ਟੋਰਾਂਟੋ, 8 ਜਨਵਰੀ (ਪੋਸਟ ਬਿਊਰੋ) : ਪ੍ਰੋਵਿੰਸ ਭਰ ਦੇ ਕਈ ਬੋਰਡਜ਼ ਦੇ ਸਕੂਲ ਅੱਜ ਬੰਦ ਰਹਿਣਗੇ। ਹਾਈ ਸਕੂਲ ਅਧਿਆਪਕਾਂ ਦੀ ਨੁਮਾਇੰਦਗੀ ਕਰਨ ਵਾਲੀ ਯੂਨੀਅਨ ਵੱਲੋਂ ਇੱਕ ਰੋਜ਼ਾ ਹੜਤਾਲ ਰੱਖੀ ਗਈ ਹੈ।
ਓਨਟਾਰੀਓ ਸੈਕੰਡਰੀ ਸਕੂਲ ਟੀਚਰਜ਼ ਫੈਡਰੇਸ਼ਨ ਵੱਲੋਂ ਪ੍ਰੋਵਿੰਸ ਨਾਲ ਗੱਲਬਾਤ ਦੌਰਾਨ ਸਿਲਸਿਲੇਵਾਰ ਹੜਤਾਲ ਪਹਿਲਾਂ ਹੀ ਰੱਖੀ ਗਈ ਹੈ ਤੇ ਉਸ ਦੇ ਮੱਦੇਨਜ਼ਰ ਹੀ ਇਹ ਹੜਤਾਲ ਹੋਣ ਜਾ ਰਹੀ ਹੈ। ਪ੍ਰੈਜ਼ੀਡੈਂਟ ਹਾਰਵੀ ਬਿਸ਼ੌਫ ਦਾ ਕਹਿਣਾ ਹੈ ਕਿ ਉਹ ਉਸ ਸੂਰਤ ਵਿੱਚ ਹੜਤਾਲ ਵਾਪਿਸ ਲੈਣ ਲਈ ਤਿਆਰ ਹਨ ਜੇ ਸਰਕਾਰ ਕਲਾਸਾਂ ਦਾ ਆਕਾਰ ਪਿਛਲੇ ਸਾਲ ਵਾਂਗ ਕਰਨ ਲਈ ਰਾਜ਼ੀ ਹੋ ਜਾਵੇ। ਪਰ ਸਿੱਖਿਆ ਮੰਤਰੀ ਸਟੀਫਨ ਲਿਚੇ ਵੱਲੋਂ ਇਸ ਪੇਸ਼ਕਸ਼ ਨੂੰ ਸਵੀਕਾਰਨ ਤੋਂ ਇਨਕਾਰ ਕਰ ਦਿੱਤਾ ਗਿਆ ਹੈ।
ਅਧਿਆਪਕਾਂ ਨੂੰ ਉਸ ਸਮੇਂ ਗੱੁਸਾ ਆਇਆ ਜਦੋਂ ਸਰਕਾਰ ਨੇ ਐਲਾਨ ਕੀਤਾ ਕਿ ਔਸਤ ਸਕੂਲਾਂ ਵਿੱਚ ਕਲਾਸਾਂ ਦਾ ਆਕਾਰ 22 ਤੋਂ 28 ਤਕ ਵੱਧ ਸਕਦਾ ਹੈ ਤੇ ਗ੍ਰੈਜੂਏਸ਼ਨ ਲਈ ਚਾਰ ਈ-ਲਰਨਿੰਗ ਕੋਰਸ ਲਾਜ਼ਮੀ ਹੋਣਗੇ। ਇਸ ਤੋਂ ਬਾਅਦ ਸਰਕਾਰ ਕਲਾਸਾਂ ਦਾ ਆਕਾਰ 25 ਤੱਕ ਕਰਨ ਤੇ ਦੋ ਈ-ਲਰਨਿੰਗ ਕੋਰਸ ਲਾਜ਼ਮੀ ਕਰਨ ਲਈ ਰਾਜ਼ੀ ਹੋ ਚੁੱਕੀ ਹੈ ਪਰ ਯੂਨੀਅਨ ਦਾ ਕਹਿਣਾ ਹੈ ਕਿ ਇਹ ਕਾਫੀ ਨਹੀਂ ਹੈ।
ਲਿਚੇ ਵੱਲੋਂ ਵਾਰੀ ਵਾਰੀ ਇਹ ਆਖਿਆ ਜਾ ਚੱੁਕਿਆ ਹੈ ਕਿ ਯੂਨੀਅਨ ਭੱਤਿਆਂ ਵਿੱਚ ਦੋ ਫੀ ਸਦੀ ਦਾ ਵਾਧਾ ਲੈਣ ਲਈ ਅੜੀ ਕਰ ਰਹੀ ਹੈ ਜਦਕਿ ਸਰਕਾਰ ਇੱਕ ਫੀ ਸਦੀ ਵਾਧਾ ਹੀ ਕਰ ਸਕਦੀ ਹੈ। ਬੁੱਧਵਾਰ ਨੂੰ ਹੋਣ ਵਾਲੀ ਇਸ ਹੜਤਾਲ ਵਿੱਚ ਅੱਠ ਸਕੂਲ ਬੋਰਡ ਹਿੱਸਾ ਲੈਣਗੇ ਤੇ ਇਸ ਦੌਰਾਨ ਐਲੀਮੈਂਟਰੀ ਤੇ ਹਾਈ ਸਕੂਲ ਬੰਦ ਰਹਿਣਗੇ ਤੇ ਤਿੰਨ ਬੋਰਡਜ਼ : ਅਲਗੋਮਾ ਡਿਸਟ੍ਰਿਕਟ ਸਕੂਲ ਬੋਰਡ, ਗ੍ਰੇਟਰ ਐਸੈਕਸ ਕਾਊਂਟੀ ਡਿਸਟ੍ਰਿਕਟ ਸਕੂਲ ਬੋਰਡ ਤੇ ਏਵਨ ਮੇਟਲੈਂਡ ਡਿਸਟ੍ਰਿਕਟ ਸਕੂਲ ਬੋਰਡਜ਼ ਦੇ ਮੈਂਬਰ ਵੀ ਇਸ ਵਿੱਚ ਹਿੱਸਾ ਲੈਣਗੇ।
ਪੀਲ ਡਿਸਟ੍ਰਿਕਟ ਸਕੂਲ ਬੋਰਡ, ਦ ਡਿਸਟ੍ਰਿਕਟ ਸਕੂਲ ਬੋਰਡ ਆਫ ਨਾਇਗਰਾ, ਲਾਈਮਸਟੋਨ ਡਿਸਟ੍ਰਿਕਟ ਬੋਰਡ ਅਤੇ ਰੈਨਫ੍ਰਿਊ ਕੰਟਰੀ ਡਿਸਟ੍ਰਿਕਟ ਸਕੂਲ ਬੋਰਡ ਦੇ ਹਾਈ ਸਕੂਲ ਰਹਿਣਗੇ ਬੰਦ।