ਓਟਵਾ, 7 ਜਨਵਰੀ (ਪੋਸਟ ਬਿਊਰੋ) : ਪਿਏਰੇ ਪੌਇਲੀਵਰ ਤੇ ਐਰਿਨ ਓਟੂਲੇ ਦੋਵੇਂ ਹੀ ਕੰਜ਼ਰਵੇਟਿਵ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣਗੇ। ਪੋਇਲੀਵਰ 2004 ਤੋਂ ਹੀ ਓਨਟਾਰੀਓ ਵਿੱਚ ਮੈਂਬਰ ਪਾਰਲੀਆਮੈਂਟ ਹਨ ਤੇ ਇਸ ਸਮੇਂ ਉਹ ਕੰਜ਼ਰਵੇਟਿਵ ਪਾਰਟੀ ਦੇ ਫਾਇਨਾਂਸ ਕ੍ਰਿਟਿਕ ਵੀ ਹਨ। ਓਟੂਲੇ, ਜਿਹੜੇ 2017 ਵਿੱਚ ਇੱਕ ਵਾਰੀ ਪਹਿਲਾਂ ਵੀ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣ ਦੀ ਅਸਫਲ ਕੋਸਿ਼ਸ਼ ਕਰ ਚੁੱਕੇ ਹਨ, 2012 ਤੋਂ ਚੁਣੇ ਗਏ ਹਨ। 12 ਦਸੰਬਰ ਨੂੰ ਐਂਡਰਿਊ ਸ਼ੀਅਰ ਵੱਲੋਂ ਪਾਰਟੀ ਆਗੂ ਵਜੋਂ ਅਸਤੀਫਾ ਦਿਤੇ ਜਾਣ ਤੋਂ ਬਾਅਦ ਤੋਂ ਹੀ ਪੋਇਲੀਵਰ ਤੇ ਓਟੂਲੇ ਦੇ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣਦੀਆਂ ਕਿਆਸਅਰਾਈਆਂ ਸ਼ੁਰੂ ਹੋ ਗਈਆਂ ਸਨ।
ਸ਼ੀਅਰ ਦੇ ਅਸਤੀਫੇ ਤੋਂ ਚਾਰ ਦਿਨ ਬਾਅਦ ਪੱਤਰਕਾਰਾਂ ਵੱਲੋਂ ਇਸ ਸਬੰਧ ਵਿੱਚ ਪੱੁਛੇ ਜਾਣ ਉੱਤੇ ਪੋਇਲੀਵਰ ਨੇ ਆਖਿਆ ਸੀ ਕਿ ਐਨੀ ਜਲਦੀ ਕੁੱਝ ਆਖਣਾ ਜਲਦਬਾਜ਼ੀ ਵਾਲੀ ਗੱਲ ਹੋਵੇਗੀ। ਆਉਣ ਵਾਲੇ ਸਮੇਂ ਵਿੱਚ ਕਈ ਲੋਕ ਇਸ ਦਾਅਵੇਦਾਰੀ ਵਿੱਚ ਹਿੱਸਾ ਲੈਣਗੇ। ਸਾਨੂੰ ਕਿਸੇ ਅਜਿਹੇ ਸ਼ਖਸ ਦੀ ਲੋੜ ਹੈ ਜਿਹੜਾ ਸਾਡੇ ਲਈ ਖੜ੍ਹਾ ਹੋਵੇ, ਤਕੜਾ ਸੰਘਰਸ਼ ਕਰੇ ਤੇ ਜਿੱਤੇ। ਦੂਜੇ ਪਾਸੇ ਓਟੂਲੇ ਹੁਣੇ ਤੋਂ ਹੀ ਆਪਣੀ ਟੀਮ ਤਿਆਰ ਕਰ ਰਹੇ ਹਨ ਤੇ ਵਾਲੰਟੀਅਰਜ਼ ਨਾਲ ਰਲ ਕੇ ਅਗਲੀ ਯੋਜਨਾਬੰਦੀ ਵਿੱਚ ਰੱੁਝ ਗਏ ਹਨ। ਇਹ ਜਾਣਕਾਰੀ ਸੂਤਰਾਂ ਨੇ ਦਿਤੀ।
ਸਟੀਫਨ ਹਾਰਪਰ ਦੇ ਮੰਤਰੀ ਮੰਡਲ ਵਿੱਚ ਮੈਂਬਰ ਵਜੋਂ ਪਹਿਲਾਂ ਕਈ ਤਰ੍ਹਾਂ ਦੇ ਜਿ਼ੰਮੇਵਾਰੀ ਵਾਲੇ ਅਹੁਦੇ ਸਾਂਭ ਚੁਕੇ ਜੌਹਨ ਬੇਅਰਡ ਪੋਇਲੀਵਰ ਦੀ ਕੈਂਪੇਨ ਚਲਾਉਣਗੇ। ਲੀਜ਼ਾ ਰਾਇਤ, ਜੋ ਕਿ ਲੀਡਰਸਿ਼ਪ ਰੇਸ ਆਰਗੇਨਾਈਜਿ਼ੰਗ ਕਮੇਟੀ ਦੀ ਕੋ ਚੇਅਰ ਹੈ, ਅਨੁਸਾਰ ਜਿਹੜੇ ਉਮੀਦਵਾਰ ਇਸ ਦੌੜ ਵਿੱਚ ਕਿਸਮਤ ਅਜ਼ਮਾਉਣੀ ਚਾਹੁੰਦੇ ਹਨ ਉਨ੍ਹਾਂ ਕੋਲ ਇਸ ਸਬੰਧ ਵਿੱਚ ਫੈਸਲਾ ਕਰਨ ਲਈ ਜਨਵਰੀ ਦੇ ਮੱਧ ਤੱਕ ਦਾ ਹੀ ਸਮਾਂ ਹੈ। ਕੰਜ਼ਰਵੇਟਿਵ ਪਾਰਟੀ 27 ਜੂਨ ਨੂੰ ਆਪਣਾ ਆਗੂ ਚੁਣੇਗੀ।