ਲੁਧਿਆਣਾ , 11 ਜਨਵਰੀ (ਪੋਸਟ ਬਿਊਰੋ)- ਗੱਲੀਂ-ਬਾਤੀਂ ਕ੍ਰਿਪਾ ਕਰਨ ਵਾਲੇ ਨਿਰਮਲ ਬਾਬਾ ਦੇ ਨਾਲ ਸਾਲ 2012 ਵਿੱਚ ਕਰੀਬ ਇੱਕ ਕਰੋੜ ਸੱਤ ਲੱਖ ਰੁਪਏ ਦੀ ਠੱਗੀ ਕਰਨ ਦੇ ਦੋਸ਼ੀ ਅਤੇ ਪੌਸ਼ ਇਲਾਕੇ ਸਾਊਥ ਸਿਟੀ ਦੇ ਇੰਦਰਜੀਤ ਆਨੰਦ ਨੂੰ ਜੁਡੀਸ਼ਲ ਮਜਿਸਟ੍ਰੇਟ ਸ਼ਿਵਾਨੀ ਗਰਗ ਦੀ ਅਦਾਲਤ ਨੇ ਦੋਸ਼ੀ ਕਰਾਰ ਦੇ ਕੇ ਤਿੰਨ ਸਾਲ ਕੈਦ ਦੀ ਸਜਾ ਸੁੁਣਾਈ ਹੈ। ਸਾਥੀ ਦੋਸ਼ੀਆਂ ਕ੍ਰਿਸ਼ਨ ਕੁਮਾਰ, ਸੁਧੀਰ ਕੁਮਾਰ ਅਤੇ ਉਪੇਸ਼ ਕੁਮਾਰ ਨੂੰ ਅਦਾਲਤ ਨੇ ਬਰੀ ਕਰ ਦਿੱਤਾ ਹੈ।
ਇਸ ਸੰਬੰਧ ਵਿੱਚ ਥਾਣਾ ਪੀ ਏ ਯੂ ਵਿੱਚ ਸਾਲ 2012 ਵਿੱਚ ਚਾਰਾਂ ਦੋਸ਼ੀਆਂ ਖ਼ਿਲਾਫ਼ ਕੇਸ ਦਰਜ ਕੀਤਾ ਗਿਆ ਸੀ ਕਿ ਇੰਦਰਜੀਤ ਆਨੰਦ ਨੇ ਪੰਜਾਬ ਨੇਸ਼ਨਲ ਬੈਂਕ ਦੀ ਦਿੱਲੀ ਬ੍ਰਾਂਚ ਦਾ ਇੱਕ ਕਰੋੜ ਸੱਤ ਲੱਖ 12 ਹਜ਼ਾਰ 500 ਦਾ ਚੈਂਕ ਲੁਧਿਆਣਾ ਦੇ ਬਾੜੇਵਾਲ ਰੋਡ ਵਾਲੀ ਇਸੇ ਬੈਂਕ ਦੀ ਬ੍ਰਾਂਚ ਵਿੱਚ ਆਪਣੇ ਖਾਤੇ ਵਿੱਚ ਲਾਇਆ ਸੀ। ਇਸ ਚੈੱਕ 'ਤੇ ਨਿਰਮਲ ਦਰਬਾਰ ਦੀ ਮੋਹਰ ਲੱਗੀ ਸੀ ਅਤੇ ਇਹ ਇਸੇ ਸਾਲ 14 ਫਰਵਰੀ ਨੂੰ ਕੈਸ਼ ਹੋ ਗਿਆ ਸੀ। ਦੋਸ਼ੀ ਨੇ ਇਹ ਰਕਮ ਚੈਂਕਾਂ ਅਤੇ ਆਰ ਜੀ ਟੀ ਐਸ ਦੇ ਰਾਹੀਂ ਕੱਢਵਾਈ ਸੀ। ਇਸ ਵਿੱਚ ਕੁਝ ਰਕਮ ਸਾਥੀ ਦੋਸ਼ੀ ਉਪੇਸ਼ ਕੁਮਾਰ ਨੂੰ ਦਿੱਤੀ ਸੀ। ਇਸੇ ਤਰ੍ਹਾਂ ਉਪੇਸ਼ ਅਤੇ ਕ੍ਰਿਸ਼ਨ ਕੁਮਾਰ ਗੁਪਤਾ ਦੇ ਰਾਹੀਂ ਦਿੱਲੀ ਵਿੱਚ ਧੀਰਜ ਵਾਲੀਆ ਨੂੰ ਵੀ ਪੈਸੇ ਦਿੱਤੇ ਅਤੇ ਕੁਝ ਪੈਸੇ ਕ੍ਰਿਸ਼ਨ ਕੁਮਾਰ ਤੇ ਸੁਧੀਰ ਸਿਆਲ ਨੂੰ ਬਤੌਰ ਕਮਿਸ਼ਂ ਦਿੱਤੇ। ਪੀ ਐਨ ਬੀ ਬਾੜੇਵਾਲ ਬ੍ਰਾਂਚ ਵਿੱਚ ਜਦੋਂ ਇਸੇ ਬੈਂਕ ਦੀ ਦਿੱਲੀ ਬ੍ਰਾਂਚ ਤੋਂ ਫੋਨ ਆਇਆ ਕਿ ਦੋਸ਼ੀ ਇੰਦਰਜੀਤ ਆਨੰਦ ਦੇ ਖਾਤੇ ਤੋਂ ਕੈਸ਼ ਹੋਇਆ ਚੈਕ ਜਾਲੀ ਹੈ ਤਾਂ ਸਥਾਨਿਕ ਬ੍ਰਾਂਚ ਦੇ ਮੈਨੇਜਰ ਨੇ 24 ਫਰਵਰੀ ਨੂੰ ਧੋਖਾਧੜੀ ਦੀ ਸਿ਼ਕਾਇਤ ਦਰਜ ਕਰਵਾਈ ਸੀ।