ਟੋਰਾਂਟੋ, 28 ਨਵੰਬਰ (ਪੋਸਟ ਬਿਊਰੋ) : ਕਿੰਗਸਟਨ, ਓਨਟਾਰੀਓ ਦੀ ਪੁਲਿਸ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਹੈ ਕਿ ਸ਼ਹਿਰ ਦੇ ਉੱਤਰਪੱਛਮੀ ਹਿੱਸੇ ਦੇ ਜੰਗਲੀ ਇਲਾਕੇ ਵਿੱਚ ਇੱਕ ਨਿੱਕੇ ਜਹਾਜ਼ ਦੇ ਹਾਦਸਾਗ੍ਰਸਤ ਹੋਣ ਕਾਰਨ ਕਈ ਲੋਕ ਮਾਰੇ ਗਏ।
ਆਨਲਾਈਨ ਜਾਰੀ ਕੀਤੇ ਗਏ ਇੱਕ ਬਿਆਨ ਵਿੱਚ ਪੁਲਿਸ ਨੇ ਆਖਿਆ ਕਿ ਟਰਾਂਸਪੋਰਟ ਕੈਨੇਡਾ ਵੱਲੋਂ ਇਸ ਸਬੰਧ ਵਿੱਚ ਸਾਂਝੀ ਜਾਂਚ ਸੁ਼ਰੂ ਕੀਤੀ ਜਾਵੇਗੀ। ਇਸ ਨਿੱਕੇ ਜਹਾਜ਼ ਨੂੰ ਤਲਾਸ਼ਣ ਲਈ ਰੈਸਕਿਊ ਕ੍ਰਿਊਜ਼, ਹੈਲੀਕਾਪਟਰਜ਼ ਤੇ ਐਮਰਜੰਸੀ ਸੇਵਾਵਾਂ ਦੀ ਮਦਦ ਕਰਨ ਲਈ ਬੁੱਧਵਾਰ ਸ਼ਾਮ ਨੂੰ ਪੁਲਿਸ ਅਧਿਕਾਰੀਆਂ ਨੇ ਕਈ ਸੜਕਾਂ ਬਲਾਕ ਕਰ ਦਿੱਤੀਆਂ।
ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ ਨੇ ਦੱਸਿਆ ਕਿ ਇਹ ਜਹਾਜ਼ ਨਿੱਕਾ ਤੇ ਇਕਹਿਰੇ ਇੰਜਣ ਵਾਲਾ ਜਹਾਜ਼ ਸੀ। ਇਸ ਨੂੰ ਪਾਈਪਰ ਪੀਏ-32 ਆਖਿਆ ਜਾਂਦਾ ਹੈ ਤੇ ਇਸ ਵਿੱਚ ਛੇ ਲੋਕਾਂ ਦੇ ਬੈਠਣ ਦਾ ਪ੍ਰਬੰਧ ਹੈ। ਜਾਂਚਕਾਰਾਂ ਵੱਲੋਂ ਅਜੇ ਜਹਾਜ਼ ਵਿੱਚ ਸਵਾਰ ਲੋਕਾਂ ਦੀ ਗਿਣਤੀ ਬਾਰੇ ਕੋਈ ਜਾਣਕਾਰੀ ਨਹੀਂ ਦਿੱਤੀ ਗਈ ਹੈ। ਇਹ ਵੀ ਅਜੇ ਪਤਾ ਨਹੀਂ ਲੱਗ ਸਕਿਆ ਹੈ ਕਿ ਇਹ ਜਹਾਜ਼ ਪ੍ਰਾਈਵੇਟ ਸੀ ਜਾਂ ਕਮਰਸ਼ੀਅਲ ਸੀ।