ਜਲੰਧਰ, 11 ਜਨਵਰੀ (ਪੋਸਟ ਬਿਊਰੋ)- ਸ੍ਰੀ ਹਰਿਮੰਦਰ ਸਾਹਿਬ ਅੰਮ੍ਰਿਤਸਰ ਤੋਂ ਰੋਜ਼ ਸਵੇਰੇ ਜਾਰੀ ਹੁੰਦੇ ਹੁਕਮਨਾਮੇ ਦੀ ਆਵਾਜ਼ ਅਤੇ ਲਿਖਤ ਨੂੰ ਸ਼ੋ੍ਰਮਣੀ ਕਮੇਟੀ ਦੀ ਵੈਬਸਾਈਟ ਤੋਂ ਲੈ ਕੇ ਹੂਬ ਹੂ ਵਰਤਣ ਦੇ ਪੀ ਟੀ ਸੀ ਚੈਨਲ ਦੇ ਇੱਕ ਅਧਿਕਾਰ ਉੱਤੇ ਇਤਰਾਜ਼ ਕਰਨਉੱਤੇ ਪਤਾ ਲੱਗਾ ਹੈ ਕਿ ਫੇਸਬੁੱਕ ਨੇ ਏਦਾਂ ਕਰਨ ਵਾਲੇ ਕਈ ਅਦਾਰਿਆਂ ਦੀ ਵੀਡੀਓ ਬਲਾਕ ਕਰ ਦਿੱਤੀ ਹੈ। ਸਿੱਖ ਸਿਆਸਤ ਵੈਬਸਾਈਟ ਦੇ ਸੰਪਾਦਕ ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਅਸੀਂ ਫੇਸਬੁੱਕ ਨੂੰ ਆਪਣਾ ਸਪੱਸ਼ਟੀਕਰਨ ਭੇਜ ਦਿੱਤਾ ਹੈ ਤੇ ਵੀਡੀਓ ਤੋਂ ਪਾਬੰਦੀ ਹਟਾਉਣ ਦੀ ਅਪੀਲ ਕੀਤੀ ਹੈ। ਫੇਸਬੁੱਕ ਨੇ ਇਸ ਬਾਰੇ ਪੀ ਟੀ ਸੀ ਚੈਨਲ ਦਾ ਪ੍ਰਤੀਕਰਮ ਜਾਣਨ ਲਈ 16 ਜਨਵਰੀ 2020 ਦੀ ਤਰੀਕ ਮਿੱਥੀ ਹੈ।
ਇਸ ਸੰਬੰਧ ਵਿੱਚ ਪੀ ਟੀ ਸੀ ਦੇ ਮੈਨੇਜਰ ਰਾਬਿੰਦਰ ਨਰਾਇਣਨ ਨੇ ਦੱਸਿਆ ਕਿ ਸਵੇਰੇ ਸ੍ਰੀ ਹਰਿਮੰਦਰ ਸਾਹਿਬ ਵਿਖੇ ਹੋਣ ਵਾਲੇ ਕੀਰਤਨ ਅਤੇ ਹੁਕਮਨਾਮੇ ਦੇ ਕਾਪੀਰਾਈਟ ਸ਼੍ਰੋਮਣੀ ਕਮੇਟੀ ਨੇ ਪੀ ਟੀ ਸੀ ਨੂੰ ਦਿੱਤੇ ਹੋਏ ਹਨ ਅਤੇ ਕਿਸੇ ਵੀ ਹੋਰ ਦਾ ਇਸ ਉਪਰ ਅਧਿਕਾਰ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਸਾਡੀ ਫੇਸਬੁੱਕ ਨੂੰ ਕੋਈ ਸ਼ੇਅਰ ਕਰ ਲਵੇ ਜਾਂ ਆਵਾਜ਼ ਤੇ ਲਿਖਤ ਆਪਣੀ ਤਿਆਰ ਕਰਕੇ ਪ੍ਰਸਾਰਿਤ ਕਰ ਲਵੇ ਤਾਂ ਸਾਨੂੰ ਇਤਰਾਜ਼ ਨਹੀਂ, ਪਰ ਬਹੁਤ ਸਾਰੇ ਹੋਰ ਅਦਾਰੇ ਹੂ ਬ ਹੂ ਆਵਾਜ਼ ਤੇ ਲਿਖਤ ਸਾਡੇ ਵਾਲੀ ਵਰਤ ਕੇ ਆਪਣੀ ਸਾਖ਼ ਵਧਾਉਂਦੇ ਜਾਂ ਵਪਾਰਕ ਕੰਮ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਸਾਡੀ ਕੰਪਨੀ ਪੈਸਾ ਖਰਚ ਕੇ ਅਤੇ ਮਿਹਨਤ ਕਰ ਕੇ ਸਾਰਾ ਕੰਮ ਕਰਦੀ ਹੈ, ਕਿਸੇ ਨੂੰ ਇਹ ਹੁਕਮਨਾਮਾ ਹੂਬਹੂ ਵਰਤਣ ਦਾ ਹੱਕ ਨਹੀਂ ਦਿੱਤਾ ਜਾ ਸਕਦਾ। ਦੂਜੇ ਪਾਸੇ ਸਿੱਖ ਸਿਆਸਤ ਵੈਬਸਾਈਟ ਦੇ ਸੰਪਾਦਕ ਪਰਮਜੀਤ ਸਿੰਘ ਨੇ ਪੀ ਟੀ ਸੀ ਦੇ ਦਾਅਵੇ ਨੂੰ ਰੱਦ ਕਰਦਿਆਂ ਕਿਹਾ ਕਿ ਸ੍ਰੀ ਹਰਿਮੰਦਰ ਸਾਹਿਬ ਨਾ ਪੀ ਟੀ ਸੀ ਦਾ ਸਟੂਡੀਓ ਹੈ ਅਤੇ ਨਾ ਓਥੇ ਪੜ੍ਹੀ ਜਾਣ ਵਾਲੀ ਲਿਖਤ ਪੀ ਟੀ ਸੀ ਦੀ ਹੈ। ਹੁਕਮਨਾਮਾ ਪੜ੍ਹਨ ਵਾਲਾ ਗ੍ਰੰਥੀ ਵੀ ਕਿਸੇ ਤਰ੍ਹਾਂ ਪੀ ਟੀ ਸੀ ਦਾ ਕਰਮਚਾਰੀ ਨਹੀਂ, ਫਿਰ ਹੁਕਮਨਾਮੇ ਉੱਤੇ ਉਹ ਆਪਣੀ ਅਜਾਰੇਦਾਰੀ ਕਿਵੇਂ ਸਾਬਤ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਸਾਡੇ ਸਮੇਤ ਦੁਨੀਆ ਭਰ ਵਿੱਚ ਸੈਂਕੜੇ ਮੀਡੀਆ ਅਦਾਰੇ ਸ਼ੋ੍ਰਮਣੀ ਕਮੇਟੀ ਦੀ ਵੈਂਬਸਾਈਟ ਤੋਂ ਹੁਕਮਨਾਮੇ ਦੀ ਆਵਾਜ਼ ਤੇ ਟੈਕਸਟ ਲੈ ਕੇ ਆਪੋ-ਆਪਣੇ ਢੰਗ ਨਾਲ ਡਿਜ਼ਾਈਨ ਕਰਕੇ ਪੇਸ਼ ਕਰਦੇ ਹਨ। ਉਨ੍ਹਾਂ ਕਿਹਾ ਕਿ ਪੀ ਟੀ ਸੀ ਨਾਲ ਸਾਡਾ ਕੋਈ ਲਾਗਾ-ਦਾਗਾ ਨਹੀਂ, ਅਸੀਂ ਤਾਂ ਸਾਰਾ ਕੁਝ ਸ਼ੋ੍ਰਮਣੀ ਕਮੇਟੀ ਦੇ ਪਬਲਿਕ ਡੋਮੇਨ ਤੋਂ ਲੈ ਕੇ ਵਰਤਦੇ ਹਾਂ।