ਨਵੀਂ ਦਿੱਲੀ, 3 ਦਸੰਬਰ (ਪੋਸਟ ਬਿਊਰੋ)- ਦੂਸਰੀ ਤਿਮਾਹੀ ਵਿੱਚ ਅਰਥਚਾਰੇ ਦੀ ਰਫਤਾਰ ਘਟਣ ਦੇ ਅੰਕੜਿਆਂ ਤੋਂ ਬਾਅਦ ਰੇਟਿੰਗ ਏਜੰਸੀ ਕ੍ਰਿਸਿਲ ਨੇ ਵੀ ਚਾਲੂ ਵਿੱਤੀ ਸਾਲ ਲਈ ਭਾਰਤ ਦੀ ਆਰਥਿਕ ਵਿਕਾਸ ਦਰ ਦੇ ਆਪਣੇ ਅਨੁਮਾਨ ਵਿੱਚ ਭਾਰੀ ਕਟੌਤੀ ਕਰ ਦਿੱਤੀ ਹੈ। ਕ੍ਰਿਸਿਲ ਨੇ ਕਿਹਾ ਕਿ ਸਾਲ 2019-20 ਵਿੱਚ ਭਾਰਤੀ ਅਰਥ ਵਿਵਸਥਾ ਦੀ ਵਿਕਾਸ ਦਰ 5.1 ਫੀਸਦੀ ਰਹੇਗੀ। ਪਹਿਲਾਂ ਇਸ ਨੇ 6.3 ਫੀਸਦੀ ਵਾਧਾ ਦਰ ਦਾ ਅਨੁਮਾਨ ਲਾਇਆ ਸੀ।
ਪਹਿਲੇ ਛੇ ਮਹੀਨੇ ਦੀ ਆਰਥਿਕ ਵਿਕਾਸ ਦਰ 4.8 ਫੀਸਦੀ ਮੁਕਾਬਲੇ ਅਗਲੇ ਛੇ ਮਹੀਨੇ (ਅਕਤੂਬਰ-ਮਾਰਚ) ਦੀ ਵਿਕਾਸ ਦਰ ਵਿੱਚ ਥੋੜ੍ਹੇ ਸੁਧਾਰ ਦੀ ਗੁਜਇੰਸ਼ ਹੈ ਅਤੇ ਇਹ 5.5 ਫੀਸਦੀ ਹੋਵੇਗੀ। ਇਸ ਦੇ ਨਾਲ ਕ੍ਰਿਸਿਲ ਨੇ ਇਹ ਵੀ ਕਿਹਾ ਹੈ ਕਿ ਇਸ ਹਫਤੇ ਕਰੰਸੀ ਨੀਤੀ ਦੀ ਘੋਖ ਦੌਰਾਨ ਆਰ ਬੀ ਆਈ ਵੱਲੋਂ ਰੈਪੋ ਰੇਟ ਵਿੱਚ ਇੱਕ ਵਾਰ ਫਿਰ 25 ਆਧਾਰ ਅੰਕਾਂ (0.25 ਫੀਸਦੀ) ਦੀ ਕਟੌਤੀ ਹੋ ਸਕਦੀ ਹੈ।
ਇੱਕ ਹੋਰ ਨਿਵੇਸ਼ ਸਲਾਹਕਾਰ ਏਜੰਸੀ ਮੋਤੀਲਾਲ ਓਸਵਾਲ ਨੇ ਕੱਲ੍ਹ ਜਾਰੀ ਰਿਪੋਰਟ ਵਿੱਚ ਆਖਿਆ ਹੈ ਕਿ ਚਾਲੂ ਤਿਮਾਹੀ ਅਕਤੂਬਰ-ਦਸੰਬਰ 2019 ਦੌਰਾਨ ਵਿਕਾਸ ਦਰ ਹੋਰ ਘੱਟ ਜਾਵੇਗੀ। ਇਕੋਸਕੋਪ ਦੇ ਨਾਮ ਨਾਲ ਜਾਰੀ ਰਿਪੋਰਟ ਵਿੱਚ ਇਸ ਏਜੰਸੀ ਨੇ ਵਿਕਾਸ ਦਰ ਘੱਟ ਕਰਕੇ 4 ਫੀਸਦੀ ਦੇ ਪੱਧਰ 'ਤੇ ਆ ਜਾਣ ਦੀ ਗੱਲ ਕਹੀ ਹੈ। ਇਸ ਨਿਰਾਸ਼ਾ ਜਨਕ ਅਨੁਮਾਨ ਦੇ ਪਿੱਛੇ ਇਸ ਨੇ ਸਭ ਤੋਂ ਵੱਡਾ ਕਾਰਨ ਇਹ ਦੱਸਿਆ ਕਿ ਖਪਤਕਾਰਾਂ ਵੱਲੋਂ ਹੋ ਰਹੇ ਖਰਚ ਵਿੱਚ ਸੁਧਾਰ ਦੇ ਸੰਕੇਤ ਨਹੀਂ ਮਿਲ ਰਹੇ। ਖਪਤਕਾਰਾਂ ਵਿੱਚ ਨਿਰਾਸ਼ਾ ਦੇ ਕਾਰਨ ਇਸ ਸਾਲ ਦਾ ਤਿਉਹਾਰੀ ਸੀਜ਼ਨ ਪਿਛਲੇ ਕਈ ਸਾਲਾਂ ਦੇ ਸਭ ਤੋਂ ਖਰਾਬ ਰਿਹਾ ਹੈ ਤੇ ਕਈ ਖਪਤਕਾਰ ਉਤਪਾਦਾਂ ਦੀ ਮੰਗ ਤਿਉਹਾਰਾਂ ਦੇ ਬਾਵਜੂਦ ਨਹੀਂ ਵਧੀ। ਇਸ ਆਧਾਰ 'ਤੇ ਇਸ ਨੇ ਚਾਲੂ ਵਿੱਤੀ ਸਾਲ ਲਈ ਵਿਕਾਸ ਦਰ ਅਨੁਮਾਨ ਨੂੰ 5.7 ਫੀਸਦੀ ਤੋਂ ਘਟਾ ਕੇ 4 ਫੀਸਦੀ ਕਰ ਦਿੱਤਾ।
ਕ੍ਰਿਸਿਲ ਦੀ ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਬੀਤੇ ਸਾਲਾਂ ਵਿੱਚ ਵੱਡੇ ਸੁਧਾਰਾਂ ਦੇ ਬਾਵਜੂਦ ਭਾਰਤ ਦੀ ਵਿਕਾਸ ਦਰ ਵਿੱਚ ਇੰਨੀ ਤੇਜ਼ ਗਿਰਾਵਟ ਸਚਮੁੱਚ ਵੱਡੀ ਚਿੰਤਾ ਦੀ ਗੱਲ ਹੈ। ਮੰਦੀ ਦਾ ਪੱਧਰ ਅਨੁਮਾਨ ਤੋਂ ਵੱਧ ਹੈ। ਤੇਜ਼ੀ ਨਾਲ ਗਿਰਾਵਟ ਦਾ ਇਹ ਦੌਰ ਵੀ ਅੱਗੇ ਜਾਰੀ ਰਹਿ ਸਕਦਾ ਹੈ।