ਸਰਹਿੰਦ, 12 ਦਸੰਬਰ (ਪੋਸਟ ਬਿਊਰੋ)- ਫਤਿਹਗੜ੍ਹ ਸਾਹਿਬ ਦੇ ਵਿਧਾਨਸਭਾ ਹਲਕਾ ਅਮਲੋਹ ਤੋਂ ਅਕਾਲੀ ਦਲ ਦੇ ਇੰਚਾਰਜ ਗੁਰਪ੍ਰੀਤ ਸਿੰਘ ਰਾਜੂ ਖੰਨਾ ਨੂੰ ਅਣਪਛਾਤਾ ਵਿਅਕਤੀ ਜਾਨੋਂ ਮਾਰਨ ਦੀਆਂ ਧਮਕੀਆਂ ਦੇ ਰਿਹਾ ਹੈ। ਰਾਜੂ ਖੰਨਾ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਤੇ ਸਾਬਕਾ ਕੈਬਿਨੇਟ ਮੰਤਰੀ ਬਿਕਰਮ ਸਿੰਘ ਮਜੀਠੀਆਦਾ ਕਰੀਬੀ ਹੈ। ਉਹ ਕੱਲ੍ਹ ਮੋਹਾਲੀ ਵਿੱਚ ਲੱਗੇ ਧਰਨੇ ਵਿੱਚ ਸੀ। ਉਥੇ ਉਨ੍ਹਾਂ ਨੂੰ ਅਣਜਾਣੇ ਨੰਬਰ ਤੋਂ ਫੋਨ ਆਇਆ, ਪਰ ਉਸ ਨੇ ਕਾਲ ਪਿਕ ਨਹੀਂ ਕੀਤੀ। ਫਿਰ ਇਸੇ ਨੰਬਰ ਤੋਂ ਮੰਡੀ ਗੋਬਿੰਦਗੜ੍ਹ ਵਿੱਚ ਉਨ੍ਹਾਂ ਦੇ ਸਾਥੀ ਨੂੰ ਫੋਨ ਕਰ ਕੇ ਗਲਤ ਭਾਸ਼ਾ ਵਰਤਦੇ ਹੋਏ ਕਈ ਪ੍ਰਕਾਰ ਦੀਆਂ ਧਮਕੀਆਂ ਦਿੱਤੀਆਂ ਗਈਆਂ।
ਫੋਨ ਕਰਨ ਵਾਲੇ ਨੇ ਆਪਣੇ ਆਪ ਨੂੰ ਡੀ ਆਈ ਜੀ ਦੱਸ ਕੇ ਕਿਹਾ ਕਿ ਰਾਜੂ ਖੰਨਾ ਸਾਡੇ ਵਿਰੋਧ ਵਿੱਚ ਚਲ ਰਿਹਾ ਹੈ ਅਤੇ ਕਿਸੇ ਕੇਸ ਵਿੱਚ ਉਸ ਨਾਲ ਧੱਕਾ ਕੀਤਾ ਜਾ ਰਿਹਾ ਹੈ। ਉਸ ਨੂੰ ਰਸਤੇ ਤੋਂ ਹਟਾਓ, ਨਹੀਂ ਤਾਂ ਮਾਰਿਆ ਜਾਵੇਗਾ..। ਧਮਕੀਆਂ ਮਿਲਣ ਦੀ ਪੁਸ਼ਟੀ ਕਰਦੇ ਹੋਏ ਰਾਜੂ ਖੰਨਾ ਨੇ ਕਿਹਾ ਕਿ ਧਰਨੇ ਵਿੱਚ ਹੋਣ ਕਾਰਨ ਉਹ ਕਾਲ ਨਹੀਂ ਸਨ ਚੁੱਕ ਸਕੇ। ਫਿਰ ਗੋਬਿੰਦਗੜ੍ਹ ਤੋਂ ਉਸ ਦੇ ਇੱਕ ਸਾਥੀ ਨੇ ਦੱਸਿਆ ਕਿ ਇਸ ਨੰਬਰ ਤੋਂ ਕਿਸੇ ਨੇ ਫੋਨ ਕਰ ਕੇ ਆਪਣੇ ਆਪ ਨੂੰ ਡੀ ਆਈ ਜੀ ਦੱਸਦੇ ਹੋਏ ਧਮਕੀਆਂ ਦਿੱਤੀਆਂ ਹਨ। ਜਿਹੜੇ ਮੋਬਾਈਲ ਨੰਬਰ ਤੋਂ ਖੰਨਾ ਦੇ ਸਾਥੀ ਨੂੰ ਧਮਕੀਆਂ ਦਿੱਤੀਆਂ ਗਈਆਂ, ਉਸੇ ਨੰਬਰ ਤੋਂ ਸੰਤ ਆਸ਼ਰਮ ਗੁਰਦੁਆਰਾ ਕ੍ਰਿਪਾਸਰ ਸਾਹਿਬ ਮੁਹਾਦੀਆਂ ਦੇ ਮੁੱਖੀ ਸੰਤ ਬਾਬਾ ਦਲਵਾਰਾ ਸਿੰਘ ਨੂੰ ਫੋਨ ਕਰ ਧਮਕੀਆਂ ਦਿੱਤੀਆਂ ਗਈਆਂ ਸਨ। ਫੋਨ ਕਰਨ ਵਾਲੇ ਨੇ ਬਾਬਾ ਦਲਵਾਰਾ ਸਿੰਘ ਨੂੰ ਕਿਹਾ ਕਿ ਕਿੱਥੇ ਹੋ ਤੁਸੀਂ ਅਸੀਂ ਮਾਰਨ ਆ ਰਹੇ ਹਾਂ..। ਕੱਲ੍ਹ ਰਾਤ ਕਰੀਬ 11.15 ਵਜੇ ਕੀਤੀ ਗਈ ਇਸ ਕਾਲ ਵਿੱਚ ਗਲਤ ਭਾਸ਼ਾ ਵਰਤਦੇ ਹੋਏ ਬੁਰਾ-ਭਲਾ ਵੀ ਕਿਹਾ ਗਿਆ। ਬਾਬਾ ਦਲਵਾਰਾ ਸਿੰਘ ਨੇ ਇਸ ਦੀ ਸ਼ਿਕਾਇਤ ਕੱਲ੍ਹ ਥਾਣਾ ਫਤਿਹਗੜ੍ਹ ਸਾਹਿਬ ਨੂੰ ਦਿੱਤੀ ਹੈ। ਡੀ ਐਸ ਪੀ ਰਮਿੰਦਰ ਸਿੰਘ ਨੇ ਕਿਹਾ ਕਿ ਮਾਮਲੇ ਦੀ ਜਾਂਚ ਸ਼ੁਰੂ ਕਰ ਦਿੱਤੀ ਹੈ।