ਬਰੈਂਪਟਨ ਪੋਸਟ ਬਿਉਰੋ: ਬਰੈਂਪਟਨ ਵਿੱਚ ਯੂਨੀਵਰਸਿਟੀ ਲਿਆਉਣ ਵਾਸਤੇ ਅਗਲੇ ਕਦਮ ਚੁੱਕਣ ਲਈ ਬਰੈਂਪਟਨ ਸਿਟੀ ਵੱਲੋਂ ਇੱਕ ਵੈੱਬਸਾਈਟ ਤਿਆਰ ਕੀਤੀ ਗਈ ਹੈ। ਬਰੈਂਪਟਨ ਸਿਟੀ ਵੱਲੋਂ ਜਾਰੀ ਕੀਤੇ ਗਏ ਇੱਕ ਪਰੈੱਸ ਰੀਲੀਜ਼ ਮੁਤਾਬਕ ਸਤੰਬਰ 2019 ਵਿੱਚ ਬਰੈਂਪਟਨ ਸਿਟੀ ਵੱਲੋਂ ਬਰੈਂਪਟਨ ਸਾਊਥ ਤੋਂ ਐਮ ਪੀ ਪੀ ਪ੍ਰਭਜੀਤ ਸਿੰਘ ਸਰਕਾਰੀਆ ਅਤੇ ਬਰੈਂਪਟਨ ਵੈਸਟ ਤੋਂ ਐਮ ਪੀ ਪੀ ਅਮਰਜੋਤ ਸਿੰਘ ਸੰਧੂ ਦੀ ਮਦਦ ਨਾਲ ਯੂਨੀਵਰਸਿਟੀ ਬਣਾਉਣ ਲਈ ਸਰਬਸੰਮਤੀ ਨਾਲ ਉੱਦਮ ਆਰੰਭ ਕੀਤਾ ਸੀ।
ਦਿੱਤੀ ਜਾਣਕਾਰੀ ਮੁਤਾਬਕ ਇਸ ਸਾਲ ਐਸੋਸੀਏਸ਼ਨਅ ਆਫ ਮਿਉਂਸਪੈਲਟੀਜ਼ ਉਂਟੇਰੀਓ ਦੀ ਕਾਨਫਰੰਸ ਦੌਰਾਨ ਮਿਨਿਸਟਰੀ ਆਫ ਕਾਲਜ ਅਤੇ ਯੂਨੀਵਰਸਿਟੀ ਵੱਲੋਂ ਵੀ ਬਰੈਂਪਟਨ ਵਿੱਚ ਯੂਨੀਵਰਸਿਟੀ ਦੀ ਤਜ਼ਵੀਜ ਵਿੱਚ ਕਾਫੀ ਦਿਲਚਸਪੀ ਵਿਖਾਈ ਗਈ ਸੀ। ਤਿਆਰ ਕੀਤੀ ਗਈ ਵੈੱਬਸਾਈਟ ਕਾਫੀ ਸਾਧਾਰਣ ਹੈ ਜਿਸ ਵਿੱਚ ਸਿਰਫ਼ ਦੋ ਲਿੰਕ ਹਨ। ਇੱਕ ਲਿੰਕ ‘ਅਸੀਂ ਕਿੱਥੇ ਤੱਕ ਪੁੱਜ ਚੁੱਕੇ ਹਾਂ’ਬਾਰੇ ਹੈ ਅਤੇ ਦੂਜੇ ਲਿੰਕ ਵਿੱਚ ਆਮ ਪੁੱਛੇ ਜਾਣ ਵਾਲੇ ਸੁਆਲਾਂ ਦੇ ਜਵਾਬ ਹਨ। ਵੈੱਬਸਾਈਟ ਉੱਤੇ ਸੰਪਰਕ ਕਰਨ ਲਈ ਇੱਕ ਦਿੱਤੀ ਈਮੇਲ ਤੋਂ ਇਲਾਵਾ ਹੋਰ ਕਿਸੇ ਅਧਿਕਾਰੀ ਜਾਂ ਅਹੁਦੇਦਾਰ ਦਾ ਸੰਪਰਕ ਨਹੀਂ ਦਿੱਤਾ ਗਿਆ। ਯੂਨੀਵਰਸਿਟੀ ਲਿਆਉਣ ਲਈ ਸਤੰਬਰ 2019 ਤੋਂ ਪਹਿਲਾਂ ਦੇ ਹੋ ਚੁੱਕੇ ਯਤਨਾਂ ਜਿਵੇਂ ਕਿ ਬਲਿਊ ਰਿਬਨ ਕਮੇਟੀ ਦਾ ਵੀ ਕੋਈ ਜਿ਼ਕਰ ਵਿਖਾਈ ਨਹੀਂ ਦਿੱਤਾ। ਵਰਨਣਯੋਗ ਹੈ ਕਿ ਕਾਉਂਸਲਰ ਗੁਰਪ੍ਰੀਤ ਢਿੱਲੋਂ ਸਮੇਤ ਕਈ ਸੀਨੀਅਰ ਅਧਿਕਾਰੀ ਬਲਿਊ ਰਿਬਨ ਕਮੇਟੀ ਦੇ ਮੈਂਬਰ ਸਨ। ਇਸ ਵੈੱਬਸਾਈਟ ਦਾ ਐਡਰੈਸ www.bramptonu.ca ਹੈ।