ਓਟਵਾ, 16 ਦਸੰਬਰ (ਪੋਸਟ ਬਿਊਰੋ) : ਸੀਬੀਸੀ ਵੱਲੋਂ ਜਾਰੀ ਕੀਤੀ ਗਈ ਰਿਪੋਰਟ, ਜਿਸ ਦਾ ਸਿਰਲੇਖ ਸੀ-ਨੋ ਫਲਾਇ ਲਿਸਟ ਸਬੰਧੀ ਦਸ ਸਾਲ ਬਾਅਦ ਟਰਾਂਸਪੋਰਟ ਕੈਨੇਡਾ ਨੇ ਜਾਂਚਿਆਂ ਨਸਲੀ ਗਾਣਾ, ਤੋਂ ਬਾਅਦ ਵਰਲਡ ਸਿੱਖ ਆਰਗੇਨਾਈਜੇ਼ਸ਼ਨ (ਡਬਲਿਊਐਸਓ) ਨੇ ਟਰਾਂਸਪੋਰਟ ਮੰਤਰੀ ਮਾਰਕ ਗਾਰਨਿਊ ਨੂੰ ਚਿੱਠੀ ਲਿਖ ਕੇ ਉਸ ਗੱਲ ਉੱਤੇ ਚਿੰਤਾ ਪ੍ਰਗਟਾਈ ਹੈ, ਜਿਸ ਤਰ੍ਹਾਂ ਇਸ ਮੁੱਦੇ ਨਾਲ ਨਜਿੱਠਿਆ ਗਿਆ ਹੈ।
ਇਸ ਰਿਪੋਰਟ ਮੁਤਾਬਕ ਅਜੇ ਪਿਛਲੇ ਸਾਲ ਟਰਾਂਸਪਰੋਟ ਕੈਨੇਡਾ ਦੇ ਇੱਕ ਅਧਿਕਾਰੀ ਨੇ ਇਸ ਮਸਲੇ ਵਿੱਚ ਝਾਤੀ ਮਾਰਨ ਦੀ ਕੋਸਿ਼ਸ਼ ਕੀਤੀ ਜਿਹੜਾ ਨਸਲੀ ਵਿਤਕਰੇ ਦੇ ਸਬੰਧ ਵਿੱਚ ਅਸਲ ਵਿੱਚ 2008 ਵਿੱਚ ਸਾਂਝਾ ਕੀਤਾ ਗਿਆ ਸੀ। ਇਸ ਨਾਲ ਟਰਾਂਸਪੋਰਟ ਕੈਨੇਡਾ ਦੇ ਨੋ ਫਲਾਇ ਲਿਸਟ ਪ੍ਰੋਗਰਾਮ ਦੀ ਕਮਜ਼ੋਰੀ ਸਾਫ ਝਲਕਦੀ ਹੈ। ਉਸ ਸਮੇਂ ਟਰਾਂਸਪੋਰਟ ਕੈਨੇਡਾ ਨੂੰ ਭੇਜੀ ਗਈ ਈਮੇਲ ਵਿੱਚ ਉਸ ਗਾਣੇ ਦੇ ਬੋਲ ਸਾਂਝੇ ਕੀਤੇ ਗਏ ਸਨ ਜਿਹੜਾ ਸਰਾਸਰ ਵਿਤਕਰੇ ਭਰਿਆ ਸੀ। ਇਸ ਦੇ ਬੋਲ ਸਨ-“ਮੇਰੀ ਫਲਾਈਟ ਉੱਤੇ ਅਜਿਹੇ ਅਜਨਬੀ ਹਨ, ਜਿਨ੍ਹਾਂ ਨੇ ਪੱਗਾਂ ਬੰਨ੍ਹੀਆਂ ਹੋਈਆਂ ਹਨ, ਉਹ ਪਲੇਨ ਨੂੰ ਹਾਈਜੈਕ ਕਰਨ ਦੀ ਕੋਸਿ਼ਸ਼ ਕਰ ਰਹੇ ਲੱਗਦੇ ਹਨ, ਉਨ੍ਹਾਂ ਦੇ ਹੱਥਾਂ ਵਿੱਚ ਕੀ ਹੈ? ਇਹ ਤਾਂ ਬੌਕਸ ਕੱਟਰਜ਼ ਵਰਗਾ ਕੁੱਝ ਲੱਗਦਾ ਹੈ, ਉਹ ਦੋ ਅਜਿਹੇ ਵਿਅਕਤੀ ਹਨ ਜਿਨ੍ਹਾਂ ਵਿੱਚੋਂ ਮੁਸ਼ਕ ਆਉਂਦੀ ਹੈ, ਉਹ ਅਜੀਬ ਗੱਲਬਾਤ ਕਰ ਰਹੇ ਹਨ, ਇੱਕ ਪਲ ਵਿੱਚ ਹੀ ਮੈਂ ਬੇਸਬਾਲ ਬੈਟ ਫੜ੍ਹ ਲਿਆ ਹੈ, ਤੇ ਜੇ ਉਨ੍ਹਾਂ ਲੜਨ ਦੀ ਕੋਸਿ਼ਸ਼ ਕੀਤੀ ਤੇ ਸਾਡੇ ਨਾਲ ਪੰਗਾ ਲਿਆ ਤਾਂ ਮੈਂ ਜੋਅ ਲੂਈਸ ਵਾਂਗ ਉਨ੍ਹਾਂ ਦੇ ਮੂੰਹ ਤੋੜ ਦਿਆਂਗਾ ਤੇ ਉਨ੍ਹਾਂ ਹਰਾਮੀਆਂ ਨੂੰ ਚੰਦ ਉੱਤੇ ਪਹੁੰਚਾ ਦੇਵਾਂਗਾ।”
ਸੀਬੀਸੀ ਦੀ ਰਿਪੋਰਟ ਅਨੁਸਾਰ, ਇਸ ਈਮੇਲ ਦੇ ਆਥਰ ਮਾਰਕ ਹੇਅਨਜ਼, ਨੂੰ ਆਪਣੇ ਅਜਿਹੇ ਕਾਰੇ ਲਈ ਕਿਸੇ ਵੀ ਤਰ੍ਹਾਂ ਦੀ ਅਨੁਸ਼ਾਸਕੀ ਮਾਪਦੰਡਾਂ ਦਾ ਸਾਹਮਣਾ ਨਹੀਂ ਕਰਨਾ ਪਿਆ। ਟਰਾਂਸਪੋਰਟ ਮੰਤਰੀ ਗਾਰਨਿਊ ਨੂੰ ਡਬਲਿਊਐਸਓ ਦੇ ਪ੍ਰਧਾਨ ਤੇਜਿੰਦਰ ਸਿੰਘ ਸਿੱਧੂ ਨੇ ਆਖਿਆ ਕਿ ਇਸ ਮਾਮਲੇ ਦੀ ਜਾਂਚ ਕਰਵਾਉਣ ਲਈ ਟਰਾਂਸਪੋਰਟ ਕੈਨੇਡਾ ਨੂੰ ਇੱਕ ਦਹਾਕੇ ਦਾ ਸਮਾਂ ਲੱਗ ਗਿਆ ਤੇ ਅੱਜ ਤੱਕ ਆਥਰ ਖਿਲਾਫ ਕੋਈ ਵੀ ਅਨੁਸ਼ਾਸਕੀ ਕਾਰਵਾਈ ਨਹੀਂ ਕੀਤੀ ਗਈ ਹੈ। ਇਹ ਗਾਣਾ ਪੱਗਾਂ ਧਾਰਨ ਕਰਨ ਵਾਲਿਆਂ ਲਈ ਉਸ ਆਥਰ ਦੀਆਂ ਗਲਤ ਭਾਵਨਾਂਵਾਂ ਨੂੰ ਦਰਸਾਉਂਦਾ ਹੈ ਤੇ ਉਨ੍ਹਾਂ ਖਿਲਾਫ ਪੱਖਪਾਤ ਤੇ ਹਿੰਸਾ ਨੂੰ ਜਾਇਜ ਠਹਿਰਾਉਂਦਾ ਹੈ।
ਟਰਾਂਸਪੋਰਟ ਕੈਨੇਡਾ ਦਾ ਫਰਜ਼ ਹੈ ਕਿ ਉਹ ਸਾਰੇ ਕੈਨੇਡੀਅਨਾਂ ਦੀ ਸਕਿਊਰਿਟੀ ਦਾ ਧਿਆਨ ਰੱਖੇ। ਇਹ ਬਹੁਤ ਹੀ ਹੌਲਨਾਕ ਹੈ ਕਿ ਇਸ ਤਰ੍ਹਾਂ ਦੇ ਨਸਲੀ ਸੁਨੇਹਿਆਂ ਵੱਲ ਕੋਈ ਤਵੱਜੋ ਨਹੀਂ ਦਿੱਤੀ ਜਾ ਰਹੀ ਤੇ ਇਨ੍ਹਾਂ ਨੂੰ ਬਰਦਾਸ਼ਤ ਕੀਤਾ ਜਾ ਰਿਹਾ ਹੈ। ਉਨ੍ਹਾਂ ਆਖਿਆ ਕਿ ਸਾਨੂੰ ਡਰ ਹੈ ਕਿ ਇਸ ਤਰ੍ਹਾਂ ਦੀ ਈਮੇਲ ਉੱਤੇ ਕੋਈ ਕਾਰਵਾਈ ਨਾ ਕੀਤਾ ਜਾਣਾ ਟਰਾਂਸਪੋਰਟ ਕੈਨੇਡਾ ਅੰਦਰ ਨਸਲਵਾਦ ਤੇ ਪੱਖਪਾਤ ਨੂੰ ਸਵੀਕਾਰਨ ਦੇ ਰੁਝਾਨ ਵੱਲ ਇਸ਼ਾਰਾ ਕਰਦਾ ਹੈ। ਇਸ ਪਾਸੇ ਕਿਸੇ ਵੀ ਅਧਿਕਾਰੀ ਵੱਲੋਂ ਕੋਈ ਪ੍ਰਤੀਕਿਰਿਆ ਨਾ ਪ੍ਰਗਟਾਇਆ ਜਾਣਾ ਸਾਰੇ ਡਿਪਾਰਟਮੈਂਟ ਪ੍ਰਤੀ ਸਵਾਲ ਤੇ ਸ਼ੱਕ ਪੈਦਾ ਕਰਦਾ ਹੈ। ਅਸੀਂ ਤਾਂ ਇਹੋ ਪੁੱਛਣ ਲਈ ਇਹ ਸੱਭ ਕਰ ਰਹੇ ਹਾਂ ਕਿ ਕੀ ਤੁਹਾਨੂੰ ਪੱਕਾ ਯਕੀਨ ਹੈ ਕਿ ਟਰਾਂਸਪੋਰਟ ਕੈਨੇਡਾ ਅੰਦਰ ਨਸਲਵਾਦ ਨੂੰ ਬਰਦਾਸ਼ਤ ਨਹੀਂ ਕੀਤਾ ਜਾਂਦਾ। ਇਸ ਤੋਂ ਇਲਾਵਾ ਅਸੀਂ ਇਸ ਗੱਲ ਦਾ ਵੀ ਜਵਾਬ ਚਾਹੁੰਦੇ ਹਾਂ ਕਿ ਇਸ ਮਸਲੇ ਨੂੰ ਗੰਭੀਰਤਾ ਨਾਲ ਕਿਉਂ ਨਹੀਂ ਲਿਆ ਗਿਆ ਤੇ ਇਸ ਨੂੰ ਪਹਿਲ ਦੇ ਆਧਾਰ ਉੱਤੇ ਹੱਲ ਕਿਉਂ ਨਹੀਂ ਕੀਤਾ ਗਿਆ?