ਤਿਰੂਪਤੀ, 21 ਅਕਤੂਬਰ (ਪੋਸਟ ਬਿਊਰੋ)- ਨਰਾਤੇ ਖਤਮ ਹੁੰਦੇ ਸਾਰ ਆਂਧਰਾ ਪ੍ਰਦੇਸ਼ ਦੇ ਪ੍ਰਸਿੱਧ ਤਿਰੂਪਤੀ ਮੰਦਰ ਵਿੱਚ ਲੱਡੂਆਂ ਦਾ ਘਪਲਾ ਸਾਹਮਣੇ ਆਇਆ ਹੈ। ਕਿਹਾ ਜਾ ਰਿਹਾ ਹੈ ਕਿ ਠੇਕੇ ਉਤੇ ਰੱਖੇ ਕੁਝ ਕਰਮਚਾਰੀਆਂ ਨੇ ਮੰਦਰ ਵਿੱਚ ਪ੍ਰਸਾਦ ਦੇ ਰੂਪ ਵਿੱਚ ਦਿੱਤੇ ਜਾਣ ਵਾਲੇ ਲੱਡੂਆਂ ਵਿੱਚੋਂ 14000 ਲੱਡੂਆਂ ਨੂੰ ਬਲੈਕ ਮਾਰਕੀਟ ਵਿੱਚ ਵੇਚ ਦਿੱਤਾ ਹੈ ਅਤੇ ਇਸ ਤੋਂ ਮੋਟੀ ਕਮਾਈ ਕਰ ਗਏ ਹੋ ਸਕਦੇ ਹਨ।
ਵਰਨਣ ਯੋਗ ਹੈ ਕਿ ਇਸ ਮੰਦਰ ਵਿੱਚ ਦਰਸ਼ਨ ਕਰਨ ਲਈ ਆਉਣ ਵਾਲੇ ਸ਼ਰਧਾਲੂਆਂ ਨੂੰ ਟੋਕਨ ਦੇ ਆਧਾਰ 'ਤੇ ਲੱਡੂ ਦਿੱਤੇ ਜਾਂਦੇ ਹਨ। ਘਪਲੇ ਦੀ ਇਸ ਘਟਨਾ ਨਾਲ ਮੰਦਰ ਦਾ ਪ੍ਰਬੰਧ ਕਰਨ ਵਾਲਾ ਤਿਰੂਮਾਲਾ ਤਿਰੂਪਤੀ ਦੇਵਸਥਾਨਮ (ਟੀ ਟੀ ਡੀ) ਸਦਮੇ ਵਿੱਚ ਹੈ। ਨਰਾਤੇ ਬ੍ਰਹਮ ਉਤਸਵ ਦੌਰਾਨ ਗਰੁੜ ਸੇਵਾ ਉੱਤੇ ਭਗਤਾਂ ਦੀ ਭਾਰੀ ਭੀੜ ਦੀ ਆਸ ਵਿੱਚ ਟੀ ਟੀ ਡੀ ਵੱਲੋਂ ਮੈਨੂਅਲ ਸਿਸਟਮ ਦੀ ਵਿਵਸਥਾ ਕੀਤੀ ਗਈ ਸੀ। ਬੀਤੀ 14, 15 ਅਤੇ 16 ਅਕਤੂਬਰ ਨੂੰ ਕੁੱਲ ਇਸ ਬਾਰੇ 30,000 ਟੋਕਨ ਦਿੱਤੇ ਗਏ। ਇਹ ਟੋਕਨ ਆਨਲਾਈਨ ਦੀ ਬਜਾਏ ਮੈਨੂਅਲ ਤਰੀਕੇ ਨਾਲ ਵੰਡੇ ਗਏ ਸਨ ਤੇ ਲੱਡੂ ਪ੍ਰਸਾਦਮ ਟਿਕਟ ਕਾਊਂਟਰਸ ਉੱਤੇ ਕੰਮ ਕਰਨ ਵਾਲੇ ਕਰਮਚਾਰੀਆਂ 'ਤੇ ਸ਼ੱਕ ਹੈ ਕਿ ਉਨ੍ਹਾਂ ਨੇ ਪੁਰਾਣੇ ਟੋਕਨ ਨੰਬਰ ਨਾਲ ਹੀ ਦੁਬਾਰਾ 14000 ਜ਼ਿਆਦਾ ਲੱਡੂ ਲੈ ਲਏ, ਜਦੋਂ ਕਿ ਪਹਿਲਾਂ ਉਨ੍ਹਾਂ ਹੀ ਟੋਕਨਾਂ ਉਤੇ ਲੱਡੂਆਂ ਨੂੰ ਜ਼ਿਆਦਾ ਕੀਮਤ 'ਤੇ ਵੇਚਿਆ ਜਾ ਚੁੱਕਾ ਸੀ। ਇਸ ਤਰ੍ਹਾਂ ਇੱਕ ਬਹੁਤ ਵੱਡਾ ਘਪਲਾ ਹੋਇਆ ਹੈ।