* 20 ਨਵੰਬਰ ਦੀ ਘਟਨਾ ਲਈ ਜਾਂਚ ਪਿੱਛੋਂ ਕਾਰਵਾਈ
ਮੋਹਾਲੀ, 3 ਦਸੰਬਰ (ਪੋਸਟ ਬਿਊਰੋ)- ਆਪਣੇ ਪ੍ਰਸ਼ੰਸਕਾਂ ਦੇ ਨਾਲ ਮੋਹਾਲੀ ਦੀਆਂ ਸੜਕਾਂ 'ਤੇ ਟਰੈਫਿਕ ਨਿਯਮ ਤੋੜਨ ਵਾਲੇ ਪੰਜਾਬੀ ਗਾਇਕ ਕਰਣ ਔਜਲਾ ਦਾ ਟਰੈਫਿਕ ਪੁਲਸ ਨੇ ਆਖਰ ਚਲਾਨ ਕੱਟ ਦਿੱਤਾ ਹੈ। ਪੁਲਸ ਦਾ ਨੋਟਿਸ ਮਿਲਣ ਉੱਤੇ ਡੀ ਐੱਸ ਪੀ ਟਰੈਫਿਕ ਗੁਰਇਕਬਾਲ ਸਿੰਘ ਨੂੰ ਮਿਲਣ ਪਹੁੰਚੇ ਕੱਲ੍ਹ ਕਰਣ ਔਜਲਾ ਨੂੰ ਉਨ੍ਹਾਂ ਦੀ ਮਰਸੀਡੀਜ਼ ਗੱਡੀ ਦੇ ਚਲਾਣ ਦੀ ਕਾਪੀ ਦਿੱਤੀ ਗਈ। ਕਰਣ ਦੇ ਨਾਲ ਕਾਫਲੇ ਵਿੱਚ ਸ਼ਾਮਲ ਕੁੱਲ ਅੱਠ ਗੱਡੀਆਂ ਨੂੰ ਟਰੇਸ ਕਰ ਕੇ ਉਨ੍ਹਾਂ ਦੇ ਚਲਾਣ ਵੀ ਕੱਟੇ ਗਏ ਹਨ, ਪਰ ਕਰਣ ਔਜਲਾ ਦੇ ਖਤਰਨਾਕ ਤਰੀਕੇ ਨਾਲ ਗੱਡੀ ਚਲਾਉਣ, ਪ੍ਰੈਸ਼ਰ ਹਾਰਨ, ਤੇਜ਼ ਆਵਾਜ਼ ਵਿੱਚ ਗਾਣੇ ਸੁਣਨ ਅਤੇ ਰੈਡ ਲਾਈਟ ਜੰਪ ਕਰਨ ਦੇ ਚਲਾਣ ਕੱਟੇ ਗਏ ਹਨ।
ਇਸ ਸੰਬੰਧ ਵਿੱਚ ਡੀ ਐੱਸ ਪੀ ਟਰੈਫਿਕ ਗੁਰਇਕਬਾਲ ਸਿੰਘ ਨੇ ਕਰਣ ਔਜਲਾ ਨੂੰ ਕਿਹਾ ਕਿ ਵਿਦੇਸ਼ ਵਿੱਚ ਰੂਲ ਫਾਲੋ ਕਰਦੇ ਹੋ, ਇਥੇ ਕਿਉਂ ਨਹੀਂ ਕਰਦੇ? ਜਵਾਬ ਵਿੱਚ ਕਰਣ ਔਜਲਾ ਨੇ ਕਿਹਾ ਕਿ ਮੈਨੂੰ ਪਤਾ ਨਹੀਂ ਸੀ ਕਿ ਪੰਜਾਬ ਵਿੱਚ ਇੰਨੀ ਸਖਤੀ ਹੋ ਚੁੱਕੀ ਹੈ। ਉਸ ਨੇ ਨਿਯਮ ਤੋੜਨ ਦੀ ਮੁਆਫੀ ਮੰਗੀ ਅਤੇ ਕਿਹਾ ਕਿ ਉਹ ਆਰ ਟੀ ਓ ਦਫਤਰ ਜਾ ਕੇ ਜਲਦੀ ਹੀ ਆਪਣਾ ਚਲਾਣ ਭੁਗਤ ਲਵੇਗਾ।
ਵਰਨਣ ਯੋਗ ਹੈ ਕਿ ਕਰਣ ਔਜਲਾ 20 ਨਵੰਬਰ ਨੂੰ ਚੰਡੀਗੜ੍ਹ ਏਅਰਪੋਰਟ 'ਤੇ ਪਹੁੰਚੇ ਸਨ। ਗੇਟ ਤੋਂ ਬਾਹਰ ਆਉਂਦੇ ਸਾਰ ਫੈਨਸ ਅਤੇ ਦੋਸਤਾਂ ਨੇ ਉਨ੍ਹਾਂ ਨੂੰ ਘੇਰ ਲਿਆ ਤੇ ਉਥੋਂ ਸਾਰੇ ਇਕੱਠੇ ਨਿਕਲੇ। ਏਅਰਪੋਰਟ ਦੇ ਬਾਹਰ 200 ਫੁੱਟੀ ਰੋਡ ਉੱਤੇ ਆਉਂਦੇ ਸਾਰ ਗੱਡੀਆਂ ਦੇ ਸਪੀਕਰ ਤੇਜ਼ ਕਰ ਦਿੱਤੇ ਗਏ। ਕਰਣ ਔਜਲਾ ਆਪਣਾ ਗਾਣਾ ਸੁਣ ਕੇ ਗੱਡੀ ਦਾ ਸਨਰੂਫ ਖੋਲ੍ਹ ਕੇ ਬਾਹਰ ਖੜ੍ਹੇ ਹੋ ਗਏ। ਦੇਖੋ-ਦੇਖੀ ਫੈਨਸ ਅਤੇ ਦੋਸਤ ਵੀ ਗੱਡੀਆਂ ਦੀਆਂ ਖਿੜਕੀਆਂ ਵਿੱਚੋਂ ਬਾਹਰ ਨੂੰ ਲਟਕ ਗਏ ਅਤੇ ਹੱਲਾ ਗੁੱਲਾ ਕਰਨ ਲੱਗੇ। ਕੱਲ੍ਹ ਡੀ ਐੱਸ ਪੀ ਟਰੈਫਿਕ ਦੇ ਕਮਰੇ ਤੋਂ ਬਾਹਰ ਆਉਂਦੇ ਕਰਣ ਔਜਲਾ ਤੋਂ ਜਦੋਂ ਮੀਡੀਆ ਨੇ ਟਰੈਫਿਕ ਨਿਯਮ ਤੋੜਨ ਦਾ ਕਾਰਨ ਪੁੱਛਿਆ ਤਾਂ ਉਹ ਭੜਕ ਕੇ ਬੋਲੇ ਕਿ ਵੀਰ ਕਤਲ ਥੋੜ੍ਹਾ ਕੀਤਾ ਏ, ਵਾਇਲੇਸ਼ਨ ਕੀਤਾ ਸੀ, ਚਲਾਣ ਕੱਟਿਆ ਗਿਆ, ਜਾ ਕੇ ਭਰ ਦਵਾਂਗਾ, ਤੁਸੀਂ ਤਾਂ ਮਗਰ ਹੀ ਪੈ ਗਏ।