ਵਾਸ਼ਿੰਗਟਨ, 11 ਜਨਵਰੀ (ਪੋਸਟ ਬਿਊਰੋ)- ਅਮਰੀਕਾ ਦੇ ਅਧਿਕਾਰੀਆਂ ਨੇ ਦਵਾਈ ਦੀਆਂ ਗ਼ੈਰ-ਕਾਨੂੰਨੀ ਪਰਚੀਆਂ ਕੱਟਣ ਦੇ ਦੋਸ਼ ਵਿੱਚ ਇੱਕ ਭਾਰਤੀ-ਅਮਰੀਕੀ ਡਾਕਟਰ ਨੂੰ ਗ੍ਰਿਫ਼ਤਾਰ ਕੀਤਾ ਹੈ।
ਗੁਰਪ੍ਰੀਤ ਸਿੰਘ ਬਾਜਵਾ (48) ਉੱਤੇ ਦੋਸ਼ ਹੈ ਕਿ ਉਸ ਨੇ ਇੱਕ ਹਜ਼ਾਰ ਤੋਂ ਵੱਧ ਮਰੀਜ਼ਾਂ ਨੂੰ 15 ਹਜ਼ਾਰ ਤੋਂ ਵੱਧ ਦਵਾਈ ਦੀਆਂ ਪਰਚੀਆਂ ਗ਼ੈਰ-ਕਾਨੂੰਨੀ ਢੰਗ ਨਾਲ ਕੱਟ ਦਿੱਤੀਆਂ ਅਤੇ ਹਰ ਮਹੀਨੇ ਔਸਤ 700 ਪਰਚੀਆਂ ਕੱਟੀਆਂ ਸਨ। ਵਰਜੀਨੀਆ ਦੇ ਓਕਟਨ ਵਿੱਚ ਕਈ ਸਥਾਨਕ ਕੈਮਿਸਟਾਂ ਨੇ ਬਾਜਵਾ ਦੀਆਂ ਪਰਚੀਆਂ ਉੱਤੇ ਪਹਿਲਾਂ ਹੀ ਰੋਕ ਲਾ ਦਿੱਤੀ ਸੀ। ਇਸ ਰਾਜ ਦੇ ਸਿਹਤ ਵਿਭਾਗ ਨੇ 2012 ਵਿੱਚ ਬਾਜਵਾ ਦਾ ਮੈਡੀਕਲ ਲਾਇਸੈਂਸ ਰੱਦ ਕਰ ਦਿੱਤਾ ਸੀ। ਸਾਲ 2018 ਦੀ ਗਰਮੀਆਂ ਵਿੱਚ ਕਾਨੂੰਨ ਲਾਗੂ ਕਰਨ ਵਾਲੀਆਂ ਏਜੰਸੀਆਂ ਦੇ ਦੋ ਅਧਿਕਾਰੀ ਡਾ. ਬਾਜਵਾ ਤੋਂ ਟਾਈਮ ਲੈ ਕੇ ਮਰੀਜ਼ ਵਜੋਂ ਉਸ ਨੂੰ ਮਿਲਣ ਗਏ। ਇਸ ਦੌਰਾਨ ਡਾ. ਬਾਜਵਾ ਨੇ ਉਨ੍ਹਾਂ ਨੂੰ ਬਿਨ੍ਹਾਂ ਕਿਸੇ ਟੈਸਟ ਦੇ 30 ਦਿਨਾਂ ਦੀ ਦਵਾਈ ਲਿਖ ਦਿੱਤੀ। ਇਨ੍ਹਾਂ ਵਿਚੋਂ ਇੱਕ ਔਰਤ ਅਫਸਰ ਉਨ੍ਹਾਂ ਤੋਂ ਬਿਨਾਂ ਦਿਖਾਏ ਆਪਣੇ ਮਿੱਤਰ ਲਈ ਵੀ ਪਰਚੀ ਲੈ ਗਈ। ਬਾਜਵਾ 'ਤੇ ਗ਼ੈਰ-ਕਾਨੂੰਨੀ ਢੰਗ ਨਾਲ ਦਵਾਈ ਦੀਆਂ ਪਰਚੀਆਂ ਕੱਟਣ ਦੇ ਦੋਸ਼ ਤੈਅ ਹੋਏ ਹਨ। ਦੋਸ਼ੀ ਸਾਬਤ ਹੋਣ 'ਤੇ ਉਸ ਨੂੰ 20 ਸਾਲ ਕੈਦ ਦੀ ਸਜ਼ਾ ਹੋ ਸਕਦੀ ਹੈ।