ਬਠਿੰਡਾ, 12 ਦਸੰਬਰ (ਪੋਸਟ ਬਿਊਰੋ)- ਇਸ ਸ਼ਹਿਰ ਦੇ ਇੱਕ ਹੋੋਟਲ 'ਚ ਕੱਲ੍ਹ ਪਟਿਆਲਾ ਦੇ ਇੱਕ ਲੜਕੇ ਦੇ ਬਠਿੰਡਾ ਦੀ ਲੜਕੀ ਨਾਲ ਹੋ ਰਹੇ ਵਿਆਹ ਦੇ ਰੰਗ 'ਚ ਉਸ ਸਮੇਂ ਭੰਗ ਪੈ ਗਈ, ਜਦ ਚੰਡੀਗੜ੍ਹ ਤੋਂ ਪੁੱਜੀ ਇੱਕ ਲੜਕੀ ਨੇ ਲਾੜੇ ਦੀ ਪਹਿਲੀ ਪਤਨੀ ਹੋਣ ਦਾ ਦਾਅਵਾ ਕਰ ਦਿੱਤਾ। ਫ਼ਿਲਮੀ ਸਟਾਇਲ ਵਿੱਚ ਪੁਲਸ ਲੈ ਕੇ ਪੁੱਜੀ ਇਸ ਲੜਕੀ ਦੀ ਇੰਟਰੀ ਨਾਲ ਨਾ ਸਿਰਫ ਲਾੜੇ ਦਾ ਵਿਆਹ ਰੁਕ ਗਿਆ, ਸਗੋਂ ਲੜਕੀ ਵਾਲਿਆਂ ਨੇ ਉਸਤੋਂ ਵਿਆਹ ਦੀਆਂ ਰਸਮਾਂ ਦੇ ਖਰਚੇ ਵਜੋਂ ਛੇ ਲੱਖ ਰੁਪਏ ਵੀ ਮੰਗ ਲਏ। ਇਸ ਨਾਲ ਲੜਕਾ ਤੇ ਉਸਦਾ ਪ੍ਰਵਾਰ ਦੋਹਰੀ ਮੁਸੀਬਤ ਵਿੱਚ ਪੈ ਗਿਆ। ਵਿਵਾਦ ਵਧਦਾ ਦੇਖ ਪੁਲਸ ਅਧਿਕਾਰੀ ਲਾੜੇ ਤੇ ਉਸਦੇ ਪ੍ਰਵਾਰ ਤੇ ਦੋਸ਼ ਲਾਉਣ ਵਾਲੀ ਲੜਕੀ ਨੂੰ ਥਾਣਾ ਸਿਵਲ ਲਾਈਨ ਲੈ ਆਏ। ਪੁਲਸ ਸੂਤਰਾਂ ਨੇ ਦੱਸਿਆ ਕਿ ਦੋਨ੍ਹਾਂ ਧਿਰਾਂ ਦਾ ਸਮਝੋਤਾ ਹੋ ਗਿਆ ਹੈ।
ਪਤਾ ਲੱਗਾ ਹੈ ਕਿ ਪਟਿਆਲਾ ਨਾਲ ਸਬੰਧਤ ਗੁਰਪ੍ਰੀਤ ਨਾਂ ਦਾ ਲੜਕੇ ਆਪਣੇ ਪ੍ਰਵਾਰ ਸਮੇਤ ਬਠਿੰਡਾ ਨਾਲ ਸਬੰਧਤ ਇੱਕ ਲੜਕੀ ਨੂੰ ਵਿਆਹੁਣ ਲਈ ਆਇਆ ਸੀ।ਹਾਲੇ ਖਾਣ ਪੀਣ ਤੋਂ ਬਾਅਦ ਸਥਾਨਕ ਸਟੇਡੀਅਮ ਨਜਦੀਕ ਇੱਕ ਹੋਟਲ ਵਿੱਚ ਫ਼ੇਰਿਆ ਦੀ ਰਸਮ ਸ਼ੁਰੂ ਹੋਣ ਵਾਲੀ ਸੀ ਕਿ ਹਿਮਾਚਲ ਪ੍ਰਦੇਸ਼ ਦੇ ਸੋਲਨ ਦੀ ਇੱਕ ਲੜਕੀ ਪੁਲਸ ਲੈ ਕੇ ਹੋਟਲ ਵਿੱਚ ਆ ਧਮਕੀ। ਉਸਨੇ ਦਾਅਵਾ ਕੀਤਾ ਕਿ ਜਿਸ ਲੜਕੇ ਵੱਲੋਂ ਕੱਲ੍ਹ ਵਿਆਹ ਕਰਾਇਆ ਜਾ ਰਿਹਾ ਹੈ, ਉਹ ਉਸ ਨਾਲ ਤਿੰਨ ਸਾਲ ਪਹਿਲਾਂ ਹੀ ਵਿਆਹਿਆਂ ਹੋਇਆ। ਪੁਲਸ ਅਜੇ ਵੀ ਇਸ ਮਾਮਲੇ ਦੀ ਜਾਂਚ ਕਰ ਰਹੀ ਹੈ।