* ਪੰਜਾਬ ਵਿੱਚ ਰਲਿਆ-ਮਿਲਿਆ ਅਸਰ ਵੇਖਿਆ ਗਿਆ
ਨਵੀਂ ਦਿੱਲੀ, 8 ਜਨਵਰੀ, (ਪੋਸਟ ਬਿਊਰੋ)- ਭਾਰਤ ਦੀਆਂ ਕੇਂਦਰੀ ਟਰੇਡ ਯੂਨੀਅਨਾਂ ਦੀ ਹੜਤਾਲ ਕਾਰਨ ਅੱਜ ਇਸ ਦੇਸ਼ ਦੇ ਕਈ ਰਾਜਾਂ ਵਿਚ ਆਮ ਜਨਜੀਵਨ ਠੱਪ ਹੋ ਗਿਆ। ਹੜਤਾਲ ਦਾ ਬਹੁਤਾ ਅਸਰ ਕਈ ਕਿਸਮ ਦੀਆਂ ਬੈਂਕਿੰਗ ਤੇ ਆਵਾਜਾਈ ਸੇਵਾਵਾਂ ਉੱਤੇ ਪਿਆ, ਪਰ ਹੋਰ ਕਾਰਬਾਰ ਆਮ ਕਰ ਕੇ ਚੱਲਦੇ ਰਹੇ।
ਅੱਜ ਖੱਬੇ ਪੱਖੀ ਪਾਰਟੀਆਂ ਦੀ ਸਰਕਾਰ ਵਾਲੇ ਕੇਰਲਾ ਅਤੇ ਕੁਝ ਹੋਰ ਰਾਜਾਂ: ਜਿਵੇਂ ਆਸਾਮ, ਬੰਗਾਲ ਵਿਚ ਸੜਕ ਤੇ ਰੇਲ ਸੇਵਾਵਾਂ ਹੜਤਾਲ ਦੇ ਸੱਦੇ ਤੋਂ ਕਾਫੀ ਪ੍ਰਭਾਵਤ ਰਹੀਆਂ। ਯੂਨੀਅਨਾਂ ਨੇ ਕੇਂਦਰ ਸਰਕਾਰ ਦੀ ਆਰਥਕ ਨੀਤੀਆਂ ਨੂੰ ਮਜ਼ਦੂਰ ਤੇ ਲੋਕ ਵਿਰੋਧੀ ਕਹਿ ਕੇ ਇਸ ਹੜਤਾਲ ਦਾ ਇਹ ਸੱਦਾ ਦਿਤਾ ਸੀ। ਤ੍ਰਿਪੁਰਾ ਵਰਗੇ ਰਾਜਾਂ ਵਿਚ ਬੈਂਕਾਂ ਤੇ ਵਿੱਤੀ ਸੰਸਥਾਵਾਂ ਦੀਆਂ ਕਈ ਬਰਾਂਚਾਂ ਆਮ ਤੌਰ ਉੱਤੇ ਬੰਦ ਰਹੀਆਂ। ਬਾਕੀ ਸਾਰੇ ਭਾਰਤ ਵਿੱਚ ਵੀ ਟਰੇਡ ਯੂਨੀਅਨਾਂ ਨੇ ਥਾਂ-ਥਾਂ ਧਰਨੇ ਪ੍ਰਦਰਸ਼ਨ ਕੀਤੇ। ਇਸ ਦੌਰਾਨ ਟਰੇਡ ਯੂਨੀਅਨਾਂ ਨੇ ਦਾਅਵਾ ਕੀਤਾ ਕਿ ਹੜਤਾਲ ਵਿਚ ਲਗਭਗ 25 ਕਰੋੜ ਲੋਕ ਸ਼ਾਮਲ ਹੋਏ ਹੋ ਸਕਦੇ ਹਨ, ਪਰ ਸਰਕਾਰ ਦਾ ਦਾਅਵਾ ਹੈ ਕਿ ਦੇਸ਼ ਵਿਚ ਕਿਤੇ ਵੀ ਜ਼ਰੂਰੀ ਸੇਵਾਵਾਂ ਉੱਤੇ ਅਸਰ ਪੈਣ ਦੀ ਕੋਈ ਖ਼ਬਰ ਨਹੀਂ ਹੈ, ਉਂਜ ਪੱਛਮੀ ਬੰਗਾਲ ਵਿੱਚ ਰੇਲ ਆਵਾਜਾਈ ਪ੍ਰਭਾਵਤ ਹੋਈ ਹੈ।
ਹੜਤਾਲ ਦੌਰਾਨ ਕੇਰਲਾ ਵਿਚ ਸਰਕਾਰੀ ਅਤੇ ਨਿਜੀ ਬੱਸਾਂ ਸੜਕਾਂ ਉੱਤੇ ਨਹੀਂ ਆਈਆਂ। ਥਿਰੂਵਨੰਤਪੁਰਮ ਵਿਚ ਸਰਕਾਰ ਦੀਆਂ ਸ਼ਹਿਰੀ ਅਤੇ ਲੰਮੀ ਦੂਰੀ ਦੇ ਰੂਟਾਂ ਦੀਆਂ ਬੱਸ ਸੇਵਾਵਾਂ ਬੰਦ ਰਹੀਆਂ। ਸੜਕਾਂ ਉੱਤੇ ਵਾਹਨਾਂ ਅਤੇ ਆਟੋ ਰਿਕਸ਼ਾ ਦੀ ਆਵਾਜਾਈ ਵੀ ਘੱਟ ਹੀ ਸੀ। ਪਛਮੀ ਬੰਗਾਲ ਦੇ ਕਈ ਹਿੱਸਿਆਂ ਵਿਚ ਸੜਕ ਅਤੇ ਰੇਲ ਆਵਾਜਾਈ ਪ੍ਰਭਾਵਤ ਰਹੀ। ਹੜਤਾਲ ਸਮਰਥਕਾਂ ਨੇ ਰਾਜ ਦੇ ਕੁਝ ਹਿੱਸਿਆਂ ਵਿਚ ਰੈਲੀਆਂ ਕੱਢ ਕੇ ਰੇਲ ਪਟੜੀਆਂ ਜਾਮ ਕਰ ਦਿਤੀਆਂ। ਪੁਲਿਸ ਨੇ ਫ਼ੌਰੀ ਤੌਰ ਉੱਤੇ ਵਾਹਨਾਂ ਦੀ ਆਵਾਜਾਈ ਯਕੀਨੀ ਕਰਨ ਲਈ ਉਨ੍ਹਾਂ ਨੂੰ ਪਟੜੀਆਂ ਤੋਂ ਹਟਾ ਦਿੱਤਾ।
ਇਸ ਬੰਦ ਦਾ ਪੰਜਾਬ ਵਿੱਚ ਵੀ ਚੋਖਾ ਅਸਰ ਦਿਖਾਈ ਦਿੱਤਾ, ਪਰ ਬਾਜ਼ਾਰ ਆਮ ਵਾਂਗ ਖੁੱਲ੍ਹੇ ਰਹੇ। ਸਰਕਾਰੀ ਅਤੇ ਪ੍ਰਾਈਵੇਟ ਬੱਸਾਂ ਕੁਝ ਇਲਾਕਿਆਂ ਵਿੱਚ ਚੱਲੀਆਂ, ਪਰ ਬਾਕੀ ਥਾਂਈਂ ਮੁਲਾਜ਼ਮਾਂ ਦੀ ਹੜਤਾਲ ਦਾ ਅਸਰ ਪਿਆ।