ਟੋਰਾਂਟੋ, 12 ਦਸੰਬਰ (ਪੋਸਟ ਬਿਊਰੋ) : ਬੈਂਕ ਆਫ ਕੈਨੇਡਾ ਦੇ ਗਵਰਨਰ ਸਟੀਫਨ ਪੋਲੋਜ਼ ਨੇ ਵੀਰਵਾਰ ਨੂੰ ਆਖਿਆ ਕਿ ਗਲੋਬਲ ਅਰਥਚਾਰੇ ਦੀ ਮੱਠੀ ਰਫਤਾਰ ਕਾਰਨ ਵਿਆਜ਼ ਦਰਾਂ ਵਿੱਚ ਵਾਧਾ ਹੋਣ ਦੀ ਕੋਈ ਸੰਭਾਵਨਾ ਨਹੀਂ ਹੈ।
ਟੋਰਾਂਟੋ ਵਿੱਚ ਐਂਪਾਇਰ ਕਲੱਬ ਨਾਲ ਗੱਲ ਕਰਦਿਆਂ ਪੋਲੋਜ਼ ਨੇ ਆਖਿਆ ਕਿ ਆਬਾਦੀ ਦੀ ਘਾਟ ਕਾਰਨ ਹੀ ਆਰਥਿਕ ਵਿਕਾਸ ਦੀ ਰਫਤਾਰ ਮੱਠੀ ਹੈ ਤੇ ਤਬਦੀਲੀ ਲਿਆਉਣ ਲਈ ਉਤਪਾਦਕਤਾ ਵੀ ਨਹੀਂ ਵੱਧ ਰਹੀ। ਇਸ ਤੋਂ ਇਲਾਵਾ ਗਲੋਬਲਾਈਜ਼ੇਸ਼ਨ ਰਾਹੀਂ ਉਤਪਾਦਕਤਾ ਵਿੱਚ ਹੋਏ ਵਾਧੇ ਉੱਤੇ ਟਰੇਡ ਵਾਰ ਕਾਰਨ ਤਲਵਾਰ ਲਟਕ ਰਹੀ ਹੈ। ਇੰਪੋਰਟ ਉੱਤੇ ਲਾਏ ਗਏ ਟੈਰਿਫਜ਼ ਕਾਰਨ ਕੰਪਨੀਆਂ ਨੂੰ ਆਪਣੀ ਸਪਲਾਈ ਚੇਨ ਖਤਮ ਕਰਨੀ ਪੈਂਦੀ ਹੈ ਤੇ ਦੂਜੀ ਸਪਲਾਈ ਚੇਨ ਸ਼ੁਰੂ ਕਰਨੀ ਪੈਂਦੀ ਹੈ ਜਿਹੜੀ ਘੱਟ ਸਮਰੱਥ ਹੁੰਦੀ ਹੈ।
ਇਸ ਤੋਂ ਇਲਾਵਾ ਟਰੇਡ ਨੀਤੀਆਂ ਬਾਰੇ ਅਸਥਿਰਤਾ ਕਾਰਨ ਕੰਪਨੀਆਂ ਨੂੰ ਆਪਣੀਆਂ ਨਿਵੇਸ਼ ਯੋਜਨਾਵਾਂ ਵਿੱਚ ਕਟੌਤੀ ਕਰਨੀ ਪੈ ਰਹੀ ਹੈ ਤੇ ਇਸ ਦਾ ਸਾਫ ਮਤਲਬ ਹੈ- ਭਵਿੱਖ ਵਿੱਚ ਘੱਟ ਆਰਥਿਕ ਵਿਕਾਸ। ਪੋਲੋਜ਼ ਨੇ ਵੀਰਵਾਰ ਨੂੰ ਇੱਕ ਡਿਸਕਸ਼ਨ ਪੇਪਰ ਵੀ ਜਾਰੀ ਕੀਤਾ ਤੇ ਆਖਿਆ ਕਿ ਆਰਟੀਫਿਸ਼ਲ ਇੰਟੈਲੀਜੈਂਸ ਤੇ ਫੋਰਥ ਇੰਡਸਟਰੀਅਲ ਰੈਵੋਲਿਊਸ਼ਨ ਭਵਿੱਖ ਵਿੱਚ ਉਤਪਾਦਕਤਾ ਵਿੱਚ ਵਾਧਾ ਕਰ ਸਕਦਾ ਹੈ ਪਰ ਇਹ ਮੁਨਾਫਾ ਹਾਲ ਦੀ ਘੜੀ ਅਰਥਚਾਰੇ ਵਿੱਚ ਨਜ਼ਰ ਨਹੀਂ ਆਉਣ ਲੱਗਿਆ।
ਜਿ਼ਕਰਯੋਗ ਹੈ ਕਿ ਬੈਂਕ ਆਫ ਕੈਨੇਡਾ ਵੱਲੋਂ ਆਪਣੀਆਂ ਵਿਆਜ਼ ਦਰਾਂ ਪਿਛਲੇ ਹਫਤੇ 1.75 ਫੀ ਸਦੀ ਰੱਖੀਆਂ ਗਈਆਂ ਸਨ ਤੇ ਪਿਛਲੇ ਇੱਕ ਤੋਂ ਵੀ ਵੱਧ ਸਾਲ ਤੋਂ ਇਹ ਇੱਥੇ ਹੀ ਟਿਕੀਆਂ ਹੋਈਆਂ ਹਨ।