ਇੰਫਾਲ, 3 ਦਸੰਬਰ (ਪੋਸਟ ਬਿਊਰੋ)- ਮਣੀਪੁਰ ਦੇ ਚੂੜਾ ਚਾਂਦਪੁਰ ਜ਼ਿਲੇ ਦੇ ਕੰਗਵਈ ਪਿੰਡ ਦੇ ਇਜ਼ਾਕ ਪਾਲੁੰਗ ਨੁਆਨ ਵਾਈਫੇਈ ਸਿਰਫ 12 ਸਾਲ ਦੀ ਉਮਰ ਵਿੱਚ ਦਸਵੀਂ ਜਮਾਤ ਦੇ ਇਮਤਿਹਾਨ 'ਚ ਬੈਠਣ ਲੱਗੇ ਹਨ। ਉਹ ਆਸਾਮ ਵਿੱਚ ਦਸਵੀਂ ਦੇ ਇਮਤਿਹਾਨ ਵਿੱਚ ਬੈਠਣ ਵਾਲੇ ਸਭ ਤੋਂ ਘੱਟ ਉਮਰ ਦੇ ਵਿਦਿਆਰਥੀ ਹੋਣਗੇ।
ਸੈਕੰਡਰੀ ਵਿਦਿਆ ਦੇ ਬੋਰਡ (ਬੀ ਓ ਐੱਸ ਈ) ਨੇ ਇਜ਼ਾਕ ਨੂੰ ਆਸਾਮ ਹਾਈ ਸਕੂਲ ਛੱਡਣ ਬਾਰੇ ਸਰਟੀਫਿਕੇਟ ਲਈ ਮਾਨਤਾ ਦੇ ਦਿੱਤੀ ਹੈ। ਬੋਰਡ ਨੇ ਇਜ਼ਾਕ ਦਾ ਕੇਸ ਵਿਸ਼ੇਸ਼ ਮੰਨ ਕੇ ਉਸ ਨੂੰ ਉਸ ਦੀ ਅਸਲ ਜਨਮ ਮਿਤੀ ਮੁਤਾਬਕ ਹੀ ਬੋਰਡ ਦੇ ਇਮਤਿਹਾਨਾਂ ਵਿੱਚ ਬੈਠਣ ਦੀ ਖੁੱਲ੍ਹ ਦਿੱਤੀ ਹੈ। 8ਵੀਂ ਜਮਾਤ ਤੱਕ ਮਾਊਂਟ ਆਲਿਵ ਸਕੂਲ ਵਿੱਚ ਪੜ੍ਹਿਆ ਇਜ਼ਾਕ ਆਪਣੇ ਭਰਾ-ਭੈਣਾਂ ਵਿੱਚ ਸਭ ਤੋਂ ਵੱਡਾ ਹੈ। ਇਜ਼ਾਕ ਆਖਦਾ ਹੈ, ‘‘ਮੈਂ ਬਹੁਤ ਖੁਸ਼ ਤੇ ਉਤਸ਼ਾਹਤ ਹਾਂ। ਮੈਂ ਸਰ ਇਜ਼ਾਕ ਨਿਊਟਨ ਤੋਂ ਪ੍ਰੇਰਨਾ ਲੈਂਦਾ ਹਾਂ ਤੇ ਮੇਰੀ ਸੋਚ ਹੈ ਕਿ ਮੈਂ ਉਨ੍ਹਾਂ ਵਰਗਾ ਬਣਾਂ। ਸਾਡਾ ਨਾਂ ਵੀ ਇੱਕੋ ਜਿਹਾ ਹੀ ਹੈ।”
ਇਜ਼ਾਕ ਦੇ ਪਿਤਾ ਜੇਮ ਖੋਲੀਅਨ ਵਾਈਫੇਈ ਨੇ ਪਿਛਲੇ ਸਾਲ ਸਿਖਿਆ ਵਿਭਾਗ ਤੋਂ ਆਪਣੇ ਪੁੱਤਰ ਲਈ ਇਸ ਦੀ ਆਗਿਆ ਮੰਗੀ ਸੀ। ਉਨ੍ਹਾਂ ਨੇ ਆਪਣੀ ਅਰਜ਼ੀ ਵਿੱਚ ਕਿਹਾ ਸੀ ਕਿ ਉਨ੍ਹਾਂ ਦੇ ਬੇਟੇ ਨੂੰ ਮੈਟ੍ਰਿਕ ਪ੍ਰੀਖਿਆ ਵਿੱਚ ਬੈਠਣ ਦਿੱਤਾ ਜਾਵੇ। ਉਨ੍ਹਾਂ ਦੀ ਅਰਜ਼ੀ 'ਤੇ ਸਿਖਿਆ ਵਿਭਾਗ ਦੇ ਕਮਿਸ਼ਨਰ ਨੇ ਬੱਚੇ ਦਾ ਮਨੋਵਿਗਿਆਨਕ ਟੈਸਟ ਲੈਣ ਦੇ ਹੁਕਮ ਦਿੱਤੇ ਸਨ। ਟੈਸਟਾਂ ਮੁਤਾਬਕ ਡਾਕਟਰੀ ਮਨੋਵਿਗਿਆਨਕ ਵਿਭਾਗ ਰਿਮਸ (ਇੰਫਾਲ) ਨੇ ਇਜ਼ਾਕ ਦੀ ਦਿਮਾਗੀ ਉਮਰ 17 ਸਾਲ ਪੰਜ ਮਹੀਨੇ ਦੱਸੀ। ਇਜ਼ਾਕ ਦਾ ਆਈ ਕਿਊਂ ਲੈਵਲ 141 ਮਾਪਿਆ ਗਿਆ ਹੈ ਜਿਹੜਾ ਕਾਫੀ ਤੇਜ਼ ਦਿਮਾਗ ਵਾਲਿਆਂ ਦਾ ਹੁੰਦਾ ਹੈ। ਨਿਯਮਾਂ ਮੁਤਾਬਕ ਇੱਕ ਅਪ੍ਰੈਲ ਤੱਕ 15 ਸਾਲ ਦੀ ਉਮਰ ਪਾਰ ਕਰਨ ਵਾਲੇ ਬੱਚਿਆਂ ਨੂੰ ਹੀ ਬੋਰਡ ਦੇ ਦਸਵੀਂ ਦੇ ਇਮਤਿਹਾਨਾਂ ਵਿੱਚ ਬੈਠਣ ਦੀ ਇਜਾਜ਼ਤ ਦਿੱਤੀ ਜਾਂਦੀ ਹੈ।