ਮੇਘਾ ਗੁਲਜਾਰ ਨਿਰਦੇਸ਼ਿਤ ਐਸਿਡ ਅਟੈਕ ਸਰਵਾਈਵਰ ਲਛਮੀ ਅਗਰਵਾਲ ਦੀ ਜ਼ਿੰਦਗੀ ਤੋਂ ਪ੍ਰੇਰਿਤ ਫਿਲਮ ‘ਛਪਾਕ’ ਦਾ ਟ੍ਰੇਲਰ ਲਾਂਚ ਹੋ ਗਿਆ ਹੈ। ਅੰਤਰਰਾਸ਼ਟਰੀ ਮਨੁੱਖੀ ਅਧਿਕਾਰ ਦਿਵਸ ਮੌਕੇ ਹੋਏ ਇਸ ਲਾਂਚ ਉਤੇ ਮੇਘਨਾ ਗੁਲਜਾਰ, ਦੀਪਿਕਾ ਪਾਦੁਕੋਣ, ਵਿਕਰਾਂਤ ਮੇਸੀ ਮੌਜੂਦ ਸਨ। ਟਰੇਲਰ ਦਿਖਾਏ ਜਾਣ ਦੇ ਬਾਅਦ ਜਦ ਦੀਪਿਕਾ ਸਟੇਜ 'ਤੇ ਪਹੁੰਚੀ ਤਾਂ ਉਹ ਭਾਵੁਕ ਹੋ ਗਈ। ਦੀਪਿਕਾ ਨੂੰ ਸੰਭਲਣ ਵਿੱਚ ਥੋੜ੍ਹਾ ਸਮਾਂ ਲੱਗਾ। ਉਸ ਦਾ ਕਹਿਣਾ ਹੈ ਕਿ ਇਸ ਫਿਲਮ ਦੀ ਸਕ੍ਰਿਪਟ ਜਦ ਮੇਘਨਾ ਨੇ ਉਨ੍ਹਾਂ ਨੂੰ ਸੁਣਾਈ ਸੀ, ਤਦ ਦੋ ਪੇਜ ਦੀ ਨਰੇਸ਼ਨ ਸੁਣਨ ਦੇ ਬਾਅਦ ਹੀ ਉਨ੍ਹਾਂ ਨੇ ਇਸ ਫਲਮ ਲਈ ਹਾਂ ਕਰ ਦਿੱਤੀ ਸੀ। ਦੀਪਿਕਾ ਨੇ ਦੱਸਿਆ ਕਿ ਫਿਲਮ ਦੀ ਕਹਾਣੀ ਉਸ ਘਟਨਾ 'ਤੇ ਨਹੀਂ, ਬਲਕਿ ਉਸ ਘਟਨਾ ਤੋਂ ਬਾਹਰ ਨਿਕਲ ਕੇ ਜ਼ਿੰਦਗੀ ਜੀਉਣ ਦੀ ਹੈ। ਉਹ ਦੱਸਦੀ ਹੈ ਕਿ ਅਜਿਹੇ ਕਿਰਦਾਰ ਨੂੰ ਨਿਭਾਉਣਾ ਮੁਸ਼ਕਲ ਹੈ, ਜੋ ਤੁਹਾਡੇ ਸਾਹਮਣੇ ਮੌਜੂਦ ਹੁੰਦਾ ਹੈ। ਲਛਮੀ ਅਗਰਵਾਲ ਦਾ ਕਿਰਦਾਰ ਨਿਭਾਉਣਾ ਉਨ੍ਹਾਂ ਦੇ ਲਈ ਆਸਾਨ ਨਹੀਂ ਸੀ। ਪ੍ਰੋਸਥੈਟਿਕ ਮੇਕਅਪ ਦੇ ਬਾਅਦ ਜਦ ਪਹਿਲੇ ਦਿਨ ਸੈਟ 'ਤੇ ਦੀਪਿਕਾ ਤਿਆਰ ਬੈਠੀ ਸੀ, ਤਦ ਉਹ ਨਰਵਸ ਸੀ ਕਿ ਲਛਮੀ ਉਨ੍ਹਾਂ ਨੂੰ ਦੇਖ ਕੇ ਕੀ ਪ੍ਰਤੀਕਿਰਿਆ ਦੇਵੇਗੀ।
ਦੀਪਿਕਾ ਨੇ ਦੱਸਿਆ ਕਿ ਜਦ ਲਛਮੀ ਨੇ ਉਨ੍ਹਾਂ ਨੂੰ ਦੇਖਿਆ ਤਾਂ ਕਿਹਾ ਕਿ ਉਨ੍ਹਾਂ ਨੂੰ ਇੰਝ ਲੱਗਦਾ ਹੈ ਜਿਵੇਂ ਉਹ ਸ਼ੀਸ਼ਾ ਦੇਖ ਰਹੀ ਹੈ। ਦੀਪਿਕਾ ਕਹਿੰਦੀ ਹੈ ਕਿ ਇੱਕ ਕਲਾਕਾਰ ਲਈ ਇਸ ਤੋਂ ਵੱਡੀ ਮਾਨਤਾ ਕੋਈ ਹੋਰ ਨਹੀਂ ਹੋਵੇਗੀ ਕਿ ਜਿਸ ਦਾ ਕਿਰਦਾਰ ਨਿਭਾ ਰਹੀ ਹੈ, ਉਹ ਖੁਦ ਇਹ ਕਹੇ। ਨਿਰਦੇਸ਼ਕ ਮੇਘਨਾ ਗੁਲਜਾਰ ਦਾ ਕਹਿਣਾ ਹੈ ਕਿ ਇਹ ਮਹਿਲਾ ਪ੍ਰਧਾਨ ਫਿਲਮ ਨਹੀਂ ਹੈ। ਉਨ੍ਹਾਂ ਦੀਆਂ ਫਿਲਮਾਂ ਦੀਆਂ ਕਹਾਣੀਆਂ ਵਿੱਚ ਮਹਿਲਾ ਦਾ ਕਿਰਦਾਰ ਮਜ਼ਬੂਤ ਜ਼ਰੂਰ ਹੁੰਦਾ ਹੈ, ਪ੍ਰੰਤੂ ਉਹ ਕੇਵਲ ਇੱਕ ਮਹਿਲਾ ਦੀ ਕਹਾਣੀ ਨਹੀਂ ਹੁੰਦੀ। ਉਹ ਇਹੋ ਜਿਹੀਆਂ ਕਹਾਣੀਆਂ ਚੁਣਦੀ ਹੈ, ਜੋ ਉਨ੍ਹਾਂ ਨੂੰ ਸਮਝ ਵਿੱਚ ਆਉਂਦੀਆਂ ਹਨ। ਸੰਵੇਦਨਸ਼ੀਲ ਕਹਾਣੀ ਨੂੰ ਲੱਭ ਕੇ ਉਸ ਨੂੰ ਕਮਰਸ਼ੀਅਲ ਬਣਾਉਣ ਦੀ ਕੋਸ਼ਿਸ਼ ਨਹੀਂ ਕਰਦੀ ਹੈ। ‘ਛਪਾਕ' ਅਗਲੇ ਸਾਲ 10 ਜਨਵਰੀ ਨੂੰ ਰਿਲੀਜ਼ ਹੋਵੇਗੀ।