ਲੰਡਨ, 15 ਦਸੰਬਰ (ਪੋਸਟ ਬਿਊਰੋ)- ਕੈਂਟ ਇਲਾਕੇ ਦੇ ਰੇਹਨਹਮ ਦੀ ਬੈਂਕ ਨੂੰ ਨਕਦੀ ਦੇਣ ਵਾਲੀ ਵੈਨ ਦੇ ਡਰਾਈਵਰ ਪਾਸੋਂ 25000 ਪੌਂਡ ਲੁੱਟਣ ਦੇ ਕੇਸ ਵਿੱਚ ਪੰਜਾਬੀ ਤੇ ਉਸ ਦੇ ਸਾਥੀ ਨੂੰ 10 ਸਾਲ ਕੈਦ ਦੀ ਸਜ਼ਾ ਹੋਈ ਹੈ।
ਮੇਡਨਸਰੋਨ ਕਰਾਊਨ ਕੋਰਟ ਵਿੱਚ ਚੱਲੇ ਕੇਸ ਦੀ ਸੁਣਵਾਈ ਵੇਲੇ ਦੱਸਿਆ ਗਿਆ ਕਿ ਰੇਹਨਹਮ ਦੀ ਨੈੱਟਵਰਕ ਬੈਂਕ ਨੂੰ ਸਕਿਓਰਿਟੀ ਕੰਪਨੀ ਦਾ ਡਰਾਈਵਰ ਜਬਾਰਨ ਗੁਰੰਗ 25 ਸਤੰਬਰ ਨੂੰ ਨਕਦੀ ਦੇਣ ਗਿਆ ਸੀ, ਜਿਸ ਦਾ ਲੁਟੇਰੇ ਪਹਿਲਾਂ ਤੋਂ ਇੰਤਜ਼ਾਰ ਕਰ ਰਹੇ ਸਨ। ਜਦ ਡਰਾਈਵਰ ਨੇ ਨਕਦੀ ਦਾ ਬੈਗ ਵੈਨ ਵਿੱਚੋਂ ਕੱਢਿਆ, ਤਾਂ ਲੁਟੇਰੇ ਉਸ ਤੋਂ ਖੋਹ ਕੇ ਕਾਰ ਵਿੱਚ ਸਵਾਰ ਹੋ ਕੇ ਨਿਕਲ ਗਏ। ਘਟਨਾ ਤੋਂ ਦੋ ਦਿਨ ਬਾਅਦ ਪੁਲਸ ਨੇ 24 ਸਾਲਾ ਜਸਨੀਤ ਸਿੰਘ ਸਿੱਧੂ ਵਾਸੀ ਕਰੋਮਵਲ ਰੋਡ, ਗਰੇਸ਼ ਤੇ 36 ਸਾਲਾ ਰੈਨ ਯੰਗ ਵਾਸੀ ਕੈਂਵਡਿਸ਼ ਐਵੇਨਿਊ ਜਿਲੀਗਮ ਨੂੰ ਗ੍ਰਿਫਤਾਰ ਕਰ ਲਿਆ ਤੇ ਦੋਵਾਂ ਦੇ ਘਰਾਂ ਦੀ ਤਲਾਸ਼ੀ ਤੋਂ ਬਾਅਦ ਰੈਨ ਦੇ ਘਰੋਂ 10 ਹਜ਼ਾਰ ਪੌਂਡ ਤੇ ਸਿੱਧੂ ਪਾਸੋਂ 3000 ਪੌਂਡ ਬਰਾਮਦ ਕੀਤਾ। ਅਦਾਲਤ ਨੇ ਸਿੱਧੂ ਨੂੰ ਪੰਜ ਸਾਲ ਤਿੰਨ ਮਹੀਨੇ ਅਤੇ ਰੈਨ ਯੰਗ ਨੂੰ ਚਾਰ ਸਾਲ ਛੇ ਮਹੀਨੇ ਕੈਦ ਦੀ ਸਜ਼ਾ ਸੁਣਾਈ ਹੈ, ਜਦ ਕਿ ਇਸ ਮਾਮਲੇ ਵਿੱਚ ਇੱਕ ਹੋਰ ਵਿਅਕਤੀ ਨੂੰ ਬਰੀ ਕਰ ਦਿੱਤਾ।