸਿ਼ਪ ਆਰਗੇਨਾਈਜਿ਼ੰਗ ਕਮੇਟੀ ਦੀ ਕੋ-ਚੇਅਰ ਤੇ ਸਾਬਕਾ ਕੰਜ਼ਰਵੇਟਿਵ ਐਮਪੀ ਲੀਜ਼ਾ ਰਾਇਤ ਨੇ ਆਖਿਆ ਕਿ ਇਹ ਮੁਕਾਬਲਾ ਕਾਫੀ ਜ਼ਬਰਦਸਤ ਰਹਿਣ ਵਾਲਾ ਹੈ। ਹੁਣ ਕੈਨੇਡੀਅਨ ਇਹ ਵੇਖ ਸਕਣਗੇ ਕਿ ਅਗਲੀ ਸਰਕਾਰ ਬਣਾਉਣ ਦੇ ਦਾਅਵੇਦਾਰ ਕੰਜ਼ਰਵੇਟਿਵ ਸਖ਼ਤ ਮਿਹਨਤ ਕਰਨ ਲਈ ਕਿਸ ਹੱਦ ਤਕ ਤਿਆਰੀ ਕਰ ਰਹੇ ਹਨ।
ਇਸ ਚੋਣ ਲਈ ਵਿੱਤੀ ਅਤੇ ਦਸਤਖ਼ਤ ਜੁਟਾਉਣ ਦੀ ਸ਼ਰਤ ਨੂੰ ਕਈ ਪੜਾਵਾਂ ਵਿੱਚ ਵੰਡਿਆ ਗਿਆ ਹੈ। 27 ਫਰਵਰੀ ਤੱਕ ਉਮੀਦਵਾਰਾਂ ਨੂੰ 25,000 ਡਾਲਰ ਅਦਾ ਕਰਨੇ ਹੋਣਗੇ ਤੇ ਸੱਤ ਵੱਖ ਵੱਖ ਪ੍ਰੋਵਿੰਸਾਂ ਜਾਂ ਟੈਰੇਟਰੀਜ਼ ਤੋਂ 30 ਵੱਖੋ ਵੱਖ ਹਲਕਿਆਂ ਦੇ 1000 ਮੈਂਬਰਾਂ ਦੇ ਦਸਤਖ਼ਤ ਇਕੱਠੇ ਕਰਨੇ ਹੋਣਗੇ। ਇਸ ਤੋਂ ਬਾਅਦ ਉਨ੍ਹਾਂ ਕੋਲ ਅਗਲੀ ਵਿੱਤੀ ਰਕਮ ਜਮ੍ਹਾਂ ਕਰਵਾਉਣ ਤੇ ਹੋਰ ਸ਼ਰਤਾਂ ਪੂਰੀਆਂ ਕਰਨ ਲਈ 25 ਮਾਰਚ ਤੱਕ ਦਾ ਸਮਾਂ ਹੋਵੇਗਾ। ਇਸ ਫੀਸ ਨੂੰ ਦੋ ਹਿੱਸਿਆਂ ਵਿੱਚ ਲਿਆ ਜਾਂਦਾ ਹੈ ਤੇ ਇਸ ਵਿੱਚੋਂ 200,000 ਡਾਲਰ ਰਿਫੰਡ ਨਾ ਕਰਨ ਯੋਗ ਹੋਣਗੇ ਤੇ 100,00 ਡਾਲਰ ਉਮੀਦਵਾਰ ਨੂੰ ਉਸ ਸੂਰਤ ਵਿਚ ਵਾਪਿਸ ਮਿਲ ਸਕਦੇ ਹਨ ਜੇ ਉਹ ਸਾਰੇ ਨਿਯਮ ਪੂਰੇ ਕਰੇ।
ਇਹ ਲੀਡਰਸਿ਼ਪ ਦੌੜ ਗੈਰ ਰਸਮੀ ਤੌਰ ਉੱਤੇ ਦਸੰਬਰ ਵਿੱਚ ਹੀ ਉਦੋਂ ਸ਼ੁਰੂ ਹੋ ਗਈ ਸੀ ਜਦੋਂ ਮੌਜੂਦਾ ਆਗੂ ਐਂਡਰਿਊ ਸ਼ੀਅਰ ਨੇ ਇਹ ਆਖਿਆ ਸੀ ਕਿ ਜਿਵੇਂ ਹੀ ਉਨ੍ਹਾਂ ਦਾ ਬਦਲ ਮਿਲ ਜਾਵੇਗਾ ਉਹ ਅਹੁਦਾ ਛੱਡ ਦੇਣਗੇ। ਕੰਜ਼ਰਵੇਟਿਵ ਆਪਣਾ ਅਗਲਾ ਆਗੂ 27 ਜੂਨ ਨੂੰ ਟੋਰਾਂਟੋ ਵਿੱਚ ਹੋਣ ਵਾਲੇ ਇਜਲਾਸ ਵਿੱਚ ਚੁਣਨਗੇ। ਇਸ ਚੋਣ ਵਿੱਚ ਵੋਟ ਕਰਨ ਲਈ ਮੈਂਬਰਾਂ ਨੂੰ 17 ਅਪਰੈਲ ਤੱਕ ਦਸਤਖ਼ਤ ਕਰਨੇ ਹੋਣਗੇ।