ਨਵੀਂ ਦਿੱਲੀ, 10 ਜਨਵਰੀ, (ਪੋਸਟ ਬਿਊਰੋ)- ਜਵਾਹਰ ਲਾਲ ਨਹਿਰੂ ਯੂਨੀਵਰਸਿਟੀ (ਜੇ ਐੱਨ ਯੂ) ਵਿੱਚ ਹੋਈ ਹਿੰਸਾ ਦੇ ਸਵਾਲ ਉੱਤੇ ਦੋ ਗੱਲਾਂ ਇਕੱਠੀਆਂ ਸਾਹਮਣੇ ਆਈਆਂ ਹਨ। ਇੱਕ ਪਾਸੇ ਦਿੱਲੀ ਪੁਲਸ ਨੇ ਇਸ ਦਾ ਦੋਸ਼ ਵਿਦਿਆਰਥੀ ਆਗੂਆਂ ਤੇ ਉਨ੍ਹਾਂ ਦੇ ਸਮੱਰਥਕਾਂ ਉੱਤੇ ਥੱਪ ਦਿੱਤਾ ਹੈ ਅਤੇ ਦੂਸਰੇ ਪਾਸੇ ਇੱਕ ਮੀਡੀਆ ਚੈਨਲ ਦੇ ਸਟਿੰਗ ਅਪਰੇਸ਼ਨ ਦੇ ਮੁਤਾਬਕ ਇਸ ਦੀ ਜਿ਼ਮੇਵਾਰੀ ਭਾਜਪਾ ਪੱਖੀ ਜਥੇਬੰਦੀ ਦਾ ਇੱਕ ਆਗੂ ਆਪਣੇ ਸਿਰ ਲੈ ਰਿਹਾ ਹੈ।
ਅੱਜ ਸ਼ੁੱਕਰਵਾਰ ਨੂੰ ਦਿੱਲੀ ਪੁਲਸ ਨੇ ਪ੍ਰੈੱਸ ਕਾਨਫਰੰਸ ਕਰ ਕੇ ਕਿਹਾ ਕਿ ਜੇ ਐੱਨ ਯੂ ਹਿੰਸਾ ਵਿੱਚ ਵਿਦਿਆਰਥੀ ਸ਼ਾਮਲ ਸਨ। ਪੁਲਸ ਅਧਿਕਾਰੀਆਂ ਨੇ ਕਿਹਾ ਕਿ ਜੇ ਐੱਨ ਯੂ ਹਿੰਸਾ ਦੀ ਸ਼ੁਰੂਆਤ ਇਕ ਜਨਵਰੀ ਨੂੰ ਹੋਈ ਸੀ। ਪੁਲਸ ਦੀ ਕ੍ਰਾਈਮ ਬਰਾਂਚ ਦੇ ਡੀ ਸੀ ਪੀ ਮੁਤਾਬਕ ਜੇ ਐੱਨ ਯੂ ਹਿੰਸਾ ਕੇਸ ਦੀ ਜਾਂਚ ਬਾਰੇ ਗਲਤ ਸੂਚਨਾ ਫੈਲਾਈ ਗਈ ਹੈ। ਇਕ ਜਨਵਰੀ ਤੋਂ 5 ਜਨਵਰੀ ਤੱਕ ਰਜਿਸਟਰੇਸ਼ਨ ਸੀ। ਐੱਸ ਐੱਫ ਆਈ (ਸਟੂਡੈਂਟਸ ਫੈਡਰੇਸ਼ਨ ਆਫ ਇੰਡੀਆ), ਏ ਆਈ ਐੱਸ ਐੱਫ (ਆਲ ਇੰਡੀਆ ਸਟੂਡੈਂਟਸ ਐਸੋਸੀਏਸ਼ਨ), ਏ ਆਈ ਐੱਸ ਐੱਫ (ਆਲ ਇੰਡੀਆ ਸਟੂਡੈਂਟਸ ਫੈਡਰੇਸ਼ਨ) ਅਤੇ ਡੀ ਐੱਸ ਐੱਫ (ਡੈਮੋਕ੍ਰੇਟਿਕ ਸਟੂਡੈਂਟਸ ਫੈਡਰੇਸ਼ਨ) ਆਦਿ ਸੰਗਠਨਾਂ ਨੇ ਵਿਦਿਆਰਥੀਆਂ ਨੂੰ ਰਜਿਸਟਰੇਸ਼ਨ ਕਰਨ ਤੋਂ ਰੋਕਿਆ ਤੇ ਧਮਕਾਇਆ ਸੀ। ਇਸ ਮਗਰੋਂ ਵਿਵਾਦ ਵਧਦ ਗਿਆ ਅਤੇ 5 ਜਨਵਰੀ ਨੂੰ ਪੇਰੀਆਰ ਅਤੇ ਸਾਬਰਮਤੀ ਹੋਸਟਲਾਂ ਵਿੱਚ ਕੁਝ ਕਮਰਿਆਂ ਵਿੱਚ ਹਮਲਾ ਕੀਤਾ ਗਿਆ। ਪੁਲਸ ਕ੍ਰਾਈਮ ਬਰਾਂਚ ਦੇ ਡੀ ਸੀ ਪੀ ਨੇ ਕਿਹਾ ਕਿ ਜੇ ਐੱਨ ਯੂ ਵਿੱਚ ਹਿੰਸਾ ਕਰਨ ਲਈ ਵਟਸਐਪ ਗਰੁੱਪ ਵੀ ਬਣਾਏ ਗਏ। ਨਕਾਬਪੋਸ਼ ਜਾਣਦੇ ਸਨ ਕਿ ਉਨ੍ਹਾਂ ਨੇ ਕਿਸ-ਕਿਸ ਕਮਰੇ ਵਿੱਚ ਜਾਣਾ ਹੈ। ਹਿੰਸਾ ਦੇ ਸੀ ਸੀ ਟੀ ਵੀ ਫੁਟੇਜ ਨਹੀਂ ਮਿਲੇ, ਪਰ ਵਾਇਰਲ ਵੀਡੀਓ ਤੋਂ ਦੋਸ਼ੀਆਂ ਦੀ ਪਛਾਣ ਹੋਈ ਅਤੇ ਅਸੀਂ 30-32 ਗਵਾਹਾਂ ਨਾਲ ਗੱਲ ਕੀਤੀ ਹੈ। ਪੁਲਸ ਅਨੁਸਾਰ ਜੇ ਐੱਨ ਯੂ ਵਿੱਚ ਹਿੰਸਾ ਵਿੱਚ ਜਿਹੜੇ ਵਿਦਿਆਰਥੀਆਂ ਦੀ ਪਛਾਣ ਹੋਈ ਹੈ, ਉਨ੍ਹਾਂ ਵਿੱਚੋਂ ਚੁਨਚੁਨ ਕੁਮਾਰ, ਪੰਕਜ ਮਿਸ਼ਰਾ, ਆਇਸ਼ੀ ਘੋਸ਼. ਯੋਗੇਂਦਰ ਭਾਰਦਵਾਜ, ਪ੍ਰਿਯਾ ਰੰਜਨ, ਵਿਕਾਸ ਪਟੇਲ, ਡੋਲਨ ਸਾਵੰਤ, ਸੁਚੇਤਾ ਤਾਲੁਕਦਾਰ, ਵਸਕਰ ਵਿਜੇ ਆਦਿ ਦੇ ਨਾਂਅ ਸ਼ਾਮਲ ਹਨ।
ਵਰਨਣ ਯੋਗ ਹੈ ਕਿ ਐਤਵਾਰ ਰਾਤ ਜੇ ਐੱਨ ਯੂ ਵਿੱਚ ਨਕਾਬਪੋਸ਼ ਹਮਲਵਾਰਾਂ ਨੇ ਵਿਦਿਆਰਥੀਆਂ ਉੱਤੇ ਹਮਲਾ ਕੀਤਾ ਸੀ, ਜਿਸ ਵਿੱਚ ਜੇ ਐੱਨ ਯੂ ਵਿਦਿਆਰਥੀ ਯੂਨੀਅਨ ਦੀ ਪ੍ਰਧਾਨ ਆਇਸ਼ੀ ਘੋਸ਼ ਸਮੇਤ ਕਈ ਵਿਦਿਆਰਥੀ ਜ਼ਖਮੀ ਹੋਏ ਸਨ। ਇਸ ਹਮਲੇ ਵਿੱਚ ਆਇਸ਼ੀ ਘੋਸ਼ ਦੇ ਸਿਰ ਤੇ ਹੱਥ ਉੱਤੇ ਗੰਭੀਰ ਸੱਟਾਂ ਲੱਗੀਆਂ ਸਨ।
ਦੂਸਰੇ ਪਾਸੇ ‘ਆਜ ਤਕ’ ਨੇ ਇਕ ਸਟਿੰਗ ਆਪਰੇਸ਼ਨ ਕੀਤਾ ਹੈ, ਜਿਸ ਵਿੱਚ ਹਿੰਸਾ ਫੈਲਾਉਣ ਵਾਲਿਆਂ ਨੇ ਖੁਦ ਹਿੰਸਾ ਕਰਨ ਦੀ ਗੱਲ ਮੰਨੀ ਹੈ। ਆਪਣੇ ਆਪ ਨੂੰ ਏ ਬੀ ਵੀ ਪੀ ਦਾ ਵਰਕਰ ਦੱਸਦਾ ਅਕਸ਼ਤ ਅਵਸਥੀ ਵੀ ਹਮਲੇ ਵਿੱਚ ਸ਼ਾਮਲ ਸੀ। ਉਸ ਨੇ ਖੁਦ ਹਿੰਸਾ ਵਿੱਚ ਸ਼ਾਮਲ ਹੋਣਾ ਮੰਨਿਆ ਹੈ। ਹਮਲੇ ਵੇਲੇ ਅਕਸ਼ਤ ਨੇ ਹੈਲਮੈਟ ਪਾਇਆ ਸੀ। ਉਸ ਨੇ ਦੱਸਿਆ ਕਿ 20 ਲੋਕ ਜੇ ਐੱਨ ਯੂ ਦੇ ਅਤੇ 20 ਬਾਹਰੋਂ ਸੱਦੇ ਗਏ ਸਨ। ਅਕਸ਼ਤ ਜੇ ਐੱਨ ਯੂ ਵਿੱਚ ਬੀ ਏ (ਫਰੈਂਚ) ਦਾ ਫਸਟ ਈਅਰ ਦਾ ਵਿਦਿਆਰਥੀ ਹੈ। ਸਟਿੰਗ ਆਪਰੇਸ਼ਨ ਵਿੱਚ ਉਸ ਨੂੰ ਕਹਿੰਦੇ ਸੁਣਿਆ ਗਿਆ ਕਿ ਉਸ ਕੋਲ ਡੰਡਾ ਸੀ ਅਤੇ ਕਈ ਲੋਕਾਂ ਨੂੰ ਉਸ ਨੇ ਕੁੱਟਿਆ। ਅਕਸ਼ਤ ਅਵਸਥੀ ਨੇ ਦੱਸਿਆ ਕਿ ਪਹਿਲਾਂ ਪੇਰੀਆਰ ਵਿੱਚ ਹਮਲਾ ਹੋਇਆ, ਉਸ ਤੋਂ ਬਾਅਦ ਲੋਕ ਸਾਬਰਮਤੀ ਹੋਸਟਲ ਵੱਲ ਭੱਜੇ ਤਾਂਂ ਸਾਬਰਮਤੀ ਵਿੱਚ ਹਮਲਾ ਕੀਤਾ ਗਿਆ। ਖੱਬੇ ਪੱਖੀ ਵਿਦਿਆਰਥੀਆਂ ਨੂੰ ਅੰਦਾਜਾ ਵੀ ਨਹੀਂ ਸੀ ਕਿ ਏ ਬੀ ਵੀ ਪੀ ਪਲਟ ਵਾਰ ਕਰੇਗੀ।
ਇਸ ਸਟਿੰਗ ਅਪਰਸੇ਼ਨ ਦੇ ਬਾਵਜੂਦ ਜਵਾਹਰ ਲਾਲ ਨਹਿਰੂ ਯੂਨੀਵਰਸਿਟੀ ਦੀ ਹਿੰਸਾ ਬਾਰੇ ਦਿੱਲੀ ਪੁਲਸ ਵੱਲੋਂ ਸ਼ੱਕੀ ਹਮਲਾਵਰ ਦੇ ਰੂਪ ਵਿੱਚ ਪੇਸ਼ ਕੀਤੇ ਜਾਣ ਉੱਤੇ ਯੂਨੀਵਰਸਿਟੀ ਵਿਦਿਆਰਥੀਆਂ ਦੀ ਚੁਣੀ ਹੋਈ ਪ੍ਰਧਾਨ ਆਇਸ਼ੀ ਘੋਸ਼ ਨੇ ਕਿਹਾ ਕਿ ‘ਮੈਨੂੰ ਦੇਸ਼ ਦੇ ਕਾਨੂੰਨ ਉੱਤੇ ਪੂਰਾ ਭਰੋਸਾ ਹੈ। ਮੇਰੀ ਸੋਚ ਹੈ ਕਿ ਜਾਂਚ ਨਿਰਪੱਖ ਹੋਵੇਗੀ ਤੇ ਮੈਨੂੰ ਨਿਆਂ ਮਿਲੇਗਾ।` ਉਸ ਨੇ ਪੁੱਛਿਆ, ‘ਦਿੱਲੀ ਪੁਲਸ ਪੱਖਪਾਤ ਕਿਉਂ ਕਰਦੀ ਹੈ? ਮੈਂ ਕਿਸੇ ਉੱਤੇ ਹਮਲਾ ਨਹੀਂ ਕੀਤਾ। ਅਸੀਂ ਕੁਝ ਗਲਤ ਨਹੀਂ ਕੀਤਾ। ਅਸੀਂ ਦਿੱਲੀ ਪੁਲਸ ਤੋਂ ਡਰਦੇ ਨਹੀਂ। ਅਸੀਂ ਕਾਨੂੰਨ ਦੇ ਨਾਲ ਖੜ੍ਹੇ ਰਹਾਂਗੇ ਤੇ ਲੋਕਤੰਤਰੀ ਅਤੇ ਸ਼ਾਂਤੀ ਪੂਰਨ ਤਰੀਕੇ ਨਾਲ ਆਪਣੇ ਅੰਦੋਲਨ ਨੂੰ ਅੱਗੇ ਵਧਾਵਾਂਗੇ।`