* ਗਾਂ ਲਈ ਟਰੇਨ ਰੁਕ ਸਕਦੀ ਹੈ ਤਾਂ ਲੋਕਾਂ ਲਈ ਕਿਉਂ ਨਾ ਰੋਕੀ: ਸਿੱਧੂ
ਅੰਮ੍ਰਿਤਸਰ, 21 ਅਕਤੂਬਰ, (ਪੋਸਟ ਬਿਊਰੋ)- ਦਸਹਿਰੇ ਮੌਕੇ ਹੋਏ ਵੱਡੇ ਰੇਲ ਹਾਦਸੇ ਲਈ ਸਾਬਕਾ ਵਿਧਾਇਕਾ ਡਾ. ਨਵਜੋਤ ਕੌਰ ਸਿੱਧੂ ਨੂੰ ਦੋਸ਼ੀ ਠਹਿਰਾਏ ਜਾਣ ਬਾਰੇ ਅੱਜ ਲੋਕਲ ਬਾਡੀਜ਼ ਮੰਤਰੀ ਨਵਜੋਤ ਸਿੰਘ ਸਿੱਧੂ ਨੇ ਕਿਹਾ ਕਿ ਇਸ ਦੇ ਲਈ ਰੇਲ ਵਿਭਾਗ ਜ਼ਿੰਮੇਵਾਰ ਹੈ ਅਤੇ ਉਹ ਆਪਣੀ ਜ਼ਿੰਮੇਵਾਰੀ ਤੋਂ ਭੱਜਣ ਦਾ ਯਤਨ ਕਰ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਸਾਡੇ ਦੇਸ਼ ਵਿੱਚ ਗਾਂ ਵਾਸਤੇ ਟਰੇਨ ਰੁਕ ਜਾਂਦੀ ਹੈ ਤਾਂ ਏਨੇ ਲੋਕਾਂ ਵਾਸਤੇ ਕਿਉਂ ਨਾ ਰੋਕੀ ਗਈ।
ਨਵਜੋਤ ਸਿੰਘ ਸਿੱਧੂ ਨੇ ਅੱਜ ਫਿਰ ਹਸਪਤਾਲ ਦਾ ਦੌਰਾ ਕਰ ਕੇ ਜ਼ਖ਼ਮੀਆਂ ਦੀ ਖ਼ਬਰ ਲਈ। ਇਸ ਮੌਕੇ ਉਨ੍ਹਾਂ ਨੇ ਆਪਣੀ ਪਤਨੀ ਡਾ. ਨਵਜੋਤ ਕੌਰ ਸਿੱਧੂ ਦਾ ਬਚਾਅ ਕਰਦੇ ਹੋਏ ਉਨ੍ਹਾਂ ਨੂੰ ਬੇਕਸੂਰ ਦੱਸਿਆ। ਉਨ੍ਹਾ ਕਿਹਾ ਕਿ ਇਸ ਕੇਸ ਨੂੰ ਸਿਆਸੀ ਰੰਗ ਦੇਣ ਦਾ ਯਤਨ ਕੀਤਾ ਗਿਆ ਹੈ। ਸਿੱਧੂ ਨੇ ਕਿਹਾ ਕਿ ਜਦੋਂ ਹਾਦਸਾ ਰੇਲਵੇ ਦੀ ਸੰਪਤੀ ਉੱਤੇ ਹੋਇਆ ਹੈ ਤਾਂ ਰੇਲ ਮੁਲਾਜ਼ਮਾਂ ਦੀ ਗਲਤੀ ਅਣਡਿੱਠ ਨਹੀਂ ਕੀਤੀ ਜਾ ਸਕਦੀ। ਉਨ੍ਹਾਂ ਕਿਹਾ ਕਿ ਜਿੱਥੋਂ ਤਕ ਦਸਹਿਰਾ ਮੇਲੇ ਦੇ ਪ੍ਰਬੰਧਾਂ ਦਾ ਮਾਮਲਾ ਹੈ, ਉਨ੍ਹਾਂ ਨੇ ਇਸ ਮੈਦਾਨ ਦੀ ਵਰਤੋਂ ਦੀ ਪ੍ਰਵਾਨਗੀ ਲਈ ਸੀ। ਰੇਲ ਪਟੜੀਆਂ ਦੀ ਸੁਰੱਖਿਆ ਦੀ ਜ਼ਿੰਮੇਵਾਰੀ ਜੀ ਆਰ ਪੀ ਕੋਲ ਹੈ, ਜਿਸ ਨੂੰ ਅਣਗੌਲੇ ਕੀਤਾ ਗਿਆ ਹੈ। ਇਸੇ ਤਰ੍ਹਾਂ ਰੇਲ ਗੱਡੀ ਚਾਲਕ ਤੇ ਫਾਟਕ ਉਤੇ ਖੜਾ ਗੇਟਮੈਨ ਵੀ ਰੇਲ ਵਿਭਾਗ ਦੇ ਮੁਲਾਜ਼ਮ ਹਨ, ਜਿਨ੍ਹਾਂ ਬਾਰੇ ਜਾਂਚ ਹੋਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਡੀ ਐਮ ਯੂ ਗੱਡੀ ਦੀ ਰਫ਼ਤਾਰ 30 ਕਿਲੋਮੀਟਰ ਪ੍ਰਤੀ ਘੰਟਾ ਦੇ ਕਰੀਬ ਹੁੰਦੀ ਹੈ, ਕਿਉਂਕਿ ਇਸ ਨੇ ਹਰ ਸਟੇਸ਼ਨ ਉੱਤੇ ਰੁਕਣਾ ਹੁੰਦਾ ਹੈ, ਪਰ ਇਹ ਉਸ ਦਿਨ 90 ਕਿਲੋਮੀਟਰ ਦੀ ਗਤੀ ਨਾਲ ਜਾ ਰਹੀ ਸੀ। ਉਨ੍ਹਾਂ ਕਿਹਾ ਕਿ ਦਸਹਿਰਾ ਮਨਾਏ ਜਾਣ ਦੀ ਥਾਂ ਰੇਲ ਫਾਟਕ ਦੇ ਨੇੜੇ ਹੈ ਤੇ ਪਿਛਲੇ ਕਈ ਦਿਨਾਂ ਤੋਂ ਇਥੇ ਵੱਡੇ ਬੋਰਡ ਲੱਗੇ ਹੋਏ ਸਨ ਤਾਂ ਫਾਟਕ ਵਾਲਾ ਇਸ ਸਮਾਗਮ ਤੋਂ ਕਿਵੇਂ ਅਣਜਾਣ ਸੀ। ਸ਼ਾਮ ਨੂੰ ਇਥੇ ਵੱਡੀਆਂ ਲਾਈਟਾਂ ਜਗਦੀਆਂ ਤਿੰਨ ਕਿਲੋਮੀਟਰ ਦੂਰੋਂ ਦਿੱਸਦੀਆਂ ਹਨ। ਉਨ੍ਹਾਂ ਕੁਝ ਵੀਡੀਓ ਕਲਿਪਿੰਗ ਦਿਖਾ ਕੇ ਕਿਹਾ ਕਿ ਨਵਜੋਤ ਕੌਰ ਸਿੱਧੂ ਉਸ ਦਿਨ ਏਦਾਂ ਦੇ ਛੇ ਪ੍ਰੋਗਰਾਮਾਂ ਵਿਚ ਗਈ ਤੇ ਕਿਸੇ ਸਮਾਗਮ ਵਿਚ ਦਸ ਮਿੰਟ ਤੋਂ ਵੱਧ ਨਹੀਂ ਰੁਕੀ। ਉਨ੍ਹਾਂ ਕਿਹਾ ਕਿ ਜਦੋਂ ਲੋਕ ਰੇਲ ਪਟੜੀਆਂ `ਤੇ ਖੜੇ ਵੇਖੇ ਸਨ ਤਾਂ ਪ੍ਰਬੰਧਕਾਂ ਨੇ ਕਈ ਵਾਰ ਸਪੀਕਰ ਉਤੇ ਉਨ੍ਹਾਂ ਨੂੰ ਸੁਰੱਖਿਅਤ ਥਾਂ ਉੱਤੇ ਆਉਣ ਵਾਸਤੇ ਆਖਿਆ ਸੀ, ਪਰ ਲੋਕ ਮੰਨੇ ਹੀ ਨਹੀਂ ਸਨ।