ਪੰਜਾਬੀ ਤੇ ਹਿੰਦੀ ਸਿਨੇਮਾ ਵਿੱਚ ਲਗਾਤਾਰ ਕੰਮ ਕਰਨ ਵਾਲੇ ਅਭਿਨੇਤਾ ਜਿਮੀ ਸ਼ੇਰਗਿਲ ਦੋਵਾਂ ਹੀ ਇੰਡਸਟਰੀਜ਼ ਵਿੱਚ ਸੰਤੁਲਨ ਬਣਾ ਕੇ ਚੱਲ ਰਹੇ ਹਨ। ਇਸ ਸਾਲ ਉਨ੍ਹਾਂ ਦੀਆਂ ‘ਦੇ ਦੇ ਪਿਆਰ ਦੇ’, ‘ਫੈਮਿਲੀ ਆਫ ਠਾਕੁਰਗੰਜ’, ‘ਝੂਠਾ ਕਹੀਂ ਕਾ’, ‘ਜਜਮੈਂਟਲ ਹੈ ਕਯਾ’ ਵਰਗੀਆਂ ਫਿਲਮਾਂ ਰਿਲੀਜ਼ ਹੋਈਆਂ ਹਨ। ਜਿਮੀ ਨੇ ‘ਰੰਗਬਾਜ਼ ਫਿਰ ਸੇ’ ਸ਼ੋਅ ਨਾਲ ਡਿਜੀਟਲ ਪਲੇਟਫਾਰਮ 'ਤੇ ਵੀ ਕਦਮ ਰੱਖ ਲਿਆ ਹੈ। ਉਸ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੀਆਂ ਫਿਲਮਾਂ ਦਾ ਮੇਲਾ ਲੱਗਾ ਹੀ ਰਹਿੰਦਾ ਹੈ। ਉਹ ਕੁਝ ਫਿਲਮਾਂ ਦੋਸਤਾਂ ਲਈ ਕਰਦੇ ਹਨ। ਕੁਝ ਛੋਟੀਆਂ ਫਿਲਮਾਂ ਹੁੰਦੀਆਂ ਹਨ, ਜਿਸ ਵਿੱਚ ਨਿਰਮਾਤਾ ਪਹਿਲਾਂ ਹੀ ਕਹਿ ਦਿੰਦੇ ਹਨ ਕਿ ਪੈਸੇ ਜ਼ਿਆਦਾ ਨਹੀਂ ਦੇ ਸਕਣਗੇ।
ਜਿਮੀ ਦੱਸਦੇ ਹਨ ਕਿ ਜੇ ਸਕ੍ਰਿਪਟ ਚੰਗੀ ਨਹੀਂ ਲੱਗਦੀ ਤਾਂ ਨਾਂਹ ਕਹਿ ਦਿੰਦੇ ਹਨ। ਚੰਗੀ ਲੱਗ ਜਾਂਦੀ ਹੈ ਤਾਂ ਇਸ ਆਸ ਵਿੱਚ ਹਾਂ ਕਰ ਦਿੰਦੇ ਹਨ ਕਿ ਕੋਈ ਨਾ ਕੋਈ ਉਸ ਫਿਲਮ ਨੂੰ ਖਰੀਦ ਕੇ ਰਿਲੀਜ਼ ਕਰ ਦੇਵੇਗਾ। ਜਿਮੀ ਦੱਸਦੇ ਹਨ ਕਿ ਕਈ ਵਾਰ ਫਿਲਮ ਸ਼ੂਟਿੰਗ ਵਿੱਚ ਹੀ ਉਨ੍ਹਾਂ ਨੂੰ ਨਿਰਮਾਤਾਵਾਂ ਦੇ ਇਰਾਦੇ ਦਾ ਪਤਾ ਲੱਗ ਜਾਂਦਾ ਹੈ। ਇਸ ਦੇ ਬਾਵਜੂਦ ਉਹ ਫਿਲਮ ਅੱਧ ਵਿਚਾਲੇ ਨਹੀਂ ਛੱਡਦੇ। ਆਪਣਾ ਕੰਮ ਤਸੱਲੀ ਨਾਲ ਕਰਦੇ ਹਨ। ਜਿਮੀ ਕਹਿੰਦੇ ਹਨ, ‘‘ਫਿਲਮ ਚੱਲੇ ਨਾ ਚੱਲੇ, ਪਰ ਜੇ ਤੁਸੀਂ ਆਪਣਾ ਕੰਮ ਚੰਗੀ ਤਰ੍ਹਾਂ ਕੀਤਾ ਹੈ ਤਾਂ ਪੂਰੀ ਫਿਲਮ ਇੱਕ ਪਾਸੇ ਅਤੇ ਤੁਹਾਡਾ ਸੀਨ ਇੱਕ ਪਾਸੇ ਹੋ ਜਾਂਦਾ ਹੈ। ਫਿਲਮ ਚੱਲੇਗੀ ਜਾਂ ਨਹੀਂ, ਇਹ ਸੋਚ ਕੇ ਚੰਗੇ ਕਿਰਦਾਰ ਛੱਡਣ ਵਿੱਚ ਯਕੀਨ ਨਹੀਂ ਰੱਖਦਾ ਹਾਂ।”