ਬਰੈਪਟਨ, 28 ਨਵੰਬਰ (ਪੋਸਟ ਬਿਊਰੋ)- ਟੋਰਾਂਟੋ ਸਥਿਤ ਭਾਰਤੀ ਕੌਂਸਲਰ ਜਨਰਲ ਦੇ ਦਫ਼ਤਰ ’ਚ ਕੁੱਝ ਸਮਾਂ ਪਹਿਲਾਂ ਅਹੁਦਾ ਸੰਭਾਲ ਚੁੱਕੀ ਕੌਂਸਲਰ ਜਨਰਲ ਸ਼੍ਰੀਮਤੀ ਅਪੂਰਵਾ ਸ਼੍ਰੀਵਾਸਤਾ ਨਾਲ ਕੈਨੇਡੀਅਨ ਪੰਜਾਬੀ ਬ੍ਰਾਡਕਾਸਟਰਜ਼ ਐਸੋਸੀਏਸ਼ਨ ਵਲੋਂ ਇਕ ਵਿਸੇਸ਼ ਬੈਠਕ ਕੀਤੀ ਗਈ।ਇਸ ਵਿਚ ਵੱਖ-ਵੱਖ ਮੀਡੀਆ ਕਰਮੀਆਂ ਨੇ ਆਪਣੇ ਨੁਕਤੇ ਨਿਗ੍ਹਾ ਤੋਂ ਭਾਰਤੀ ਮੂਲ ਦੇ ਭਾਈਚਾਰੇ ਨੂੰ ਦਰਪੇਸ਼ ਸਮੱਸਿਆਵਾਂ ਦਾ ਖੁਲ੍ਹ ਕੇ ਵਿਚਾਰ ਵਟਾਂਦਰਾ ਕੀਤਾ।ਲਗਭਗ ਹਰ ਮੀਡੀਆ ਕਰਮੀ ਨੇ ਭਾਰਤੀ ਕੌਂਸਲਰ ਜਨਰਲ ਵਲੋਂ ਇਸ ਸਮੇਂ ਦਿੱਤੀਆਂ ਜਾ ਰਹੀਆਂ ਸੇਵਾਵਾਂ ਦੀ ਸ਼ਲਾਘਾ ਕੀਤੀ ਅਤੇ ਇਸ ਨੂੰ ਹੋਰ ਬਿਹਤਰ ਬਣਾਉਣ ਲਈ ਵੀ ਆਪਣੀਆਂ ਦਲੀਲਾਂ ਦਿੱਤੀਆਂ।ਬ੍ਰਾਡਕਾਸਟਰਜ਼ ਐਸੋਸੀਏਸ਼ਨ ਦੇ ਕੋਆਰਡੀਨੇਟਰ ਜਗਦੀਸ਼ ਗਰੇਵਾਲ ਨੇ ਜਿਥੇ ਆਏ ਮਹਿਮਾਨ ਤੇ ਮੈਂਬਰਾਂ ਨਾਲ ਸਾਹਿਬ ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550 ਸਾਲਾ ਗੁਰਪੁਰਬ ਦੀਆਂ ਮੁਬਾਰਕਾਂ ਸਾਂਝੀਆਂ ਕੀਤੀਆਂ, ਉਥੇ ਹੀ ਭਾਰਤ ਸਰਕਾਰ ਵਲੋਂ ਕਰਤਾਰਪੁਰ ਸਾਹਿਬ ਦਾ ਲਾਂਘਾ ਖੋਲ੍ਹਣ ਲਈ ਕੀਤੇ ਕੰਮਾਂ ਦੀ ਵੀ ਸ਼ਲਾਘਾ ਕੀਤੀ।ਇਸ ਦੇ ਨਾਲ ਹੀ ਉਨ੍ਹਾਂ ਕੌਂਸਲਰ ਜਨਰਲ ਸਾਹਿਬਾ ਨੂੰ ਲਾਂਘੇ ਰਾਹੀਂ ਕਰਤਾਰਪੁਰ ਸਾਹਿਬ ਦੇ ਦਰਸ਼ਨ ਕਰਨ ਲਈ ਰੱਖੀਆਂ ਸ਼ਰਤਾਂ ਦਾ ਹੋਰ ਪ੍ਰਚਾਰ ਕਰਨ ਦੀ ਅਪੀਲ ਵੀ ਕੀਤੀ।ਉਨ੍ਹਾਂ ਕਿਹਾ ਕਿ ਬਹੁਤ ਸਾਰੇ ਐਨ.ਆਰ.ਆਈਜ਼ ਜਿਥੇ ਇਸ ’ਤੇ ਖੁਸ਼ੀ ਦਾ ਇਜ਼ਹਾਰ ਕਰ ਰਹੇ ਹਨ, ਉਥੇ ਹੀ ਇਹ ਵੀ ਪੁੱਛ ਰਹੇ ਹਨ ਕਿ ਸਾਨੂੰ ਉਧਰ ਜਾਣ ਲਈ ਕੀ-ਕੀ ਕਰਨਾ ਪਏਗਾ।ਇਸ ਦੇ ਨਾਲ ਹੀ ਭਾਰਤ ਤੋਂ ਸਟੱਡੀ ਵੀਜ਼ੇ ’ਤੇ ਆਏ ਵਿਦਿਆਰਥੀਆਂ ਦੀਆਂ ਸਮੱਸਿਆਵਾਂ ਬਾਰੇ ਵੀ ਵਿਚਾਰਾਂ ਕੀਤੀਆਂ ਗਈਆਂ।ਹਮਦਰਦ ਅਖ਼ਬਾਰ ਦੇ ਅਮਰ ਭੁੱਲਰ ਨੇ ਓ.ਸੀ.ਆਈ. ਕਾਰਡ ਬਣਾਉਣ ਲਈ ਜੋ ਸੌਖ ਕੀਤੀ ਗਈ ਹੈ, ਉਸ ਦੀ ਸ਼ਲਾਘਾ ਕੀਤੀ ਤੇ ਉਨ੍ਹਾਂ ਕਿਹਾ ਕਿ ਸਾਨੂੰ ਵੱਧ ਤੋਂ ਵੱਧ ਲੋਕਾਂ ਨੂੰ ਓ.ਸੀ.ਆਈ. ਕਾਰਡ ਲੈਣ ਲਈ ਪ੍ਰੇਰਿਤ ਕਰਨਾ ਚਾਹੀਦਾ ਹੈ।ਸਰਦਾਰੀ ਟੀ.ਵੀ. ਤੋਂ ਰਣਧੀਰ ਰਾਣਾ ਤੇ ਰੌਣਕ ਪੰਜਾਬ ਦੀ ਪ੍ਰੋਗਰਾਮ ਤੋਂ ਸੋਢੀ ਨਾਗਰਾ ਵਲੋਂ ਬਹੁਤ ਸਾਰੇ ਬੇਕਸੂਰੇ ਲੋਕਾਂ ਦੀ ਬੜੇ ਲੰਬੇ ਸਮੇਂ ਤੋਂ ਚੱਲੀ ਆ ਰਹੀ ਬਲੈਕਲਿਸਟ ਨੂੰ ਖਤਮ ਕਰਨ ’ਤੇ ਭਾਰਤ ਸਰਕਾਰ ਦਾ ਧੰਨਵਾਦ ਕੀਤਾ ਗਿਆ।ਇਸੇ ਤਰ੍ਹਾਂ ਰੈਡ ਐਫ.ਐਮ. ਤੋਂ ਸ਼ਮੀਲ, ਸਰਗਮ ਰੇਡੀਓ ਤੋਂ ਡਾ. ਬਲਵਿੰਦਰ, ਦੇਸੀ ਰੰਗ ਤੋਂ ਸੰਦੀਪ ਬਰਾੜ, ਸਾਊਥ ਏਸ਼ੀਅਨ ਬੁਆਏਜ਼ ਤੋਂ ਕੁਲਵਿੰਦਰ ਸ਼ੀਨਾ, ਸਾਰੰਗ ਤੋਂ ਰਾਜਵੀਰ ਬੋਪਾਰਾਏ, ਰਮਜ਼ ਪੰਜਾਬੀ ਤੋਂ ਹਰਜਿੰਦਰ ਗਿੱਲ, ਅਸੀਸ ਤੋਂ ਭੁਪਿੰਦਰ ਸਿੰਘ, ਗੁਰਪ੍ਰੀਤ ਮਾਨ, ਬੌਬ ਦੋਸਾਂਝ, ਸਰਬਜੀਤ ਸਿੰਘ, ਇਕਬਾਲ ਮਾਹਲ, ਜੁਗਰਾਜ ਸਿੱਧੂ ਅਤੇ ਹੋਰ ਮੀਡੀਆ ਕਰਮੀਆਂ ਨੇ ਕੌਂਸਲਰ ਜਨਰਲ ਨਾਲ ਆਪੋ-ਆਪਣੇ ਵਿਚਾਰ ਸਾਂਝੇ ਕੀਤੇ।ਸ਼੍ਰੀਮਤੀ ਅਪੂਰਵਾ ਸ਼੍ਰੀਵਾਸਤਵਾ ਨੇ ਸਭ ਤੋਂ ਪਹਿਲਾ ਤਾਂ ਇਹ ਭਰੋਸਾ ਦਿਵਾਇਆ ਕਿ ਕੌਂਸਲਰ ਜਨਰਲ ਦੇ ਦਫ਼ਤਰ ਦੀਆ ਸੇਵਾਵਾਂ ਬਾਰੇ ਤੁਹਾਨੂੰ ਕੋਈ ਸ਼ਿਕਾਇਤ ਦਾ ਮੌਕਾ ਨਹੀਂ ਮਿਲੇਗਾ।ਇਸ ਦੇ ਨਾਲ ਹੀ ਉਨ੍ਹਾਂ ਆਪਣਾ ਅਹੁਦਾ ਸੰਭਾਲਣ ਤੋਂ ਬਾਅਦ ਭਾਰਤੀ ਮੂਲ ਦੇ ਲੋਕਾਂ ਵਲੋਂ ਮਿਲੇ ਪਿਆਰ-ਸਤਿਕਾਰ ਲਈ ਵੀ ਧੰਨਵਾਦ ਕੀਤਾ।ਉਨ੍ਹਾਂ ਸਾਹਿਬ ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਪ੍ਰਕਾਸ਼ ਪੁਰਬ ਦੀਆਂ ਮੁਬਾਰਕਾਂ ਦਿੰਦਿਆਂ ਕਿਹਾ ਕਿ ਜੇਕਰ ਕੋਈ ਸੰਸਥਾ ਗੁਰਪੁਰਬ ਸਬੰਧੀ ਕੋਈ ਸਾਹਿਬ ਸ਼੍ਰੀ ਗੁਰੂ ਨਾਨਕ ਦੇਵ ਜੀ ਦੀਆਂ ਯਾਦਗਾਰਾਂ ਸਬੰਧੀ ਜਾਂ ਫੇਰ ਉਨ੍ਹਾਂ ਦੇ ਫਲਸਫ਼ੇ ਉਤੇ ਇੰਟਲੈਕਚੂਅਲ ਪੱਧਰ ’ਤੇ ਕਾਨਫਰੰਸ ਵਗੈਰਾ ਕਰਵਾਉਣ ਦੇ ਇਛੁਕ ਹਨ ਤਾਂ ਭਾਰਤ ਸਰਕਾਰ ਉਨ੍ਹਾਂ ਦੀ ਮੱਦਦ ਕਰ ਸਕਦੀ ਹੈ।ਉਨ੍ਹਾਂ ਕੈਨੇਡਾ ’ਚ ਪੰਜਾਬੀਆਂ ਦੀ ਬਹੁਤਾਤ ਦੇਖਦਿਆਂ ਇਹ ਵਿਸ਼ਵਾਸ ਦਿਵਾਇਆ ਕਿ ਮੈਂ ਬੜੀ ਜਲਦੀ ਪੰਜਾਬੀ ’ਚ ਗੱਲਬਾਤ ਕਰਨੀ ਸਿੱਖਾਂਗੀ।ਉਨ੍ਹਾਂ ਕਿਹਾ ਕਿ ਭਾਵੇਂ ਮੇਰਾ ਮਾਧਿਅਮ ਅੰਗ੍ਰੇਜ਼ੀ ਤੇ ਹਿੰਦੀ ਰਿਹਾ ਹੈ, ਪਰ ਕੈਨੇਡਾ ਆ ਕੇ ਇੰਝ ਮਹਿਸੂਸ ਹੋ ਰਿਹਾ ਹੈ ਕਿ ਇਥੇ ਪੰਜਾਬੀ ਸਿੱਖਣੀ ਵੀ ਜਰੂਰੀ ਹੈ।ਅੰਤ ’ਚ ਐਸੋਸੀਏਸ਼ਨ ਵਲੋਂ ਮੈਂਬਰ ਪ੍ਰਭਜੋਤ ਕੈਂਥ ਵਲੋਂ ਤਿਆਰ ਕੀਤੀ ਇਕ ਬਹੁਤ ਹੀ ਖੂਬਸੂਰਤ ਹਰਿਮੰਦਰ ਸਾਹਿਬ ਦੀ ਤਸਵੀਰ ਕੌਂਸਲਰ ਜਨਰਲ ਨੂੰ ਭੇਂਟ ਕੀਤੀ ਗਈ। ਇਸ ਦੇ ਨਾਲ ਹੀ ਡੀ.ਪੀ. ਸਿੰਘ ਦਾ ਉਚੇਚੇ ਤੌਰ ’ਤੇ ਧੰਨਵਾਦ ਕੀਤਾ ਗਿਆ।