ਲੇਗਨੀ ਬੇਰਾਨ, 21 ਅਕਤੂਬਰ (ਪੋਸਟ ਬਿਊਰੋ)- ਸਤੰਬਰ ਦੇ ਅਖੀਰਲੇ ਵੀਰਵਾਰ ਇਸ ਦੇਸ਼ ਦੀ 22 ਸਾਲਾ ਸੋਸ਼ਲ ਮੀਡੀਆ ਆਈਕਨ ਤਾਰਾ ਫਾਰੇਸ ਨੂੰ ਬਗਦਾਦ ਵਿੱਚ ਗੋਲੀ ਮਾਰ ਦਿੱਤੀ ਗਈ ਸੀ। ਅਗਸਤ ਵਿੱਚ ਉਹ ਵੀਰਵਾਰ ਦਾ ਹੀ ਦਿਨ ਸੀ, ਜਦ ਇੱਕ ਮਸ਼ਹੂਰ ਬਿਊਟੀਸ਼ੀਅਨ ਆਪਣੇ ਘਰ ਮਰੀ ਹੋਈ ਮਿਲੀ ਸੀ। ਉਸ ਦੇ ਪਹਿਲੇ ਵੀਰਵਾਰ ਇਰਾਕ ਦੀ ਬਾਰਬੀ ਕਹੀ ਜਾਂਦੀ ਪਲਾਸਟਿਕ ਸਰਜਨ ਦੀ ਭੇਤਭਰੀ ਹਾਲਤ ਵਿੱਚ ਮੌਤ ਹੋ ਗਈ। ਫਿਰ ਸਾਬਕਾ ਮਿਸ ਇਰਾਕ ਸ਼ਿਮਾ ਕਾਸਿਮ ਅਬਦੁਲ ਰਹਿਮਾਨ ਨੂੰ ਕਿਹਾ ਗਿਆ ਕਿ ਉਹ ਵੀ ਵੀਰਵਾਰ ਨੂੰ ਮਰੇ ਹੋਏ ਲੋਕਾਂ ਵਿੱਚੋਂ ਹੋ ਸਕਦੀ ਹੈ।
ਸਾਲ 2015 ਵਿੱਚ ਮਿਸ ਇਰਾਕ ਦਾ ਖਿਤਾਬ ਜਿੱਤਣ ਵਾਲੀ ਸ਼ਿਮਾ ਦੱਸਦੀ ਹੈ ਕਿ ਉਸ ਨੂੰ ਆਈ ਐੱਸ ਆਈ ਐੱਸ ਦੇ ਲੋਕਾਂ ਵੱਲੋਂ ਲਗਾਤਾਰ ਧਮਕੀਆਂ ਮਿਲ ਰਹੀਆਂ ਹਨ, ਪਰ ਪਾਰੇਸ ਦੇ ਕਤਲ ਅਤੇ ਅਗਲਾ ਨਿਸ਼ਾਨਾ ਬਣਾਏ ਜਾਣ ਦੀ ਚਿਤਾਵਨੀ ਮਿਲਣ ਪਿੱਛੋਂ ਸ਼ਿਮਾ ਨੇ ਜਾਰਡਨ ਭੱਜਣ ਦਾ ਫੈਸਲਾ ਕੀਤਾ। ਉਨ੍ਹਾਂ ਨੇ ਅੱਠ ਅਕਤੂਬਰ ਨੂੰ ਕੁਰਦਿਸ਼ ਨਿਊਜ਼ ਸਾਈਟ ਰੂਦਾ ਨੂੰ ਕਿਹਾ, ਉਨ੍ਹਾਂ ਨੇ ਕਈ ਲੋਕਾਂ ਨੂੰ ਚਿੱਟੇ ਦਿਨ ਮਾਰ ਦਿੱਤਾ ਹੈ। ਇੰਸਟਾਗ੍ਰਾਮ ਸਟਾਰ ਇਸਰਾ ਅਲ ਓਬੇਦੀ, ਐਕਟੀਵਿਸਟ ਯਨਰ ਮੁਹੰਮਦ ਸਮੇਤ ਕਈ ਮਸ਼ਹੂਰ ਇਰਾਕੀ ਹਸਤੀਆਂ ਵਿੱਚੋਂ ਸ਼ਿਮਾ ਵੀ ਸ਼ਾਮਲ ਹੈ, ਜੋ ਜਾਨ ਬਚਾਉਣ ਲਈ ਵਿਦੇਸ਼ ਭੱਜ ਗਏ ਹਨ। ਕਤਲਾਂ ਅਤੇ ਧਮਕੀਆਂ ਦੇ ਇਸ ਦੌਰ ਕਾਰਨ ਇਰਾਕ ਵਿੱਚ ਦਹਿਸ਼ਤ ਦਾ ਮਾਹੌਲ ਹੈ। ਉਨ੍ਹਾਂ ਔਰਤਾਂ ਦੇ ਖਿਲਾਫ ਸੋਚੀ ਸਮਝੀ ਸਾਜ਼ਿਸ਼ ਦੀ ਮੁਹਿੰਮ ਛੇੜੀ ਗਈ ਹੈ, ਜਿਨ੍ਹਾਂ ਨੇ ਖੁੱਲ੍ਹ ਕੇ ਸਾਹਮਣੇ ਆਉਣ ਅਤੇ ਲੈਂਗਿਕ ਭੇਤਭਾਵ ਨੂੰ ਖਤਮ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। ਇਰਾਕ ਛੱਡਣ ਤੋਂ ਕੁਝ ਸਮਾਂ ਪਹਿਲਾਂ ਯਨਰ ਮੁਹੰਮਦ ਨੇ ਏਅਰਪੋਰਟ 'ਤੇ ਮੀਡੀਆ ਨੂੰ ਦੱਸਿਆ ਕਿ ਉਨ੍ਹਾਂ ਔਰਤਾਂ ਦੇ ਕਤਲ ਹੋਏ ਹਨ, ਜਿਨ੍ਹਾਂ ਨੇ ਆਪਣਾ ਚਿਹਰਾ ਅਤੇ ਸਰੀਰ ਦਿਖਾਇਆ, ਜੋ ਔਰਤਾਂ ਦੇ ਅਧਿਕਾਰਾਂ 'ਤੇ ਖੁੱਲ੍ਹ ਕੇ ਬੋਲਦੀਆਂ ਸਨ ਅਤੇ ਜਿਨ੍ਹਾਂ ਨੇ ਪੁਰਾਣੇ ਇਸਲਾਮੀ ਤੌਰ-ਤਰੀਕੇ ਨਹੀਂ ਅਪਣਾਏ।
ਇਰਾਕੀ ਮਹਿਲਾ ਨੈੱਟਵਰਕ ਦੀ ਮੁਖੀ ਹੰਨਾ ਐਡਵਾਰ ਨੇ ਟਾਈਮ ਨੂੰ ਦੱਸਿਆ ਕਿ ਭਾਵੇਂ ਕਿਸੇ ਇੱਕ ਗਰੁੱਪ ਨੇ ਸਾਰੀਆਂ ਹੱਤਿਆਵਾਂ ਨਹੀਂ ਕੀਤੀਆਂ, ਫਿਰ ਵੀ ਉਨ੍ਹਾਂ ਦੇ ਅੱਤਵਾਦੀ ਸੋਚ-ਵਿਚਾਰ ਦਾ ਤਰੀਕਾ ਇਹੀ ਹੈ ਕਿ ਉਹ ਔਰਤਾਂ ਨੂੰ ਜਨਤਕ ਜੀਵਨ ਵਿੱਚ ਸਰਗਰਮ ਨਹੀਂ ਦੇਖਣਾ ਚਾਹੁੰਦੇ। ਕਿਸੇ ਸਮੇਂ ਇਰਾਕ ਵਿੱਚ ਔਰਤਾਂ ਨੂੰ ਬਹੁਤ ਜ਼ਿਆਦਾ ਖੁੱਲ੍ਹ ਸੀ, ਪਰ 2003 ਦੇ ਬਾਅਦ ਔਰਤਾਂ ਦੇ ਅਧਿਕਾਰਾਂ ਵਿੱਚ ਗਿਰਾਵਟ ਆਈ ਹੈ। ਅਮਰੀਕੀ ਅਗਵਾਈ ਦੇ ਗਠਜੋੜ ਵੱਲੋਂ ਸੱਦਾਮ ਹੁਸੈਨ ਸ਼ਾਸਨ ਦਾ ਅੰਤ ਕਰਨ ਦੇ ਬਾਅਦ ਅੱਤਵਾਦੀ ਅਨਸਰ ਪੈਦਾ ਹੋਏ ਹਨ।
ਐਡਵਾਰ ਕਹਿੰਦੀ ਹੈ, ਅੱਤਵਦੀ ਸੰਗਠਨ ਦੱਸਣਾ ਚਾਹੁੰਦੇ ਹਨ ਕਿ ਲੋਕਾਂ ਦੀ ਸੁਰੱਖਿਆ ਉਨ੍ਹਾਂ ਦੇ ਹੱਥ ਹੈ ਸਰਕਾਰ ਦੇ ਨਹੀਂ। ਇਰਾਕ ਵਿੱਚ ਚੋਣਾਂ ਦੇ ਕਰੀਬ ਪੰਜ ਮਹੀਨੇ ਪਿੱਛੋਂ ਇਸ ਮਹੀਨੇ ਨਵੀਂ ਸਰਕਾਰ ਬਣ ਜਾਣੀ ਹੈ। ਮੌਜੂਦਾ ਪ੍ਰਧਾਨ ਮੰਤਰੀ ਹੈਦਰ ਅਲ ਅਬਾਦੀ ਨੇ ਸਾਜ਼ਿਸ਼ ਤਹਿਤ ਅਗਵਾ ਅਤੇ ਕਤਲਾਂ ਵਿੱਚ ਅਣਪਛਾਤੇ ਸੰਗਠਿਤ ਗਿਰੋਹਾਂ ਦਾ ਹੱਥ ਹੋਣ ਦਾ ਦੋਸ਼ ਲਗਾਇਆ ਹੈ। ਇਹ ਗੁਟ ਸਰਕਾਰ ਨੂੰ ਅਸਥਿਰ ਕਰਨ ਦੀ ਕੋਸ਼ਿਸ਼ ਵਿੱਚ ਲੱਗੇ ਹੋਏ ਹਨ।