ਨਵੀਂ ਦਿੱਲੀ, 21 ਅਕਤੂਬਰ (ਪੋਸਟ ਬਿਊਰੋ)- ਚੀਨ ਤੋਂ ਮਿਲੀ ਹੜ੍ਹ ਆਉਣ ਦੀ ਚਿਤਾਵਨੀ ਮਗਰੋਂ ਅਰੁਣਾਚਲ ਪ੍ਰਦੇਸ਼ ਅਤੇ ਅਸਾਮ ਦੀਆਂ ਸਰਕਾਰਾਂ ਅਤੇ ਕੇਂਦਰ ਸਰਕਾਰ ਵੀ ਚੌਕਸ ਹੋ ਗਈਆਂ ਹਨ। ਕੇਂਦਰ ਸਰਕਾਰ ਨੇ ਦੋਵਾਂ ਰਾਜਾਂ ਵਿੱਚ ਸਥਿਤੀ ਨਾਲ ਨਿਪਟਣ ਲਈ 14 ਕੰਪਨੀਆਂ ਆਫਤ ਰਾਹਤ ਫੋਰਸ (ਐੱਨ ਡੀ ਆਰ ਐੱਫ) ਭੇਜੀ ਹੈ।
ਵਰਨਣ ਯੋਗ ਹੈ ਕਿ ਅਰੁਣਾਚਲ ਪ੍ਰਦੇਸ਼ ਦੇ ਪੂਰਬੀ ਸਿਆਂਗ ਜ਼ਿਲ੍ਹੇ ਵਿਚ ਸਿਆਂਗ ਨਦੀ ਦੇ ਪਾਣੀ ਦਾ ਪੱਧਰ ਕੱਲ੍ਹ ਸਵੇਰ ਤੋਂ ਵਧਣਾ ਸ਼ੁਰੂ ਹੋ ਗਿਆ ਸੀ। ਇਸ ਦੇ ਕੁਝ ਦਿਨਾਂ ਤੱਕ ਲਗਾਤਾਰ ਵਧਣ ਦੀ ਸ਼ੰਕਾ ਹੈ। ਇਸ ਨਦੀ ਨੂੰ ਅਸਾਮ 'ਚ ਬ੍ਰਹਮਪੁੱਤਰ ਨਦੀ ਦੇ ਨਾਂਅ ਨਾਲ ਜਾਣਿਆ ਜਾਂਦਾ ਹੈ। ਇਸ ਲਈ ਨਦੀ ਵਿੱਚ ਹੜ੍ਹ ਦਾ ਅਸਰ ਅਸਾਮ ਉਤੇ ਪੈ ਸਕਦਾ ਹੈ। ਇਹ ਸਥਿਤੀ ਚੀਨ ਦੇ ਤਿੱਬਤ ਇਲਾਕੇ ਵਿੱਚ ਢਿੱਗਾਂ ਡਿੱਗਣ ਨਾਲ ਯਾਰਲੁੰਗ ਸਾਂਗਪੋ ਨਦੀ ਦਾ ਵਹਾਅ ਰੁਕਣ ਤੋਂ ਬਣੀ ਹੈ, ਜਿਸ ਕਾਰਨ ਚੀਨੀ ਖੇਤਰ ਵਿੱਚ ਵੱਡੀ ਝੀਲ ਬਣ ਗਈ ਹੈ ਅਤੇ ਪਾਣੀ ਦਾ ਦਬਾਅ ਵਧਣ ਨਾਲ ਇਸ ਦੀ ਕੁਦਰਤੀ ਦੀਵਾਰ ਕਦੇ ਵੀ ਟੁੱਟ ਸਕਦੀ ਹੈ। ਅਰੁਣਾਚਲ ਪ੍ਰਦੇਸ਼ ਦੇ ਜਲ ਸਾਧਨ ਵਿਭਾਗ ਅਨੁਸਾਰ ਨਦੀ ਵਿੱਚ ਪਾਣੀ ਦੇ ਪੱਧਰ ਵਿੱਚ ਭਾਰੀ ਵਾਧਾ ਦਰਜ ਕੀਤਾ ਗਿਆ ਹੈ। ਪੂਰਬੀ ਸਿਆਂਗ ਜ਼ਿਲ੍ਹੇ ਦੇ ਡਿਪਟੀ ਕਮਿਸ਼ਨਰ ਦੁਲੀ ਕਾਮਡੁਕ ਹੇਠਲੇ ਅਧਿਕਾਰੀਆਂ ਨਾਲ ਹਾਲਾਤ ਉਤੇ ਨਜ਼ਰ ਰੱਖ ਰਹੇ ਹਨ। ਚੀਨ ਤੋਂ ਮਿਲੀ ਸੂਚਨਾ ਦੇ ਆਧਾਰ 'ਤੇ ਹੇਠਲੇ ਇਲਾਕੇ ਖਾਲੀ ਕਰਵਾ ਦਿੱਤੇ ਗਏ ਹਨ। ਅਰੁਣਾਚਲ ਪ੍ਰਦੇਸ਼ ਨੂੰ ਹਾਲਾਤ ਨਾਲ ਨਿਪਟਣ ਲਈ ਕੇਂਦਰ ਸਰਕਾਰ ਨੇ ਐੱਨ ਡੀ ਆਰ ਐੱਫ ਦੀਆਂ ਅੱਠ ਕੰਪਨੀਆਂ ਦਿੱਤੀਆਂ ਹਨ ਅਤੇ ਕੇਂਦਰੀ ਮਾਹਿਰਾਂ ਦਾ ਦਲ ਵੀ ਅਰੁਣਾਚਲ ਪ੍ਰਦੇਸ਼ ਪੁੱਜ ਗਿਆ ਹੈ।
ਅਸਾਮ ਵਿੱਚ ਧੇਮਾਜੀ, ਡਿਬਰੂਗੜ੍ਹ, ਲਖੀਮਪੁਰ ਅਤੇ ਤਿਨਸੁਕੀਆ ਜ਼ਿਲ੍ਹਿਆਂ ਵਿੱਚ ਚੌਕਸੀ ਵਰਤੀ ਜਾ ਰਹੀ ਹੈ। ਮੁੱਖ ਮੰਤਰੀ ਸਰਬਾਨੰਦ ਸੋਨੋਵਾਲ ਨੇ ਅਧਿਕਾਰੀਆਂ ਨੂੰ ਹੜ੍ਹ ਨਾਲ ਨਿਪਟਣ ਦੇ ਸਾਰੇ ਇੰਤਜ਼ਾਮ ਕਰਨ ਦੇ ਨਿਰਦੇਸ਼ ਦਿੱਤੇ ਹਨ। ਵਿਦੇਸ਼ ਮੰਤਰੀ ਸੁਸ਼ਮਾ ਸਵਰਾਜ ਨੇ ਮੁੱਖ ਮੰਤਰੀ ਸੋਨੋਵਾਲ ਨਾਲ ਗੱਲ ਕਰ ਕੇ ਹੜ੍ਹ ਨਾਲ ਨਿਪਟਣ ਦੇ ਇੰਤਜ਼ਾਮਾਂ ਦੀ ਜਾਣਕਾਰੀ ਲਈ ਹੈ। ਕੇਂਦਰ ਨੇ ਅਸਾਮ ਲਈ ਐਨ ਡੀ ਆਰ ਐਫ ਦੀਆਂ ਛੇ ਕੰਪਨੀਆਂ ਭੇਜੀਆਂ ਹਨ।