ਟੋਰਾਂਟੋ, 6 ਜਨਵਰੀ (ਪੋਸਟ ਬਿਊਰੋ) : ਗਲੋਬਲ ਅਸਥਿਰਤਾ ਤੇ ਟਰੇਡ ਤਣਾਅ ਦੇ ਬਾਵਜੂਦ ਇਸ ਸਾਲ ਕੈਨੇਡਾ ਵਿੱਚ ਮੰਦਵਾੜੇ ਦੀ ਕੋਈ ਸੰਭਾਵਨਾ ਨਹੀਂ ਹੈ। ਇਹ ਖੁਲਾਸਾ ਸਕੋਸ਼ੀਆਬੈਂਕ ਦੇ ਉੱਘੇ ਅਰਥਸ਼ਾਸਤਰੀ ਵੱਲੋਂ ਕੀਤਾ ਗਿਆ ਹੈ। ਉਨ੍ਹਾਂ ਵੱਲੋਂ ਇਹ ਵੀ ਆਖਿਆ ਗਿਆ ਹੈ ਕਿ ਵਿਕਾਸ ਦਰ ਮੱਠੀ ਰਹਿ ਸਕਦੀ ਹੈ।
ਸਕੋਸ਼ੀਆਬੈਂਕ ਦੇ ਵਾਈਸ ਪ੍ਰੈਜ਼ੀਡੈਂਟ ਤੇ ਡਿਪਟੀ ਚੀਫ ਇਕਨੌਮਿਸਟ ਬ੍ਰੈਟ ਹਾਊਸ ਦਾ ਕਹਿਣਾ ਹੈ ਕਿ ਗਲੋਬਲ ਟਰੇਡ ਨੂੰ ਲੈ ਕੇ ਪੈਦਾ ਹੋਈ ਪਰੇਸ਼ਾਨੀ, ਬ੍ਰੈਗਜਿ਼ਟ ਦਾ ਭਵਿੱਖ ਤੇ ਇਸ ਸਾਲ ਦੇ ਅੰਤ ਵਿੱਚ ਹੋਣ ਜਾ ਰਹੀਆਂ ਅਮਰੀਕੀ ਚੋਣਾਂ ਵਰਗੇ ਕਾਰਨ ਗਲੋਬਲ ਅਰਥਚਾਰੇ ਉੱਤੇ ਪ੍ਰਭਾਵ ਪਾਉਣਗੇੇ। ਹਾਲਾਂਕਿ ਅਮਰੀਕਾ ਤੇ ਚੀਨ ਦਰਮਿਆਨ ਟਰੇਡ ਦੇ ਸਬੰਧ ਵਿੱਚ ਸ਼ੁਰੂ ਹੋਈ ਗੱਲਬਾਤ ਇਸ ਤਰ੍ਹਾਂ ਦੀ ਅਸਥਿਰਤਾ ਨੂੰ ਘਟਾ ਸਕਦੀ ਹੈ।
ਬ੍ਰੈਟ ਨੇ ਆਖਿਆ ਕਿ 2020 ਵਿਚ ਕੈਨੇਡੀਅਨ ਅਰਥਚਾਰੇ ਦੀ ਮੱਠੀ ਰਫਤਾਰ ਰਹਿਣ ਕਾਰਨ ਕਈ ਤਰ੍ਹਾਂ ਦੇ ਕਿਆਫੇ ਲਾਏ ਜਾ ਰਹੇ ਹਨ। ਪਰ ਦੂਜੇ ਪਾਸੇ ਮੰਦਵਾੜਾ ਆਉਣ ਦੀ ਦੂਰ ਤੱਕ ਕੋਈ ਸੰਭਾਵਨਾ ਨਹੀਂ ਹੈ। ਭਾਵੇਂ ਹਾਲ ਦੀ ਘੜੀ ਕਾਫੀ ਅਸਥਿਰਤਾ ਬਣੀ ਹੋਈ ਹੈ ਪਰ ਸਾਡੀ ਮੌਲਿਕ ਤਾਕਤ ਕਾਰਨ ਵਿਕਾਸ ਦਰ ਆਪਣੇ ਢਰੇ ਉੱਤੇ ਚਲਦੀ ਰਹੇਗੀ।
ਜਿ਼ਕਰਯੋਗ ਹੈ ਕਿ ਅਕਤੂਬਰ ਵਿੱਚ ਆਪਣੀ ਮੌਨੇਟਰੀ ਪਾਲਿਸੀ ਰਿਪੋਰਟ ਵਿੱਚ ਬੈਂਕ ਆਫ ਕੈਨੇਡਾ ਨੇ ਇਹ ਆਖਿਆ ਸੀ ਕਿ ਸਿਹਤਮੰਦ ਲੇਬਰ ਮਾਰਕਿਟ ਤੇ ਹਾਊਸਿੰਗ ਸੈਕਟਰ ਵਿੱਚ ਹੋਣ ਵਾਲੀ ਕਮਾਈ ਕਾਰਨ 2019 ਵਿੱਚ ਕੈਨੇਡੀਅਨ ਅਰਥਚਾਰਾ ਆਪਣੀ ਦਰਮਿਆਨੀ ਤੋਰੇ ਤੁਰਦਾ ਰਹੇਗਾ। ਇਸ ਤੋਂ ਇਲਾਵਾ ਸੈਂਟਰਲ ਬੈਂਕ ਵੱਲੋਂ ਵੀ ਆਪਣੀਆਂ ਵਿਆਜ਼ ਦਰਾਂ ਵਿੱਚ ਪਿਛਲੇ ਇੱਕ ਸਾਲ ਤੋਂ ਕੋਈ ਵਾਧਾ ਨਹੀਂ ਕੀਤਾ ਗਿਆ ਹੈ ਤੇ ਇਨ੍ਹਾਂ ਨੂੰ 1.75 ਫੀ ਸਦੀ ਹੀ ਰਹਿਣ ਦਿੱਤਾ ਗਿਆ ਹੈ। ਹੋਰਨਾਂ ਦੇਸ਼ਾਂ ਨੇ ਆਪਣੀ ਮੌਨੇਟਰੀ ਨੀਤੀ ਨੂੰ ਨਰਮ ਕਰਦਿਆਂ ਹੋਇਆਂ ਗਲੋਬਲ ਅਰਥਚਾਰੇ ਵਿੱਚ ਆਈ ਨਰਮੀ ਕਾਰਨ ਆਪਣੀਆਂ ਵਿਆਜ਼ ਦਰਾਂ ਘਟਾ ਦਿੱਤੀਆਂ ਗਈਆਂ। ਕੈਨੇਡਾ ਵਿੱਚ ਬੇਰੋਜ਼ਗਾਰੀ ਦਰ 5.9 ਫੀ ਸਦੀ ਹੈ।
ਸਕੋਸ਼ੀਆ ਬੈਂਕ ਦੇ ਬ੍ਰੈਟ ਅਨੁਸਾਰ ਇਸ ਸਾਲ ਵੀ ਹਾਊਸਿੰਗ ਮਾਰਕਿਟ ਮਜ਼ਬੂਤ ਰਹਿਣ ਦੀ ਉਮੀਦ ਹੈ। ਟੋਰਾਂਟੋ ਤੇ ਵੈਨਕੂਵਰ ਵਿੱਚ ਹਾਊਸਿੰਗ ਮਾਰਕਿਟ ਦੀ ਚੜ੍ਹਤ ਬਰਕਰਾਰ ਰਹਿਣ ਦੀ ਸੰਭਾਵਨਾ ਹੈ। ਉਨ੍ਹਾਂ ਆਖਿਆ ਕਿ ਦੇਸ਼ ਦੇ ਹੋਰਨਾਂ ਹਿੱਸਿਆਂ ਨਾਲੋਂ ਅਲਬਰਟਾ ਦੀ ਹਾਊਸਿੰਗ ਮਾਰਕਿਟ ਉੱਥੇ ਤੇਲ ਦੀਆਂ ਕੀਮਤਾਂ ਵਿੱਚ ਕਈ ਸਾਲ ਪਹਿਲਾਂ ਆਈ ਗਿਰਾਵਟ ਕਾਰਨ ਅਜੇ ਤੱਕ ਸੰਘਰਸ਼ ਕਰ ਰਹੀ ਹੈ। ਕਾਨਫਰੰਸ ਬੋਰਡ ਆਫ ਕੈਨੇਡਾ ਵਲੋਂ ਦਸੰਬਰ ਵਿੱਚ ਕੀਤੀ ਗਈ ਪੇਸ਼ੀਨਿਗੋਈ ਵਿੱਚ ਆਖਿਆ ਗਿਆ ਸੀ ਕਿ 2020 ਵਿੱਚ ਕੈਨੇਡਾ ਦਾ ਅਰਥਚਾਰਾ 1.8 ਫੀ ਸਦੀ ਨਾਲ ਵਿਕਾਸ ਕਰੇਗਾ ਜੋ ਕਿ ਪਿਛਲੇ ਸਾਲ ਦੇ 1.7 ਫੀ ਸਦੀ ਦੇ ਮੁਕਾਬਲੇ ਜਿ਼ਆਦਾ ਹੋਵੇਗਾ। ਬਿਜ਼ਨਸ ਡਿਵੈਲਪਮੈਂਟ ਬੈਂਕ ਆਫ ਕੈਨੇਡਾ ਅਨੁਸਾਰ ਖੇਤਰੀ ਪੱਧਰ ਉੱਤੇ ਬ੍ਰਿਟਿਸ਼ ਕੋਲੰਬੀਆ ਤੇ ਕਿਊਬਿਕ ਵਿੱਚ ਆਰਥਿਕ ਵਿਕਾਸ ਦਰ ਮਜ਼ਬੂਤ ਰਹੇਗੀ। ਜਿ਼ਕਰਯੋਗ ਹੈ ਕਿ ਵਰਲਡ ਇਕਨੌਮਿਕ ਲੀਗ ਟੇਬਲ ਨੇ 2019 ਵਿੱਚ ਕੈਨੇਡਾ ਨੂੰ ਦੁਨੀਆਂ ਦਾ 10ਵਾਂ ਸੱਭ ਤੋਂ ਵੱਡਾ ਅਰਥਚਾਰਾ ਐਲਾਨਿਆ ਸੀ।