ਟੋਰਾਂਟੋ, 4 ਦਸੰਬਰ (ਪੋਸਟ ਬਿਊਰੋ) : ਓਨਟਾਰੀਓ ਸਰਕਾਰ ਵੱਲੋਂ ਟੈਕਸਦਾਤਾਵਾਂ ਦੇ ਡਾਲਰਜ਼ ਬਚਾਉਣ ਤੇ ਸਮਾਰਟ ਢੰਗ ਨਾਲ ਖਰਚੇ ਕਰਨ ਦੇ ਆਪਣੇ ਮੰਤਰ ਨੂੰ ਅਮਲੀ ਰੂਪ ਦੇ ਕੇ ਆਪਣੀ ਵਚਨਬੱਧਤਾ ਨੂੰ ਪੂਰਾ ਕੀਤਾ ਜਾ ਰਿਹਾ ਹੈ। ਸਰਕਾਰ ਵੱਲੋਂ ਟਰੈਵਲ, ਮੀਲਜ਼ ਤੇ ਮੇਜ਼ਬਾਨੀ ਉੱਤੇ ਸੋਚ ਸਮਝ ਕੇ ਖਰਚ ਕਰਨ ਨਾਲ 25 ਮਿਲੀਅਨ ਡਾਲਰ ਦੀ ਬਚਤ ਹੋਈ ਹੈ। ਇਸ ਨਾਲ ਇਹ ਵੀ ਯਕੀਨੀ ਬਣਾਇਆ ਜਾਵੇਗਾ ਕਿ ਸਰਕਾਰ ਵੱਲੋਂ ਅਹਿਮ ਪ੍ਰੋਗਰਾਮਾਂ ਤੇ ਸੇਵਾਵਾਂ ਉੱਤੇ ਹੀ ਖਰਚ ਕੀਤਾ ਜਾਵੇ।
ਜੂਨ 2018 ਵਿੱਚ ਓਨਟਾਰੀਓ ਸਰਕਾਰ ਵੱਲੋਂ ਲਾਈਆਂ ਗਈਆਂ ਪਾਬੰਦੀਆਂ ਦੇ ਨਤੀਜੇ ਵਜੋਂ ਟਰੈਵਲ, ਮੀਲਜ਼ ਤੇ ਮੇਜ਼ਬਾਨੀ ਉੱਤੇ ਖਰਚਾ ਇਸ ਦਹਾਕੇ ਵਿੱਚ ਸੱਭ ਤੋਂ ਹੇਠਲੇ ਪੱਧਰ ਉੱਤੇ ਜਾ ਪਹੁੰਚਿਆ ਹੈ। 2017-18 ਤੋਂ 2018-19 ਦਰਮਿਆਨ ਅਕਮੋਡੇਸ਼ਨ ਉੱਤੇ ਕੀਤਾ ਜਾਣ ਵਾਲਾ ਖਰਚਾ 9 ਮਿਲੀਅਨ ਡਾਲਰ ਘਟਿਆ ਹੈ, ਹਵਾਈ ਸਫਰ ਵਿੱਚ 7 ਮਿਲੀਅਨ ਡਾਲਰ ਨਾਲ ਕਟੌਤੀ ਹੋਈ ਹੈ ਤੇ ਮੇਜ਼ਬਾਨੀ ਉੱਤੇ ਕੀਤੇ ਜਾਣ ਵਾਲੇ ਖਰਚੇ ਵਿੱਚ ਇੱਕ ਮਿਲੀਅਨ ਡਾਲਰ ਦੀ ਕਮੀ ਦਰਜ ਕੀਤੀ ਗਈ ਹੈ।
ਖਜ਼ਾਨਾ ਬੋਰਡ ਦੇ ਪ੍ਰੈਜ਼ੀਡੈਂਟ ਪੀਟਰ ਬੈਥਲਨਫਾਲਵੀ ਨੇ ਆਖਿਆ ਕਿ ਸਾਡੀ ਸਰਕਾਰ ਸਮਾਰਟ ਸਰਕਾਰ ਦੇ ਨਿਰਮਾਣ ਲਈ ਵਚਨਬੱਧ ਹੈ, ਜੋ ਕਿ ਟੈਕਸਦਾਤਾਵਾਂ ਦੇ ਡਾਲਰਜ਼ ਨੂੰ ਪ੍ਰਭਾਵਸ਼ਾਲੀ ਢੰਗ ਨਾਲ ਤੇ ਸਹੀ ਥਾਂ ਉੱਤੇ ਖਰਚ ਸਕੇ। ਉਨ੍ਹਾਂ ਆਖਿਆ ਕਿ ਜਦੋਂ ਪਰਿਵਾਰਾਂ ਨੇ ਆਪਣਾ ਖਰਚਾ ਸੀਮਤ ਬਜਟ ਦੇ ਹਿਸਾਬ ਨਾਲ ਚਲਾਉਣਾ ਹੁੰਦਾ ਹੈ ਤਾਂ ਉਨ੍ਹਾਂ ਨੂੰ ਹੱਥ ਘੁੱਟਣਾ ਹੀ ਪੈਂਦਾ ਹੈ ਤੇ ਇਸੇ ਤਰ੍ਹਾਂ ਸਰਕਾਰ ਨੂੰ ਆਪਣੇ ਖਰਚਿਆਂ ਵਾਸਤੇ ਇਹ ਨਿਯਮ ਲਾਗੂ ਕਰਨਾ ਚਾਹੀਦਾ ਹੈ।
ਜਿਨ੍ਹਾਂ ਹੋਰਨਾਂ ਖਰਚਿਆਂ ਉੱਤੇ ਸਰਕਾਰ ਵੱਲੋਂ ਪਾਬੰਦੀ ਲਾਈ ਗਈ ਹੈ ਉਹ ਹੇਠ ਲਿਖੇ ਅਨੁਸਾਰ ਹਨ :
· 2018 ਦੇ ਮੱਧ ਤੋਂ ਕੈਬਨਿਟ ਤੇ ਕਮੇਟੀ ਦੀਆਂ ਮੀਟਿੰਗਾਂ ਲਈ ਕੇਟਰਿੰਗ ਰੱਦ ਕਰਕੇ ਸਰਕਾਰ ਨੇ 77,000 ਡਾਲਰ ਦੀ ਬਚਤ ਕੀਤੀ
· ਵਿਅਕਤੀਗਤ ਤੌਰ ਉੱਤੇ ਮੀਟਿੰਗਾਂ ਅਟੈਂਡ ਕਰਨ ਦੀ ਥਾਂ ਉੱਤੇ ਵੀਡੀਓ ਕਾਨਫਰੰਸਿੰਗ ਨਾਲ ਅੰਦਾਜ਼ਨ 40,000 ਡਾਲਰ ਦੀ ਬਚਤ ਕੀਤੀ ਗਈ
· ਬਜਟ ਡੇਅ ਉੱਤੇ ਵੱਡੀ ਪੱਧਰ ਉੱਤੇ ਲੰਚ ਕਰਵਾਉਣ ਦੀ ਥਾਂ ਪਿਜ਼ਾ ਲੰਚ ਕਰਵਾਉਣ ਨਾਲ ਕੇਟਰਿੰਗ ਦੀ ਕੌਸਟ ਘੱਟ ਕੇ ਅੱਧੀ ਰਹਿ ਗਈ।
ਬੈਥਲਨਫਾਲਵੀ ਨੇ ਇਹ ਐਲਾਨ ਵੀ ਕੀਤਾ ਕਿ ਸਰਕਾਰ ਵੱਲੋਂ ਟਰੈਵਲ, ਮੀਡੀਆ ਤੇ ਮੇਜ਼ਬਾਨੀ ਸਬੰਧੀ ਖਰਚਿਆਂ ਬਾਰੇ ਨਿਯਮਾਂ ਨੂੰ ਵੀ ਅਪਡੇਟ ਕੀਤਾ ਗਿਆ ਹੈ। ਇਹ ਸੱਭ ਨਰੀਖਣ, ਜਵਾਬਦੇਹੀ ਤੇ ਆਧੁਨਿਕ ਰੁਝਾਨਾਂ ਨੂੰ ਵਧਾਉਣ ਲਈ ਕੀਤਾ ਜਾ ਰਿਹਾ ਹੈ। ਇਨ੍ਹਾਂ ਤਬਦੀਲੀਆਂ ਵਿੱਚ ਹੇਠ ਲਿਖੀਆਂ ਤਬਦੀਲੀਆਂ ਸ਼ਾਮਲ ਹਨ :
· ਇਕੌਨਮੀ ਜਾਂ ਕੋਚ ਦੀ ਥਾਂ ਉੱਤੇ ਏਅਰ ਤੇ ਰੇਲ ਸਫਰ ਲਈ ਉਪਲਬਧ ਸੱਭ ਤੋਂ ਘੱਟ ਭਾੜਾ ਯਕੀਨੀ ਬਣਾ ਕੇ
· ਸੜਕ ਰਾਹੀਂ ਸਫਰ ਕਰਨ ਲਈ ਘੱਟ ਖਰਚ ਵਾਲੇ ਬਦਲ ਤਲਾਸ਼ ਕੇ
· ਮਹਿੰਗੇ ਡਾਊਨਟਾਊਨ ਇਲਾਕਿਆਂ ਦੀ ਥਾਂ ਉੱਤੇ ਇਨ੍ਹਾਂ ਤੋਂ ਬਾਹਰਵਾਰ ਸਸਤੇ ਰਿਹਾਇਸ਼ੀ ਪ੍ਰਬੰਧ ਕਰਕੇ
· ਪ੍ਰਿੰਟ ਕੀਤੀਆਂ ਗਈਆਂ ਰਸੀਦਾਂ ਦੀ ਥਾਂ ਉੱਤੇ ਈ-ਰਸਿਪਟਸ ਜਾਂ ਸਕੈਨ ਕੀਤੀਆਂ ਗਈਆਂ ਰਸਿਪਟਸ ਸਵੀਕਾਰ ਕੇ ਇਨ੍ਹਾਂ ਨਿਯਮਾਂ ਨੂੰ ਅਪਡੇਟ ਤੇ ਆਧੁਨਿਕ ਰੂਪ ਦੇਣ ਦੀ ਕੋਸਿ਼ਸ਼ ਕੀਤੀ ਗਈ ਹੈ।