ਕੁਰਾਲੀ, 2 ਦਸੰਬਰ (ਪੋਸਟ ਬਿਊਰੋ)- ਨੇੜਲੇ ਪਿੰਡ ਖਿਜ਼ਰਾਬਾਦ ਤੋਂ ਹਰਿਆਣਾ ਦੇ ਜੀਂਦ ਨੇੜੇ ਇੱਕ ਵਿਆਹ 'ਚ ਗਏ ਚਾਰ ਦੋਸਤਾਂ ਦੀ ਸੜਕ ਹਾਦਸੇ ਵਿੱਚ ਮੌਤ ਹੋ ਗਈ। ਇਹ ਸਾਰੇ ਮਿਲ ਕੇ ਲੱਕੜ ਦਾ ਕਾਰੋਬਾਰ ਕਰਦੇ ਸਨ।
ਪਤਾ ਲੱਗਾ ਹੈ ਕਿ ਖਿਜ਼ਰਾਬਾਦ ਵਿੱਚ ਲੱਕੜ ਦਾ ਕਾਰੋਬਾਰ ਕਰਨ ਵਾਲੇ ਰਾਮ ਸਿੰਘ ਵਾਸੀ ਮਾਜਰੀ ਕਲੋਨੀ ਦੇ ਦੋਸਤ ਦਾ ਹਰਿਆਣੇ ਦੇ ਜੀਂਦ ਨੇੜੇ ਕਿਸੇ ਪਿੰਡ ਵਿੱਚ ਵਿਆਹ ਸੀ। ਇਸ ਵਿਆਹ ਲਈ ਦੋਸਤ ਵੱਲੋਂ ਰਾਮ ਸਿੰਘ ਨਾਲ ਕਾਰੋਬਾਰ ਕਰਨ ਵਾਲੇ ਉਸ ਦੇ ਤਿੰਨਾਂ ਸਾਥੀਆਂ ਨੂੰ ਵੀ ਸੱਦਾ ਦਿੱਤਾ ਸੀ। ਵਿਆਹ ਵਿੱਚ ਸ਼ਾਮਲ ਹੋਣ ਲਈ ਚਾਰੋਂ ਜਣੇ ਆਪਣੀ ਆਲਟੋ ਕਾਰ 'ਚ ਕੱਲ੍ਹ ਖਿਜ਼ਰਾਬਾਦ ਤੋਂ ਗਏ ਸਨ। ਓਥੋਂ ਵਿਆਹ ਦੇ ਬਾਅਦ ਜਦੋਂ ਚਾਰੋਂ ਜਣੇ ਵਾਪਸ ਪਰਤ ਰਹੇ ਸਨ ਤਾਂ ਰਾਤ ਕੈਥਲ ਤੇ ਪਿਹੋਵਾ ਵਿਚਾਲੇ ਉਨ੍ਹਾਂ ਦੀ ਕਾਰ ਦੀ ਟਰੱਕ ਨਾਲ ਟੱਕਰ ਹੋ ਗਈ। ਇਸ ਹਾਦਸੇ ਵਿੱਚ ਦੋ ਜਣਿਆਂ ਦੀ ਮੌਕੇ 'ਤੇ ਮੌਤ ਹੋ ਗਈ ਤੇ ਦੋ ਹੋਰ ਹਸਪਤਾਲ ਪੁੱਜਣ ਤੋਂ ਪਹਿਲਾਂ ਹੀ ਦਮ ਤੋੜ ਗਏ। ਮ੍ਰਿਤਕਾਂ ਦੀ ਪਛਾਣ ਰਾਮ ਸਿੰਘ ਵਾਸੀ ਮਾਜਰੀ ਕਲੋਨੀ, ਸੁਰਿੰਦਰ ਕੁਮਾਰ ਵਾਸੀ ਖਿਜ਼ਰਾਬਾਦ, ਰਜਿੰਦਰਪਾਲ ਵਾਸੀ ਖਿਜ਼ਰਾਬਾਦ ਅਤੇ ਭੂਸ਼ਣ ਸਿੰਘ ਵਾਸੀ ਹਰੀਪੁਰ ਬਰਦਾਰ ਵਜੋਂ ਹੋਈ ਹੈ। ਸਾਰੇ ਮ੍ਰਿਤਕ ਵਿਆਹੇ ਹੋਏ ਸਨ ਤੇ ਚਾਰਾਂ ਦੇ ਹੀ ਇੱਕ-ਇੱਕ ਲੜਕਾ ਅਤੇ ਇੱਕ-ਇੱਕ ਲੜਕੀ ਹੈ। ਆਪੋ-ਆਪਣੇ ਪਰਵਾਰ ਵਿੱਚ ਕਮਾਉਣ ਵਾਲੇ ਉਹ ਇਕਲੌਤੇ ਹੀ ਸਨ।