ਭੋਪਾਲ, 3 ਦਸੰਬਰ (ਪੋਸਟ ਬਿਊਰੋ)- ਗੁਗਲ ਨੇ ਦਾਅਵਾ ਕੀਤਾ ਹੈ ਕਿ ਹਿੰਦੀ ਸਮੇਤ ਸਭ ਭਾਰਤੀ ਭਾਸ਼ਾਵਾਂ ਦੇ ਅਨੁਕੁਲ ਸਾਫਟਵੇਅਰ ਵਿਕਸਿਤ ਕਰਨ ਨਾਲ ਗੁਗਲ ਨੇ ਭਾਰਤ ਵਿੱਚ ਆਪਣੀ ਪਹੁੰਚ ਦਾ ਚੰਗਾ ਵਿਸਥਾਰ ਕੀਤਾ ਹੈ।
ਇਸ ਸੰਬੰਧ ਵਿੱਚ ਗੁਗਲ ਇੰਡੀਆ ਦੀ ਸੀਨੀਅਰ ਪ੍ਰੋਡਕਟ ਮੈਨੇਜਰ ਨਿਧੀ ਗੁਪਤਾ ਨੇ ਕੱਲ੍ਹ ਏਥੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਸਾਲ 2014 ਵਿੱਚ ਗੁਗਲ ਵਿੱਚ ਜਿੱਥੇ ਭਾਰਤੀ ਭਾਸ਼ਾਵਾਂ ਦੀ ਸਰਚ ਦੋ ਫੀਸਦੀ ਸੀ, ਸਾਲ 2019 ਵਿੱਚ ਵਧ ਕੇ 20 ਫੀਸਦੀ ਹੋ ਗਈ ਹੈ। ਭਾਰਤ ਵਿੱਚ ਵਾਇਸ ਸਰਚਿੰਗ 270 ਫੀਸਦੀ ਸਾਲ ਦੀ ਰਫਤਾਰ ਨਾਲ ਵੱਧ ਰਹੀ ਹੈ। ਉਨ੍ਹਾਂ ਦੱਸਿਆ ਕਿ ਗੁਗਲ ਨੇ 2014 ਵਿੱਚ ਵਾਇਸ ਸਰਚ ਸੁਵਿਧਾ ਹਿੰਦੀ ਵਿੱਚ ਸ਼ੁਰੂ ਕੀਤੀ ਸੀ, ਅੰਗਰੇਜ਼ੀ ਵਿੱਚ ਇਹ ਸੁਵਿਧਾ 2008 ਤੋਂ ਚੱਲ ਰਹੀ ਸੀ। ਨਿਧੀ ਗੁਪਤਾ ਨੇ ਦੱਸਿਆ ਕਿ ਇੱਕ ਅਨੁਮਾਨ ਅਨੁਸਾਰ ਇਸ ਵੇਲੇ ਭਾਰਤ ਵਿੱਚ ਇੰਟਰਨੈਟ ਯੂਜ਼ਰਜ਼ ਦੀ ਗਿਣਤੀ ਲਗੱਭਗ 46 ਕਰੋੜ ਹੈ ਅਤੇ ਭਾਰਤ ਵਿੱਚ ਆਨਲਾਈਨ ਵਾਲੇ ਯੂਜ਼ਰਜ਼ ਵਿੱਚੋਂ 90 ਫੀਸਦੀ ਭਾਰਤੀ ਭਾਸ਼ਾ ਵਾਲ ਹਨ। ਉਨ੍ਹਾਂ ਨੇ ਦੱਸਿਆ ਕਿ ਇਸ ਵੇਲੇ ਭਾਰਤ ਵਿੱਚ 38 ਤੋਂ 40 ਕਰੋੜ ਲੋਕ ਸਮਾਰਟ ਫੋਨ ਵਰਤਦੇ ਹਨ।