ਲੰਡਨ, 9 ਜਨਵਰੀ, (ਪੋਸਟ ਬਿਊਰੋ)- ਪ੍ਰਿੰਸ ਹੈਰੀ ਅਤੇ ਉਨ੍ਹਾਂ ਦੀ ਪਤਨੀ ਮੇਗਨ ਮਰਕੇਲ ਨੇ ਅਚਾਨਕ ਆਪਣੀ ਯੋਜਨਾ ਦੇ ਐਲਾਨ ਨਾਲ ਪੂਰੇ ਦੇਸ਼ ਨੂੰ ਹੈਰਾਨ ਕਰ ਦਿੱਤਾ ਹੈ ਕਿ ਬ੍ਰਿਟੇਨ ਅਤੇ ਅਮਰੀਕਾ ਵਿਚ ਆਪਣਾ ਸਮਾਂ ਬਿਤਾਉਣ ਲਈ ਉਹ ਖੁਦ ਨੂੰ ਸ਼ਾਹੀ ਭੂਮਿਕਾ ਤੋਂ ਵੱਖ ਕਰ ਰਹੇ ਹਨ। ਦੋਵਾਂ ਨੇ ਮਹਾਰਾਣੀ ਨਾਲ ਸਲਾਹ-ਮਸ਼ਵਰਾ ਕੀਤੇ ਬਿਨਾਂ ਇਹ ਐਲਾਨ ਕਰ ਦਿੱਤਾ ਹੈ, ਜਿਸ ਨੂੰ ਬ੍ਰਿਟੇਨ ਦੇ ਸ਼ਾਹੀ ਖਾਨਦਾਨ ਦੇ ਅੰਦਰ ਖਿਲਾਰੇ ਦੇ ਰੂਪ ਵਿੱਚ ਦੇਖਿਆ ਜਾ ਰਿਹਾ ਹੈ।
ਬੁੱਧਵਾਰ ਰਾਤ ਅਚਾਨਕ ਇਕ ਬਿਆਨ ਜਾਰੀ ਕਰ ਕੇ ਇਸ ਜੋੜੇ ਨੇ ਆਪਣੀ ਮੌਜੂਦਾ ਭੂਮਿਕਾ ਤੋਂ ਪਿੱਛੇ ਹਟਣ ਦਾ ਐਲਾਨ ਕਰ ਦਿਤਾ। ਉਨ੍ਹਾਂ ਕਿਹਾ ਕਿ ਉਹ ਆਪਣੇ 8 ਮਹੀਨਿਆਂ ਦੇ ਪੁੱਤਰ ਆਰਚੀ ਨਾਲ ਬ੍ਰਿਟੇਨ ਤੇ ਉੱਤਰੀ ਅਮਰੀਕਾ ਵਿੱਚ ਸਮਾਂ ਬਿਤਾਉਣ ਲਈ ਇਹ ਕਦਮ ਚੁੱਕ ਰਹੇ ਹਨ। ਬਕਿੰਘਮ ਪੈਲੇਸ ਤੋਂ ਜਾਰੀ ਬਿਆਨ ਮੁਤਾਬਕ ਦੋਵਾਂ ਨੇ ਆਖਿਆ ਕਿ ਅਸੀਂ ਸ਼ਾਹੀ ਪਰਿਵਾਰ ਦੇ ਸੀਨੀਅਰ ਮੈਂਬਰਾਂ ਦੀ ਭੂਮਿਕਾ ਤੋਂ ਵੱਖ ਹੋ ਕੇ ਆਰਥਿਕ ਪੱਖੋਂ ਸਵੈ ਨਿਰਭਰ ਹੋਣਾ ਚਾਹੁੰਦੇ ਹਾਂ ਤੇ ਇਸ ਦੌਰਾਨ ਮਹਾਰਾਣੀ ਨੂੰ ਸਾਡਾ ਪੂਰਾ ਸਹਿਯੋਗ ਰਹੇਗਾ। ਬਿਆਨ ਮੁਤਾਬਕ ਇਸ ਨਾਲ ਅਸੀਂ ਆਪਣੇ ਪੁੱਤਰ ਨੂੰ ਸ਼ਾਹੀ ਪ੍ਰੰਪਰਾ ਦਾ ਸਨਮਾਨ ਕਰਦੇ ਹੋਏ ਪਾਲਣ ਦੇ ਸਮਰੱਥ ਹੋਵਾਂਗੇ ਤੇ ਸਾਡੇ ਪਰਿਵਾਰ ਨੂੰ ਸਾਡੇ ਨਵੇਂ ਚੈਰੀਟੇਬਲ ਟਰੱਸਟ ਦੀ ਸਥਾਪਨਾ ਸਮੇਤ ਨਵੇਂ ਚੈਪਟਰ ਸ਼ੁਰੂ ਕਰਨ ਦੇ ਲਈ ਧਿਆਨ ਕੇਂਦ੍ਰਿਤ ਕਰਨ ਦਾ ਸਮਾਂ ਵੀ ਮਿਲ ਸਕੇਗਾ।
ਜੋੜੇ ਦੇ ਇਸ ਐਲਾਨ ਨਾਲ ਪ੍ਰਿੰਸ ਹੈਰੀ ਦੀ 93 ਸਾਲਾ ਦਾਦੀ ਮਾਂ ਮਹਾਰਾਣੀ ਏਲੀਜ਼ਾਬੇਥ ਨੂੰ ਬਹੁਤ ਹੈਰਾਨੀ ਹੋਈ ਲੱਗਦੀ ਹੈ। ਉਨ੍ਹਾਂ ਦੇ ਇਸ ਐਲਾਨ ਨੂੰ ਆਨਲਾਈਨ ਪਲੇਟਫਾਰਮ ਉੱਤੇ ਮੈਗਜ਼ਿਟ ਕਰਾਰ ਦਿੱਤਾ ਗਿਆ, ਪਰ ਇਸ ਐਲਾਨ ਨੂੰ ਨਿੱਜੀ ਦੱਸਿਆ ਗਿਆ ਹੈ, ਜਿਸ ਦੀ ਪ੍ਰਵਾਨਗੀ ਅਜੇ ਤੱਕ ਸ਼ਾਹੀ ਮਹਿਲ ਨੇ ਨਹੀਂ ਦਿੱਤੀ। ਉਂਜ ਇਸ ਦੇ ਜਵਾਬ ਵਿੱਚ ਬਕਿੰਘਮ ਪੈਲੇਸ ਨੇ ਇਕ ਬਿਆਨ ਵਿੱਚ ਆਖਿਆ ਕਿ ਡਿਊਕ ਅਤੇ ਡਚੇਜ ਆਫ ਸਸੈਕਸ ਦੇ ਨਾਲ ਗੱਲਬਾਤ ਸ਼ੁਰੂਆਤੀ ਪੜਾਅ ਵਿੱਚ ਹੈ, ਅਸੀਂ ਵੱਖਰਾ ਰਸਤਾ ਚੁਣਨ ਦੀ ਉਨ੍ਹਾਂ ਦੀ ਇੱਛਾ ਸਮਝਦੇ ਹਾਂ, ਪਰ ਇਹ ਗੰਭੀਰ ਮਾਮਲਾ ਹੈ, ਜਿਸ ਨੂੰ ਹੱਲ ਕਰਨ ਵਿੱਚ ਸਮਾਂ ਲਗੇਗਾ। ਬੀ ਬੀ ਸੀ ਮੁਤਾਬਕ ਜੋੜੇ ਦੇ ਇਸ ਐਲਾਨ ਬਾਰੇ ਸ਼ਾਹੀ ਮਹਿਲ ਨੂੰ ਪਤਾ ਨਹੀਂ ਸੀ ਅਤੇ ਜੋੜੇ ਨੇ ਇਸ ਬਾਰੇ ਪਹਿਲਾਂ ਸ਼ਾਹੀ ਪਰਿਵਾਰ ਦੇ ਕਿਸੇ ਸੀਨੀਅਰ ਮੈਂਬਰ ਨਾਲ ਸਲਾਹ ਮਸ਼ਵਰਾ ਨਹੀਂ ਕੀਤਾ।
35 ਸਾਲਾ ਪ੍ਰਿੰਸ ਹੈਰੀ ਨੇ ਮਈ 2018 ਵਿੱਚ ਅਮਰੀਕੀ ਅਭਿਨੇਤਰੀ ਮੇਗਨ ਮਰਕੇਲ ਨਾਲ ਵਿਆਹ ਕੀਤਾ ਸੀ ਤੇ ਮਈ 2019 ਵਿੱਚ ਆਰਚੀ ਪੈਦਾ ਹੋਇਆ ਸੀ। ਸਾਲ 2019 ਵਿੱਚ ਦੋਵਾਂ ਲਈ ਕਾਫੀ ਮੁਸ਼ਕਿਲ ਭਰਿਆ ਰਿਹਾ ਸੀ। ਉਸ ਸਮੇਂ ਦੋਹਾਂ ਨੇ ਇਕ ਟੈਲੀਵੀਜ਼ਨ ਡਾਕੂਮੈਂਟਰੀ ਵਿੱਚ ਆਪਣਾ ਭੂਮਿਕਾਵਾਂ ਉੱਤੇ ਮੀਡੀਆ ਰਿਪੋਰਟਾਂ ਉੱਤੇ ਨਰਾਜ਼ਗੀ ਜ਼ਾਹਿਰ ਕੀਤੀ ਸੀ ਅਤੇ ਬ੍ਰਿਟਿਸ਼ ਟੇਬਲਾਇਡ ਦੇ ਖਿਲਾਫ ਕਾਨੂੰਨੀ ਕਾਰਵਾਈ ਦਾ ਫੈਸਲਾ ਕੀਤਾ ਸੀ। ਇਸ ਦੇ ਨਾਲ ਹੀ ਪਿਛਲੇ 2 ਸਾਲਾਂ ਵਿੱਚ ਦੋਹਾਂ ਡਚੇਜ ਆਫ ਕੈਂਮਬ੍ਰਿਜ਼ ਕੇਟ ਮਿਡਲਟਨ ਦੇ ਜਨਮ ਦਿਨ ਮੌਕੇ ਸ਼ਾਮਲ ਨਹੀਂ ਹੋਏ ਸਨ ਤੇ ਅਫਵਾਹਾਂ ਨੂੰ ਹਵਾ ਮਿਲੀ ਕਿ ਸ਼ਾਹੀ ਪਰਿਵਾਰ ਵਿੱਚ ਪ੍ਰਿੰਸ ਵਿਲੀਅਮ ਅਤੇ ਪ੍ਰਿੰਸ ਹੈਰੀ ਭਾਵ ਦੋਹਾਂ ਭਰਾਵਾਂ ਵਿੱਚ ਖਟਾਸ ਚੱਲ ਰਹੀ ਹੈ। ਇਸ ਸਮੇਂ ਸ਼ਾਹੀ ਜੋੜੇ ਦਾ ਹਰ ਖਰਚ ਬ੍ਰਿਟੇਨ ਦੇ ਟੈਕਸ ਦਾਤਾਵਾਂ ਦੇ ਖੁਦਮੁਖਤਿਆਰੀ ਫੰਡ ਵੱਲੋਂ ਚੁੱਕਿਆ ਜਾਂਦਾ ਹੈ। ਹੈਰੀ ਕੋਲ ਕੁਝ ਨਿੱਜੀ ਪੈਸਾ ਹੈ, ਜੋ ਉਨ੍ਹਾਂ ਦੀ ਸਵਰਗੀ ਮਾਂ ਡਾਇਨਾ ਛੱਡ ਗਈ ਸੀ, ਪਰ ਉਨ੍ਹਾਂ ਨੂੰ ਰਹਿਣ ਲਈ ਆਪਣੇ ਪਿਤਾ ਚਾਰਲਸ ਅਤੇ ਸਰਕਾਰੀ ਫੰਡ ਤੋਂ ਮਦਦ ਮਿਲਦੀ ਹੈ। ਮੌਜੂਦਾ ਭੂਮਿਕਾ ਵਿੱਚ ਸ਼ਾਹੀ ਜੋੜੇ ਉੱਤੇ ਕਿਸੇ ਤਰ੍ਹਾਂ ਕਮਾਈ ਕਰਨ ਦੀ ਪਾਬੰਦੀ ਹੈ, ਪਰ ਸ਼ਾਹੀ ਭੂਮਿਕਾ ਛੱਡਣ ਪਿੱਛੋਂ ਉਹ ਨੌਕਰੀ ਕਰ ਸਕਣਗੇ। ਬਾਅਦ ਵਿੱਚ ਵੀ ਵਿਦੇਸ਼ੀ ਦੌਰਿਆਂ ਦੌਰਾਨ ਉਨ੍ਹਾਂ ਦੀ ਯਾਤਰਾ ਦਾ ਖਰਚ ਖੁਦਮੁਖਤਿਆਰੀ ਫੰਡ ਅਤੇ ਮੇਜ਼ਬਾਨ ਦੇਸ਼ ਵੱਲੋਂ ਚੁੱਕਿਆ ਜਾਵੇਗਾ।