ਟੋਰਾਂਟੋ ਪੋਸਟ ਬਿਉਰੋ: ਜੋਹਨ ਟੋਰੀ ਨੇ ਟੋਰਾਂਟੋ ਸਿਟੀ ਦਾ ਦੁਬਾਰਾ ਮੇਅਰ ਚੁਣੇ ਜਾਣ ਦਾ ਮਾਣ ਹਾਸਲ ਕੀਤਾ ਹੈ। ਉਸਨੇ ਆਪਣੀ ਨੇੜਲੀ ਵਿਰੋਧੀ ਜੈਨੀਫਰ ਕੀਸਮਾਟ ਨੂੰ ਵੱਡੇ ਅੰਤਰ ਨਾਲ ਹਰਾਇਆ ਹੈ। ਜੌਹਨ ਟੋਰੀ ਨੂੰ ਕੁੱਲ ਭੁਗਤੀਆਂ ਵੋਟਾਂ ਦਾ 63.5% ਵੋਟਾਂ ਹਾਸਲ ਹੋਈਆਂ ਜਦੋਂ ਕਿ ਕੀਸਮਾਟ ਨੂੰ ਸਿਰਫ਼ 23.5% ਵੋਟਾਂ ਮਿਲੀਆਂ। ਕਈ ਹੋਰ ਉਮੀਦਵਾਰ ਵੀ ਮੈਦਾਨ ਵਿੱਚ ਸਨ ਜਿਹਨਾਂ ਨੂੰ ਕੁੱਲ ਮਿਲਾ ਕੇ 3.5% ਤੋਂ ਵੀ ਘੱਟ ਵੋਟਾਂ ਮਿਲੀਆਂ ਹਨ। ਸੱਜੇ ਪੱਖੀ ਉਮੀਦਵਾਰ ਫੇਥ ਗੋਲਡੀ ਮਹਿਜ਼ 3.4% ਵੋਟਾਂ ਹੀ ਹਾਸਲ ਕਰ ਸਕੀ ਹੈ। ਚੇਤੇ ਰਹੇ ਕਿ 47 ਮੈਂਬਰੀ ਕਾਉਂਸਲ ਨੂੰ ਪ੍ਰੀਮੀਅਰ ਡੱਗ ਫੋਰਡ ਵੱਲੋਂ ਘਟਾ ਕੇ 25 ਮੈਂਬਰੀ ਬਣਾ ਦਿੱਤਾ ਸੀ ਜਿਸ ਕਾਰਣ ਕਈ ਮੌਜੂਦਾ ਕਾਉਂਸਲਰ ਆਪੋ ਆਪਣੇ ਘਰਾਂ ਨੂੰ ਤੁਰ ਗਏ ਹਨ। ਈਟੋਬੀਕੋ ਨੌਰਥ ਤੋਂ ਡੱਗ ਫੋਰਡ ਦਾ ਚਚੇਰਾ ਭਰਾ ਮਾਈਕਲ ਫੋਰਡ ਸਿਟੀ ਕਾਉਂਸਲਰ ਚੁਣਿਆ ਗਿਆ ਹੈ। ਆਖਰੀ ਖਬਰਾਂ ਮਿਲਣ ਤੱਕ ਵਾਰਡ ਨੰਬਰ 7 ਤੋਂ ਚਰਚਿਤ ਸਿਟੀ ਕਾਉਂਸਲਰ ਜੀਓਰਜੀਓ ਮੈਮੋਲਿਟੀ ਦੇ ਹਾਰ ਜਾਣ ਦੀਆਂ ਸੰਭਾਵਨਾਵਾਂ ਬਣੀਆਂ ਹੋਈਆਂ ਸਨ।