ਟੋਰਾਂਟੋ, 23 ਅਕਤੂਬਰ (ਪੋਸਟ ਬਿਊਰੋ) : ਗ੍ਰੇਟਰ ਟੋਰਾਂਟੋ ਏਰੀਆ ਵਿੱਚ ਲੱਗਭਗ ਨੌਂ ਹਜ਼ਾਰ ਪੋਸਟਲ ਵਰਕਰਜ਼ ਹੜਤਾਲ ਉੱਤੇ ਚਲੇ ਗਏ ਹਨ।
ਅੱਜ ਸਥਾਨਕ ਸਮੇਂ ਅਨੁਸਾਰ ਤੜ੍ਹਕੇ 12:01 ਵਜੇ ਪੋਸਟਲ ਕਰਮਚਾਰੀ ਹੜਤਾਲ ਉੱਤੇ ਗਏ। ਇਹ ਪੋਸਟਲ ਵਰਕਰ ਆਪਣੀਆਂ ਮੰਗਾਂ ਮਨਵਾਉਣ ਲਈ ਰੋਟੇਟਿੰਗ ਹੜਤਾਲ ਉੱਤੇ ਹਨ। ਕੱਲ੍ਹ ਇਹ ਪੋਸਟਲ ਕਰਮਚਾਰੀ ਵਿਕਟੋਰੀਆ, ਐਡਮੰਟਨ, ਵਿੰਡਸਰ ਤੇ ਹੈਲੀਫੈਕਸ ਵਿੱਚ ਹੜਤਾਲ ਉੱਤੇ ਸਨ। ਕੈਨੇਡਾ ਪੋਸਟ ਦਾ ਕਹਿਣਾ ਹੈ ਕਿ ਦੇਸ਼ ਭਰ ਦੇ ਲੋਕਾਂ ਨੂੰ ਪਾਰਸਲ ਤੇ ਹੋਰ ਡਾਕ ਹਾਸਲ ਕਰਨ ਵਿੱਚ ਦੇਰ ਹੋ ਸਕਦੀ ਹੈ ਕਿਉਂਕਿ ਟੋਰਾਂਟੋ ਅਹਿਮ ਪੋਸਟਲ ਹੱਬ ਹੈ।
ਇਸ ਦੌਰਾਨ ਨਿੱਕੇ ਕਾਰੋਬਾਰਾਂ ਵੱਲੋਂ ਇਸ ਰੋਟੇਟਿੰਗ ਹੜਤਾਲ ਨੂੰ ਜਲਦ ਤੋਂ ਜਲਦ ਖਤਮ ਕਰਨ ਦੀ ਮੰਗ ਕੀਤੀ ਗਈ ਹੈ ਤਾਂ ਕਿ ਉਨ੍ਹਾਂ ਦੇ ਕੰਮ ਦਾ ਹਰਜਾ ਨਾ ਹੋਵੇ। ਅਜਿਹੇ ਕਾਰੋਬਾਰੀਆਂ ਨੂੰ ਡਰ ਹੈ ਕਿ ਜੇ ਹੜਤਾਲ ਲੰਮੀ ਚੱਲੀ ਤਾਂ ਅਜਿਹੇ ਵਿੱਚ ਛੁੱਟੀਆਂ ਤੇ ਸ਼ਾਪਿੰਗ ਸੀਜ਼ਨ ਤੋਂ ਪਹਿਲਾਂ ਵਾਲੇ ਰੁਝੇਵਿਆਂ ਭਰੇ ਸੀਜ਼ਨ ਵਿੱਚ ਉਨ੍ਹਾਂ ਨੂੰ ਭਾਰੀ ਨੁਕਸਾਨ ਹੋ ਸਕਦਾ ਹੈ। ਕੈਨੇਡੀਅਨ ਫੈਡਰੇਸ਼ਨ ਆਫ ਇੰਡੀਪੈਂਡੈਂਟ ਬਿਜ਼ਨਸ ਵੱਲੋਂ ਵੀ ਪੋਸਟ ਆਫਿਸ ਨੂੰ ਇਹ ਬੇਨਤੀ ਕੀਤੀ ਗਈ ਹੈ ਕਿ ਕੀਮਤਾਂ ਘਟਾਉਣ ਲਈ ਖਰਚੇ ਨੂੰ ਠੱਲ੍ਹ ਪਾਈ ਜਾਵੇ ਤੇ ਪੋਸਟਲ ਕਰਮਚਾਰੀਆਂ ਨੂੰ ਵੀ ਇਹ ਚੇਤਾਵਨੀ ਦਿੱਤੀ ਗਈ ਹੈ ਕਿ ਇਸ ਤਰ੍ਹਾਂ ਦੀ ਲਗਾਤਾਰ ਰਹਿਣ ਵਾਲੀ ਹੜਤਾਲ ਨਾਲ ਉਨ੍ਹਾਂ ਨੂੰ ਵੀ ਨੁਕਸਾਨ ਹੋਵੇਗਾ ਤੇ ਉਨ੍ਹਾਂ ਦੇ ਇੰਪਲਾਇਰ ਨੂੰ ਵੀ ਨੁਕਸਾਨ ਹੋਵੇਗਾ।
ਸੀਐਫਆਈਬੀ ਦੇ ਪ੍ਰੈਜ਼ੀਡੈਂਟ ਡੈਨ ਕੈਲੀ ਦਾ ਕਹਿਣਾ ਹੈ ਕਿ ਭਾਵੇਂ ਆਮ ਹੜਤਾਲ ਨਾਲੋਂ ਰੋਟੇਟਿੰਗ ਹੜਤਾਲ ਘੱਟ ਨੁਕਸਾਨਦੇਹ ਹੈ ਪਰ ਇਸ ਨਾਲ ਵੀ ਨਿੱਕੀਆਂ ਫਰਮਾਂ ਨੂੰ ਵੱਡਾ ਨੁਕਸਾਨ ਹੋ ਸਕਦਾ ਹੈ।