ਓਟਵਾ, 6 ਜਨਵਰੀ (ਪੋਸਟ ਬਿਊਰੋ) : ਕੈਨੇਡਾ ਦੇ ਰੱਖਿਆ ਮੰਤਰੀ ਹਰਜੀਤ ਸੱਜਣ ਨੇ ਇਹ ਸਪਸ਼ਟ ਕਰ ਦਿੱਤਾ ਹੈ ਕਿ ਅਮਰੀਕਾ ਵੱਲੋਂ ਬਗਦਾਦ ਉੱਤੇ ਕੀਤੇ ਗਏ ਹਵਾਈ ਹਮਲੇ ਬਾਰੇ ਕੈਨੇਡਾ ਨੂੰ ਕੋਈ ਜਾਣਕਾਰੀ ਮੁਹੱਈਆ ਨਹੀਂ ਸੀ ਕਰਵਾਈ ਗਈ ਜਦਕਿ ਹਕੀਕਤ ਇਹ ਵੀ ਹੈ ਕਿ ਕੈਨੇਡਾ ਦੀਆਂ ਫੌਜੀ ਟੁਕੜੀਆਂ ਵੀ ਇਸ ਖਿੱਤੇ ਵਿੱਚ ਮੌਜੂਦ ਸਨ। ਜਿ਼ਕਰਯੋਗ ਹੈ ਕਿ ਅਮਰੀਕਾ ਵੱਲੋਂ ਬਗਦਾਦ ਉੱਤੇ ਕੀਤੇ ਗਏ ਹਵਾਈ ਹਮਲੇ ਵਿੱਚ ਇਰਾਨੀ ਜਨਰਲ ਕਾਸਿਮ ਸੁਲੇਮਾਨੀ ਦੀ ਮੌਤ ਹੋ ਗਈ ਸੀ।
ਸੋਮਵਾਰ ਨੂੰ ਇੱਕ ਇੰਟਰਵਿਊ ਵਿੱਚ ਸੱਜਣ ਨੇ ਆਖਿਆ ਕਿ ਕੈਨੇਡਾ ਦੇ ਕਰਮਚਾਰੀਆਂ ਨੂੰ ਜਿਹੋ ਜਿਹੀਆਂ ਧਮਕੀਆਂ ਦਿੱਤੀਆਂ ਜਾ ਰਹੀਆਂ ਹਨ ਉਨ੍ਹਾਂ ਤੋਂ ਅਸੀਂ ਜਾਣੂ ਸੀ। ਉਨ੍ਹਾਂ ਆਖਿਆ ਕਿ ਅਮਰੀਕਾ ਨੇ ਇਹ ਸੰਕੇਤ ਵੀ ਦਿੱਤਾ ਸੀ ਕਿ ਉਹ ਕਾਰਵਾਈ ਕਰੇਗਾ। ਪਰ ਸੱਜਣ ਨੇ ਆਖਿਆ ਕਿ ਜੋ ਕੁਝ ਹੋਇਆ ਉਸ ਬਾਰੇ ਸਾਨੂੰ ਪੂਰੀ ਜਾਣਕਾਰੀ ਨਹੀਂ ਸੀ। ਜੂਨ 2019 ਨੂੰ ਜਾਰੀ ਕੀਤੀ ਗਈ ਇਕ ਪ੍ਰੈਸ ਰਲੀਜ਼ ਅਨੁਸਾਰ ਕੈਨੇਡਾ ਇਸ ਸਮੇਂ ਇਰਾਕ ਵਿੱਚ ਇਕ ਨਾਟੋ ਮਿਸ਼ਨ ਦੀ ਅਗਵਾਈ ਕਰ ਰਿਹਾ ਹੈ। ਇਹ ਮਿਸ਼ਨ ਇਰਾਕੀ ਡਿਫੈਂਸ ਤੇ ਸਕਿਊਰਿਟੀ ਸੰਸਥਾਵਾਂ ਦੇ ਠੋਸ ਨਿਰਮਾਣ ਲਈ ਚਲਾਇਆ ਗਿਆ ਹੈ।
ਇਸ ਰਲੀਜ਼ ਵਿੱਚ ਆਖਿਆ ਗਿਆ ਕਿ ਕੈਨੇਡੀਅਨ ਹਥਿਆਰਬੰਦ ਸੈਨਾਵਾਂ ਦੇ 250 ਮੈਂਬਰ ਇਸ ਮਿਸ਼ਨ ਦਾ ਹਿੱਸਾ ਹਨ। ਇਸ ਤੋਂ ਇਲਾਵਾ ਇਹ ਫੌਜੀ ਟੁਕੜੀਆਂ ਦਾਇਸ਼ (ਆਈਐਸਆਈਐਸ) ਨਾਲ ਨਜਿੱਠਣ ਲਈ ਮਿਸ਼ਨ ਆਪਰੇਸ਼ਨ ਇੰਪੈਕਟ ਦੇ ਹਿੱਸੇ ਵਜੋਂ ਇਰਾਕ, ਜੌਰਡਨ ਤੇ ਲੈਬਨਾਨ ਵਿੱਚ ਫੈਲੀਆਂ ਹੋਈਆਂ ਹਨ। ਇਸ ਖਿੱਤੇ ਵਿੱਚ ਮੌਜੂਦਗੀ ਦੇ ਬਾਵਜੂਦ ਜਿਸ ਹਮਲੇ ਵਿੱਚ ਸੁਲੇਮਾਨੀ ਦੀ ਮੌਤ ਹੋਈ ਉਸ ਬਾਰੇ ਕੈਨੇਡਾ ਨੂੰ ਪੂਰੀ ਜਾਣਕਾਰੀ ਨਹੀਂ ਸੀ ਦਿੱਤੀ ਗਈ।
ਅਫਗਾਨਿਸਤਾਨ ਵਿੱਚ ਨਾਟੋ ਮਿਸ਼ਨ ਦੀ ਅਗਵਾਈ ਕਰਨ ਵਾਲੇ ਸੇਵਾਮੁਕਤ ਮੇਜਰ ਜਨਰਲ ਡੇਵਿਡ ਫਰੇਜ਼ਰ ਨੇ ਆਖਿਆ ਕਿ ਇਸ ਹਮਲੇ ਦੇ ਸਬੰਧ ਵਿੱਚ ਉਨ੍ਹਾਂ ਦੀ ਸੱਭ ਤੋਂ ਵੱਡੀ ਚਿੰਤਾ ਇਹ ਹੈ ਕਿ ਇਸ ਹਮਲੇ ਤੋਂ ਪਹਿਲਾਂ ਕੈਨੇਡਾ ਨੂੰ ਨਾ ਤਾਂ ਇਸ ਬਾਰੇ ਜਾਣਕਾਰੀ ਦਿੱਤੀ ਗਈ ਤੇ ਨਾ ਹੀ ਉਸ ਤੋਂ ਇਸ ਬਾਰੇ ਕੋਈ ਸਲਾਹ ਲਈ ਗਈ। ਇਸ ਕਰਕੇ ਖਿੱਤੇ ਵਿੱਚ ਸਾਡਾ ਨਾਟੋ ਮਿਸ਼ਨ ਸਸਪੈਂਡ ਹੋ ਗਿਆ ਹੈ ਤੇ ਕੈਨੇਡੀਅਨਾਂ ਦੀ ਅਗਵਾਈ ਵਿੱਚ ਇਸ ਇਲਾਕੇ ਵਿੱਚ ਮੌਜੂਦ ਨਾਟੋ ਦੀਆਂ ਟੁਕੜੀਆਂ ਲਈ ਵੱਖਰਾ ਖਤਰਾ ਖੜ੍ਹਾ ਹੋ ਗਿਆ ਹੈ।
ਅਜੇ ਸੱਜਣ ਨੇ ਇਸ ਗੱਲ ਦੀ ਪੁਸ਼ਟੀ ਨਹੀਂ ਕੀਤੀ ਹੈ ਕਿ ਕੈਨੇਡੀਅਨ ਫੌਜੀ ਟੁਕੜੀਆਂ ਇਸ ਖਿੱਤੇ ਨੂੰ ਛੱਡ ਦੇਣਗੀਆਂ। ਇੱਥੇ ਦੱਸਣਾ ਬਣਦਾ ਹੈ ਕਿ ਇਰਾਕੀ ਪਾਰਲੀਆਮੈਂਟ ਵੱਲੋਂ ਅਮਰੀਕੀ ਫੌਜੀ ਟੁਕੜੀਆਂ ਨੂੰ ਦੇਸ਼ ਤੋਂ ਬਾਹਰ ਕਰਨ ਦੇ ਮਤੇ ਉੱਤੇ ਸਹਿਮਤੀ ਦਿਤੀ ਗਈ ਹੈ। ਸੱਜਣ ਨੇ ਆਖਿਆ ਕਿ ਸਾਡੀ ਮੱੁਖ ਤਰਜੀਹ ਉਹੀ ਕਰਦੇ ਰਹਿਣਾ ਹੈ ਜੋ ਅਸੀਂ ਉੱਥੇ ਕਰ ਰਹੇ ਸੀ। ਪਰ ਸਾਨੂੰ ਇਹ ਵੀ ਧਿਆਨ ਰੱਖਣਾ ਹੋਵੇਗਾ ਕਿ ਹਕੀਕਤ ਕੀ ਹੈ। ਉਨ੍ਹਾਂ ਅੱਗੇ ਆਖਿਆ ਕਿ ਇਸ ਸਾਰੀ ਸਥਿਤੀ ਦਾ ਮੁਲਾਂਕਣ ਕੀਤਾ ਜਾਵੇਗਾ। ਜਿ਼ਕਰਯੋਗ ਹੈ ਕਿ ਸੱਜਣ ਵੱਲੋਂ ਕੈਨੇਡਾ ਦੇ ਭਾਈਵਾਲਾਂ ਉੱਤੇ ਹੋ ਰਹੇ ਹਮਲੇ ਖਿਲਾਫ ਕੀਤੀ ਗਈ ਇਸ ਤਰ੍ਹਾਂ ਦੀ ਕਾਰਵਾਈ ਦਾ ਸਮਰਥਨ ਕੀਤਾ ਜਾ ਰਿਹਾ ਹੈ ਜਦਕਿ ਕੈਨੇਡੀਅਨ ਸਰਕਾਰ ਵੱਲੋਂ ਅਜੇ ਤਕ ਇਹ ਨਹੀਂ ਆਖਿਆ ਗਿਆ ਕਿ ਸੁਲੇਮਾਨੀ ਨੂੰ ਮਾਰਨ ਲਈ ਅਮਰੀਕਾ ਵੱਲੋਂ ਚੁਕੇ ਇਸ ਕਦਮ ਦਾ ਉਹ ਸਮਰਥਨ ਕਰਦੀ ਹੈ।
ਸੱਜਣ ਨੇ ਆਖਿਆ ਕਿ ਜਿਹੜੀ ਗਲ ਉਨ੍ਹਾਂ ਨੂੰ ਅਖਰ ਰਹੀ ਹੈ ਉਹ ਇਹ ਕਿ ਭਾਈਵਾਲੀ ਵਿੱਚ ਕੰਮ ਕਰਦੇ ਸਮੇਂ ਸਾਨੂੰ ਇਹ ਯਕੀਨੀ ਬਣਾਉਣਾ ਚਾਹੀਦਾ ਹੈ ਕਿ ਅਸੀਂ ਆਪਣੇ ਸਾਥੀਆਂ ਨੂੰ ਸਪਸ਼ਟ ਸੁਨੇਹਾ ਦੇਈਏ ਤੇ ਉਨ੍ਹਾਂ ਨੂੰ ਨਾਲ ਲੈ ਕੇ ਚੱਲੀਏ। ਉਨ੍ਹਾਂ ਆਖਿਆ ਕਿ ਇਸ ਮਾਮਲੇ ਵਿੱਚ ਅੱਗੇ ਕਿਵੇਂ ਵਧਣਾ ਹੈ ਇਸ ਬਾਰੇ ਕੈਨੇਡਾ ਸਾਰੀ ਜਾਣਕਾਰੀ ਇਕੱਠੀ ਕਰ ਰਿਹਾ ਹੈ। ਇਸ ਤੋਂ ਇਲਾਵਾ ਅਜੇ ਇਹ ਫੈਸਲਾ ਵੀ ਲਿਆ ਜਾਣਾ ਹੈ ਕਿ ਉੱਥੇ ਕਿਸੇ ਕਿਸਮ ਦੇ ਮਿਸ਼ਨ ਨੂੰ ਜਾਰੀ ਰੱਖਣਾ ਹੈ ਜਾਂ ਨਹੀਂ।