ਓਟਵਾ, 17 ਦਸੰਬਰ (ਪੋਸਟ ਬਿਊਰੋ) : ਸਾਬਕਾ ਅੰਤਰਿਮ ਕੰਜ਼ਰਵੇਟਿਵ ਆਗੂ ਰੋਨਾ ਐਂਬਰੋਜ਼ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣ ਦਾ ਮਨ ਬਣਾ ਰਹੀ ਹੈ। ਇਹ ਜਾਣਕਾਰੀ ਇੱਕ ਭਰੋਸੇਯੋਗ ਸੂਤਰ ਵੱਲੋਂ ਦਿੱਤੀ ਗਈ।
ਇੱਕ ਈਮੇਲ ਵਿੱਚ ਇਸ ਸਰੋਤ ਨੇ ਦੱਸਿਆ ਕਿ ਪ੍ਰਾਈਵੇਟ ਸੈਕਟਰ ਵਿੱਚ ਕੰਮ ਕਰਨ ਤੋਂ ਬਾਅਦ ਹੁਣ ਐਂਬਰੋਜ਼ ਇਸ ਮੁੱਦੇ ਉੱਤੇ ਵਿਚਾਰ ਵਟਾਂਦਰਾ ਕਰ ਰਹੀ ਹੈ। ਉਨ੍ਹਾਂ ਆਖਿਆ ਕਿ ਉਹ ਆਪਣੀ ਸਿਹਤ, ਆਜ਼ਾਦੀ, ਪਰਿਵਾਰ ਨੂੰ ਦਿੱਤੇ ਜਾਣ ਵਾਲੇ ਸਮੇਂ ਤੇ ਪ੍ਰਾਈਵੇਸੀ ਬਾਰੇ ਵੀ ਸੋਚ ਵਿਚਾਰ ਕਰ ਰਹੀ ਹੈ। ਸੂਤਰ ਨੇ ਇਹ ਵੀ ਆਖਿਆ ਕਿ ਉਸ ਨੇ ਕਦੇ ਵੀ ਸਿਆਸਤ ਵਿੱਚ ਮੁੜਨ ਬਾਰੇ ਨਹੀਂ ਸੀ ਸੋਚਿਆ।
ਕੰਜ਼ਰਵੇਟਿਵ ਪਾਰਟੀ ਦੇ ਕਈ ਧੁਰੰਦਰ ਖਿਡਾਰੀਆਂ ਵੱਲੋਂ ਇਹ ਆਖੇ ਜਾਣ ਕਿ ਐਂਬਰੋਜ਼ ਨੂੰ ਇਸ ਅਹੁਦੇ ਲਈ ਖੜ੍ਹੇ ਹੁੰਦਾ ਵੇਖਣ ਵਿੱਚ ਉਨ੍ਹਾਂ ਨੂੰ ਖੁਸ਼ੀ ਹੋਵੇਗੀ, ਤੋਂ ਬਾਅਦ ਹੀ ਐਂਬਰੋਜ਼ ਇਸ ਗੱਲ ਤੋਂ ਇਨਕਾਰ ਨਹੀਂ ਕਰ ਰਹੀ ਹੈ। ਅਲਬਰਟਾ ਦੇ ਪ੍ਰੀਮੀਅਰ ਜੇਸਨ ਕੇਨੀ ਨੇ ਕੈਲਗਰੀ ਹੇਰਾਲਡ ਦੇ ਡੌਨ ਬ੍ਰੇਡ ਨੂੰ ਆਖਿਆ ਕਿ ਜਿੱਥੇ ਲੀਡਰਸਿ਼ਪ ਦਾ ਮੁੱਦਾ ਆਉਂਦਾ ਹੈ ਤਾਂ ਰੋਨਾ ਉਨ੍ਹਾਂ ਦੀ ਪਹਿਲੀ ਪਸੰਦ ਹੋਵੇਗੀ।
2015 ਵਿੱਚ ਜਦੋਂ ਸਟੀਫਨ ਹਾਰਪਰ ਨੇ ਪ੍ਰਧਾਨ ਮੰਤਰੀ ਵਜੋਂ ਆਪਣਾ ਅਹੁਦਾ ਛੱਡਿਆ ਸੀ ਤਾਂ ਐਂਬਰੋਜ਼ ਕੰਜ਼ਰਵੇਟਿਵਾਂ ਦੀ ਅੰਤਰਿਮ ਆਗੂ ਬਣੀ ਸੀ। ਰੋਨਾ ਨੂੰ ਸਸਕੈਚਵਨ ਦੇ ਪ੍ਰੀਮੀਅਰ ਬ੍ਰੈਡ ਵਾਲ ਤੇ ਨਿਊ ਬਰੰਜ਼ਵਿੱਕ ਦੇ ਪ੍ਰੀਮੀਅਰ ਬਲੇਨ ਹਿੱਗਜ਼ ਵੱਲੋਂ ਸਮਰਥਨ ਦਿੱਤੇ ਜਾਣ ਦੀ ਵੀ ਪੂਰੀ ਸੰਭਾਵਨਾ ਹੈ। ਰੋਨਾ ਤੋਂ ਇਲਾਵਾ ਹਾਈ ਪ੍ਰੋਫਾਈਲ ਟੋਰੀਜ਼ ਜਿਵੇਂ ਕਿ ਪਿਏਰੇ ਪੋਇਲਿਵਰ, ਮਾਈਕਲ ਰੈਂਪਲ ਗਾਰਨਰ ਤੇ ਕੈਂਡਿਸ ਬਰਜਨ ਨੇ ਵੀ ਇਸ ਦੌੜ ਵਿੱਚ ਹਿੱਸਾ ਲੈਣ ਤੋਂ ਇਨਕਾਰ ਨਹੀਂ ਕੀਤਾ ਹੈ।
ਟੋਰੀ ਲੀਡਰਸਿ਼ਪ ਦੌੜ ਵਿੱਚ ਅਸਫਲ ਰਹਿ ਚੁੱਕੇ ਉਮੀਦਵਾਰ ਮਾਈਕਲ ਚੌਂਗ ਤੇ ਐਰਿਨ ਓਟੂਲੇ ਤੋਂ ਇਲਾਵਾ ਕਿਊਬਿਕ ਤੋਂ ਉੱਘੇ ਕੰਜ਼ਰਵੇਟਿਵ ਆਗੂ ਗੇਰਾਰਡ ਡੈਲਟੈਲ ਵੀ ਉਨ੍ਹਾਂ ਉਮੀਦਵਾਰਾਂ ਵਿੱਚ ਸ਼ਾਮਲ ਹਨ ਜਿਨ੍ਹਾਂ ਦੇ ਨਾਂ ਇਸ ਵਾਰੀ ਵੀ ਸਾਹਮਣੇ ਆ ਰਹੇ ਹਨ। ਪਰ ਅਜੇ ਤੱਕ ਕਿਸੇ ਨੇ ਵੀ ਰਸਮੀ ਤੌਰ ਉੱਤੇ ਇਸ ਲੀਡਰਸਿ਼ਪ ਦੌੜ ਵਿੱਚ ਹਿੱਸਾ ਲੈਣ ਦੀ ਪੁਸ਼ਟੀ ਨਹੀਂ ਕੀਤੀ ਹੈ। ਸਿਰਫ ਇੱਕ ਗੈਰ ਚੁਣੇ ਹੋਏ ਕੰਜ਼ਰਵੇਟਿਵ ਆਰਗੇਨਾਈਜ਼ਰ ਨੇ ਇਸ ਗੱਲ ਦੀ ਪੁਸ਼ਟੀ ਕੀਤੀ ਹੈ ਕਿ ਉਹ ਇਸ ਦੌੜ ਵਿੱਚ ਹਿੱਸਾ ਲੈਣ ਦੀ ਯੋਜਨਾ ਬਣਾ ਰਹੇ ਹਨ ਤੇ ਉਹ ਹਨ ਮੈਕਸੀਜ਼ ਸਟਾਫਿੰਗ ਐਂਡ ਕੰਸਲਟਿੰਗ ਦੇ ਸੀਈਓ ਤੇ ਲੰਮੇਂ ਸਮੇਂ ਤੋਂ ਸਿਆਸੀ ਆਰਗੇਨਾਈਜ਼ਰ ਰਹੇ ਬ੍ਰਾਇਨ ਬਰੂਲੌਟੇ।