ਓਟਵਾ, 15 ਦਸੰਬਰ (ਪੋਸਟ ਬਿਊਰੋ) : ਰੱਖਿਆ ਮੰਤਰੀ ਹਰਜੀਤ ਸੱਜਣ ਨੇ ਕੈਨੇਡਾ ਦੇ ਉੱਘੇ ਮਿਲਟਰੀ ਆਗੂ ਦੇ ਸਮਰਥਨ ਵਿੱਚ ਆਉਂਦਿਆਂ ਆਖਿਆ ਕਿ ਦੇਸ਼ ਬਹੁਤ ਹੀ ਖੁਸ਼ਕਿਸਮਤ ਹੈ ਕਿ ਕੈਨੇਡੀਅਨ ਹਥਿਆਰਬੰਦ ਸੈਨਾਵਾਂ ਦੀ ਡੋਰ ਜਨਰਲ ਜੌਨਾਥਨ ਵਾਂਸ ਦੇ ਹੱਥ ਹੈ।
ਇਹ ਟਿੱਪਣੀ ਉਦੋਂ ਕੀਤੀ ਗਈ ਜਦੋਂ ਇਹ ਸਵਾਲ ਉਠਾਇਆ ਗਿਆ ਕਿ ਮੁੜ ਨਵੀਂ ਚੁਣੀ ਗਈ ਲਿਬਰਲ ਸਰਕਾਰ ਜਨਰਲ ਵਾਂਸ ਨੂੰ ਬਦਲੀ ਕਰਨ ਦਾ ਇਰਾਦਾ ਰੱਖਦੀ ਹੈ। ਜਿ਼ਕਰਯੋਗ ਹੈ ਕਿ ਵਾਂਸ ਨੂੰ ਸੱਭ ਤੋਂ ਪਹਿਲਾਂ ਸਾਬਕਾ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਵੱਲੋਂ ਚੀਫ ਆਫ ਦ ਡਿਫੈਂਸ ਸਟਾਫ ਨਿਯੁਕਤ ਕੀਤਾ ਗਿਆ ਸੀ ਤੇ ਹੁਣ ਉਹ ਪੰਜਵੇਂ ਸਾਲ ਵੀ ਇਸ ਅਹੁਦੇ ਉੱਤੇ ਬਣੇ ਹੋਏ ਹਨ।
ਪਿਛਲੇ ਹਫਤੇ ਇੱਕ ਇੰਟਰਵਿਊ ਵਿੱਚ ਸੱਜਣ ਨੇ ਆਖਿਆ ਕਿ ਜਦੋਂ ਗੱਲ ਡਿਫੈਂਸ ਸਟਾਫ ਦੇ ਮੁਖੀ ਦੀ ਆਉਂਦੀ ਹੈ ਤਾਂ ਇਸ ਦਾ ਫੈਸਲਾ ਪ੍ਰਧਾਨ ਮੰਤਰੀ ਨੇ ਕਰਨਾ ਹੁੰਦਾ ਹੈ। ਅਸੀਂ ਉਸ ਸਬੰਧ ਵਿੱਚ ਹੀ ਕਾਰਵਾਈ ਕਰਦੇ ਹਾਂ ਤੇ ਉਸ ਦੇ ਹਿਸਾਬ ਨਾਲ ਹੀ ਫੈਸਲਾ ਲੈਂਦੇ ਹਾਂ। ਸੱਜਣ ਨੇ ਅੱਗੇ ਆਖਿਆ ਕਿ ਕੈਨੇਡਾ ਬਹੁਤ ਹੀ ਖੁਸ਼ਕਿਸਮਤ ਹੈ ਕਿ ਬਹੁਤ ਹੀ ਅਹਿਮ ਘੜੀ ਵਿੱਚ ਜਨਰਲ ਵਾਂਸ ਇਸ ਭੂਮਿਕਾ ਵਿੱਚ ਹਨ। ਕੈਨੇਡਾ ਦੇ ਇਤਿਹਾਸ ਵਿੱਚ ਜਨਰਲ ਵਾਂਸ ਸੱਭ ਤੋਂ ਲੰਮਾਂ ਸਮਾਂ ਡਿਫੈਂਸ ਚੀਫ ਵਜੋਂ ਸੇਵਾ ਨਿਭਾਉਣ ਵਾਲੇ ਸ਼ਖਸ ਬਣ ਗਏ ਹਨ। ਉਨ੍ਹਾਂ ਦੇ ਇਸ ਲੰਮੇਂ ਕਾਰਜਕਾਲ ਵਿੱਚ ਕਈ ਅਹਿਮ ਫੈਸਲੇ ਲਏ ਗਏ ਤੇ ਹਥਿਆਰਬੰਦ ਸੇਨਾਵਾਂ ਵਿੱਚ ਵੀ ਕਈ ਤਰ੍ਹਾਂ ਦੀਆਂ ਸਕਾਰਾਤਮਕ ਤੇ ਨਕਾਰਾਤਮਕ ਤਬਦੀਲੀਆਂ ਵੇਖਣ ਨੂੰ ਮਿਲੀਆਂ।
ਇਸ ਦੌਰਾਨ ਨਵੀਂ ਡਿਫੈਂਸ ਪਾਲਿਸੀ ਤਹਿਤ ਇਰਾਕ, ਮਾਲੀ ਤੇ ਲੈਟਵੀਆ ਵਿੱਚ ਫੌਜੀ ਟੁਕੜੀਆਂ ਨੂੰ ਤਾਇਨਾਤ ਕੀਤਾ ਗਿਆ ਤੇ ਇਸ ਦੇ ਨਾਲ ਹੀ ਜਿਨਸੀ ਸੋ਼ਸ਼ਣ ਕਰਨ ਵਾਲਿਆਂ ਖਿਲਾਫ ਆਵਾਜ਼ ਉਠਾਈ ਗਈ ਤੇ ਹੋਰ ਮਹਿਲਾਵਾਂ ਨੂੰ ਭਰਤੀ ਕੀਤੇ ਜਾਣ ਦਾ ਫੈਸਲਾ ਵੀ ਕੀਤਾ ਗਿਆ। ਹਾਲਾਂਕਿ ਇਨ੍ਹਾਂ ਸਾਲਾਂ ਵਿੱਚ ਜਨਰਲ ਵਾਂਸ ਨੂੰ ਵੀ ਆਲੋਚਨਾਂ ਸਹਿਣੀ ਪਈ। 2017 ਵਿੱਚ ਮਾਰਕ ਨੌਰਮਨ ਨੂੰ ਸਸਪੈਂਡ ਕਰਨ ਦਾ ਮੁੱਦਾ ਵੀ ਗਰਮਾਇਆ। ਬਾਅਦ ਵਿੱਚ ਮਾਰਕ ਨੌਰਮਨ, ਜੋ ਕਿ ਰਿਟਾਇਰਡ ਵਾਈਸ ਐਡਮਿਰਲ ਵਜੋਂ ਸੇਵਾ ਮੁਕਤ ਹੋਏ, ਉੱਤੇ ਬ੍ਰੀਚ ਆਫ ਟਰੱਸਟ ਦਾ ਮਾਮਲਾ ਵੀ ਦਰਜ ਹੋਇਆ। ਪਰ ਫਿਰ ਬਾਅਦ ਵਿੱਚ ਇਹ ਮਾਮਲਾ ਰਫਾ ਦਫਾ ਕਰ ਦਿੱਤਾ ਗਿਆ।
ਇਸ ਤੋਂ ਇਲਾਵਾ ਅੰਤਰਿਮ ਲੜਾਕੂ ਜਹਾਜ਼ ਖਰੀਦਣ ਦੀ ਲਿਬਰਲ ਸਰਕਾਰ ਦੀ ਵਿਵਾਦਗ੍ਰਸਤ ਯੋਜਨਾ ਦੇ ਸਮਰਥਨ ਵਿੱਚ ਆਉਣ ਲਈ ਵੀ ਡਿਫੈਂਸ ਚੀਫ ਨੂੰ ਖਰੀਆਂ ਖਰੀਆਂ ਸੁਣਨੀਆਂ ਪਈਆਂ। ਹਾਲਾਂਕਿ ਸੱਜਣ ਨੇ ਇਹ ਨਹੀਂ ਆਖਿਆ ਕਿ ਸਰਕਾਰ ਵਾਂਸ ਨੂੰ ਬਦਲੀ ਕਰਨ ਬਾਰੇ ਵਿਚਾਰ ਕਰ ਰਹੀ ਹੈ ਪਰ ਉਨ੍ਹਾਂ ਆਖਿਆ ਕਿ ਜਨਰਲ ਪਿਛਲੇ ਲੱਗਭਗ ਪੰਜ ਸਾਲਾਂ ਤੋਂ ਕਈ ਅਹਿਮ ਜਿ਼ੰਮੇਵਾਰੀਆਂ ਨਿਭਾਅ ਰਹੇ ਹਨ। ਸੱਜਣ ਨੇ ਆਖਿਆ ਕਿ ਜਨਰਲ ਵਾਂਸ ਜਿਹੋ ਜਿਹੀ ਭੂਮਿਕਾ ਨਿਭਾਅ ਰਹੇ ਹਨ ਉਹ ਉਸ ਤੋਂ ਖੁਸ਼ ਹਨ। ਉਹ ਕੈਨੇਡੀਅਨ ਆਰਮਡ ਫੋਰਸਿਜ਼ ਵਿੱਚ ਇੱਕਮਾਤਰ ਫੋਰ ਸਟਾਰ ਜਨਰਲ ਹਨ।
ਕੈਨੇਡੀਅਨ ਗਲੋਬਲ ਅਫੇਅਰਜ਼ ਇੰਸਟੀਚਿਊਟ ਦੇ ਡਿਫੈਂਸ ਵਿਸ਼ਲੇਸ਼ਕ ਡੇਵਿਡ ਪੈਰੀ ਨੇ ਆਖਿਆ ਕਿ ਵਾਂਸ ਦੇ ਭਵਿੱਖ ਨੂੰ ਲੈ ਕੇ ਕਿਆਫੇ ਲਾਉਣ ਦਾ ਇੱਕੋ ਕਾਰਨ ਹੈ ਉਹ ਇਹ ਕਿ ਉਹ ਲੰਮੇਂ ਸਮੇਂ ਤੋਂ ਇਸ ਅਹੁਦੇ ਉੱਤੇ ਬਣੇ ਹੋਏ ਹਨ। ਇੱਕ ਸਵਾਲ ਇਹ ਵੀ ਹੈ ਕਿ ਉਨ੍ਹਾਂ ਦੀ ਥਾਂ ਹੋਰ ਕੌਣ ਲੈ ਸਕਦਾ ਹੈ?