ਅਭਿਨੇਤਾ ਅਲੀ ਫਜ਼ਲ ਇਨ੍ਹੀਂ ਦਿਨੀਂ ਕਾਫੀ ਬਿਜ਼ੀ ਹਨ। ਹਿੰਦੀ ਸਿਨੇਮਾ ਨਾਲ ਹਾਲੀਵੁੱਡ ਵਿੱਚ ਵੀ ਉਹ ਲਗਾਤਾਰ ਕੰਮ ਕਰ ਰਹੇ ਹਨ। ਇਸ ਦੌਰਾਨ ਅਲੀ ਕੁਝ ਅਜਿਹਾ ਕੰਮ ਕਰਨ ਵਾਲੇ ਹਨ, ਜੋ ਉਨ੍ਹਾਂ ਦੇ ਦਿਲ ਦੇ ਕਰੀਬ ਹੈ। ਜੇ ਅਲੀ ਦੇ ਸੋਸ਼ਲ ਮੀਡੀਆ ਪੇਜ਼ ਨੂੰ ਧਿਆਨ ਨਾਲ ਦੇਖਿਆ ਜਾਏ ਤਾਂ ਉਹ ਅਕਸਰ ਮੀਰ ਨਾਂਅ ਤੋਂ ਕਵਿਤਾਵਾਂ ਸਾਂਝੀਆਂ ਕਰਦੇ ਰਹਿੰਦੇ ਹਨ। ਦਰਅਸਲ ਇਹ ਮੀਰ ਹੋਰ ਕੋਈ ਨਹੀਂ, ਬਲਕਿ ਅਲੀ ਫਜ਼ਲ ਹੀ ਹਨ। ਇਸ ਨਾਂਅ ਦੇ ਨਾਲ ਉਹ ਆਪਣੇ ਅੰਦਰ ਦੇ ਕਵੀ ਨੂੰ ਬਾਹਰ ਲੈ ਕੇ ਆਉਂਦੇ ਹਨ। ਲਖਨਊ ਨਾਲ ਸੰਬੰਧ ਰੱਖਦੇ ਅਲੀ ਦੇ ਘਰ ਦਾ ਮਾਹੌਲ ਅਜਿਹਾ ਰਿਹਾ ਹੈ, ਜਿੱਥੇ ਪਰਵਾਰ ਦੇ ਲੋਕਾਂ ਨੂੰ ਕਵਿਤਾਵਾਂ ਅਤੇ ਗਜ਼ਲਾਂ ਦੀ ਬਰੀਕੀ ਦਾ ਪਤਾ ਹੈ।
ਕਈ ਹਿੰਦੀ ਅਤੇ ਉਰਦੂ ਕਵੀਆਂ ਦੇ ਪ੍ਰਸ਼ੰਸਕ ਅਲੀ ਪ੍ਰਾਪੰਰਿਕ ਕਵਿਤਾਵਾਂ ਲਿਖਣ ਤੇ ਉਨ੍ਹਾਂ ਦੀ ਤੁਕਬੰਦੀ ਕਰਨ ਵਿੱਚ ਯਕੀਨ ਨਹੀਂ ਰੱਖਦੇ। ਉਹ ਆਪਣੀਆਂ ਕਵਿਤਾਵਾਂ ਦੀ ਲੈਅ ਖੁਦ ਬਣਾਉਂਦੇ ਹਨ। ਅਲੀ ਦਾ ਕਹਿਣਾ ਹੈ ਕਿ ਨਿੱਜੀ ਤੌਰ 'ਤੇ ਉਸ ਨੂੰ ਲਿਖਣਾ ਹਮੇਸ਼ਾ ਤੋਂ ਪਸੰਦ ਰਿਹਾ ਹੈ। ਜਦ ਉਹ ਥਕ ਜਾਣ ਤਾਂ ਕਵਿਤਾਵਾਂ ਲਿਖ ਕੇ ਤਰੋਤਾਜ਼ਾ ਮਹਿਸੂਸ ਕਰਦੇ ਹਨ। ਅਲੀ ਦੱਸਦੇ ਹਨ ਕਿ ਉਨ੍ਹਾਂ ਨੂੰ ਅਹਿਸਾਸ ਵੀ ਨਹੀਂ ਹੋਇਆ ਕਿ ਕਦੋਂ ਉਹ ਆਪਣੀਆਂ ਲਾਈਨਾਂ ਲਿਖਣ ਲੱਗ ਗਏ। ਉਨ੍ਹਾਂ ਦੇ ਮੁਤਾਬਕ ਇਹ ਪ੍ਰਕਿਰਿਆ ਬਹੁਤ ਸਹਿਜ ਰਹੀ ਹੈ। ਉਹ ਆਸ ਕਰਦੇ ਹਨ ਕਿ ਜ਼ਿਆਦਾ ਤੋਂ ਜ਼ਿਆਦਾ ਲੋਕ ਆਪਣੇ ਵਿਚਾਰ ਸੋਸ਼ਲ ਮੀਡੀਆ 'ਤੇ ਉਨ੍ਹਾਂ ਦੇ ਨਾਲ ਸਾਂਝਾ ਕਰਨਗੇ। ਕਰੀਬੀ ਸੂਤਰਾਂ ਮੁਤਾਬਕ ਅਜੇ ਤੱਕ ਅਲੀ ਨੇ ਇਹ ਤੈਅ ਨਹੀਂ ਕੀਤਾ ਕਿ ਉਹ ਕਵੀਆਂ ਨੂੰ ਬੜਾਵਾ ਦੇਣ ਲਈ ਮੰਚ ਕਦੋਂ ਸ਼ੁਰੂ ਕਰਨਗੇ। ਹਾਲੇ ਉਹ ਆਪਣੇ ਸੋਸ਼ਲ ਮੀਡੀਆ ਦਾ ਇਸਤੇਮਾਲ ਨਵੇਂ ਕਵੀਆਂ ਦੇ ਕੰਮ ਦੇਖਣ ਅਤੇ ਉਨ੍ਹਾਂ ਨੂੰ ਉਤਸ਼ਾਹਤ ਕਰਨ ਦੇ ਲਈ ਕਰਨਗੇ।