ਪੰਚਕੂਲਾ, 10 ਜਨਵਰੀ (ਪੋਸਟ ਬਿਊਰੋ)- ਮਨੀਮਾਜਰਾ ਦੇ ਦਰਸ਼ਨੀ ਬਾਗ ਨੇੜੇ ਕੱਲ੍ਹ ਸਵੇਰੇ ਇੱਕ ਸਕਾਰਪੀਓ ਚਾਲਕ ਨੇ ਗੱਡੀ ਬੈਕ ਕਰਦੇ ਸਮੇਂ ਦੋ ਸਾਲ ਦੀ ਮਾਸੂਮ ਬੱਚੀ ਨੂੰ ਕੁਚਲ ਦਿੱਤਾ। ਮੌਕੇ 'ਤੇ ਮੌਜੂਦ ਲੋਕਾਂ ਨੇ ਸੂਚਨਾ ਪੁਲਸ ਕੰਟਰੋਲ ਰੂਮ ਨੂੰ ਦਿੱਤੀ ਤਾਂ ਪੁਲਸ ਨੇ ਜ਼ਖਮੀ ਬੱਚੀ ਨੂੰ ਸਰਕਾਰੀ ਹਸਪਤਾਲ ਵਿੱਚ ਦਾਖਲ ਕਰਾਇਆ, ਜਿੱਥੇ ਡਾਕਟਰਾਂ ਨੇ ਉਸ ਨੂੰ ਮ੍ਰਿਤਕ ਐਲਾਨ ਕਰ ਦਿੱਤਾ। ਮ੍ਰਿਤਕ ਦੀ ਪਛਾਣ ਮਨੀਮਾਜਰਾ ਵਾਸੀ ਗੌਰੀ ਦੇ ਰੂਪ ਵਿੱਚ ਹੋਈ ਹੈ। 
ਪੰਚਕੂਲ ਸੈਕਟਰ 4 ਦਾ ਵਾਸੀ ਬਿਜ਼ਨਸਮੈਨ ਪੰਕਜ ਕੁਮਾਰ ਮਨੀਮਾਜਰਾ ਦੇ ਦਰਸ਼ਨੀ ਬਾਗ ਨੇੜੇ ਪਾਰਕਿੰਗ ਵਿੱਚ ਆਇਆ ਸੀ। ਉਹ ਪਹਿਲਾਂ ਕਾਰ ਵਿੱਚ ਆਇਆ ਅਤੇ ਕੁਝ ਕੰਮ ਲਈ ਚਲਾ ਗਿਆ। ਥੋੜ੍ਹੀ ਦੇਰ ਬਾਅਦ ਵਾਪਸ ਆਇਆ ਤੇ ਉਥੇ ਖੜ੍ਹੀ ਸਕਾਰਪੀਓ ਸਟਾਰਟ ਕਰ ਕੇ ਬੈਕ ਕਰਨ ਲੱਗਾ। ਉਥੇ ਪਾਰਕਿੰਗ ਏਰੀਆ ਵਿੱਚ ਦੋ ਸਾਲ ਦੀ ਮਾਸੂਮ ਗੌਰੀ ਖੇਡ ਰਹੀ ਸੀ। ਖੇਡਦੇ ਖੇਡਦੇ ਉਹ ਸਕਾਰਪੀਓ ਦੇ ਬਿਲਕੁਲ ਪਿੱਛੇ ਆ ਗਈ। ਪੰਕਜ ਨੇ ਗੱਡੀ ਸਟਾਰਟ ਕੀਤੀ ਅਤੇ ਬੈਕ ਕਰਨ ਲੱਗਾ। ਉਥੇ ਬੱਚੀ ਤੁਰਦੇ-ਤੁਰਦੇ ਅਚਾਨਕ ਬੈਠ ਗਈ। ਤਦ ਸਕਾਰਪੀਓ ਦਾ ਟਾਇਰ ਉਸ ਦੇ ਉਪਰ ਚੜ੍ਹ ਗਿਆ। ਡਰਾਈਵਰ ਨੂੰ ਪਤਾ ਹੀ ਨਹੀਂ ਲੱਗਾ ਕਿ ਹੇਠਾਂ ਬੱਚੀ ਆਈ ਹੈ।