ਹਿਊਸਟਨ, 19 ਅਕਤੂਬਰ (ਪੋਸਟ ਬਿਊਰੋ)- ਮਨੁੱਖੀ ਤਸਕਰੀ ਰੋਕਣ ਲਈ ਬਿਹਤਰੀਨ ਕੰਮ ਲਈ ਭਾਰਤੀ ਅਮਰੀਕੀ ਮਹਿਲਾ ਮੀਨਲ ਪਟੇਲ ਨੂੰ ਰਾਸ਼ਟਰਪਤੀ ਪੁਰਸਕਾਰ ਨਾਲ ਸਨਮਾਨਿਤ ਕੀਤਾ ਗਿਆ।
ਹਿਊਸਟਨ ਦੇ ਮੇਅਰ ਸਿਲਵੈਸਟਰ ਟਰਨਰ ਦੀ ਵਿਸ਼ੇਸ਼ ਸਲਾਹਕਾਰ ਮੀਨਲ ਪਟੇਲ ਨੂੰ ਵਿਦੇਸ਼ ਮੰਤਰੀ ਮਾਈਕ ਪੋਂਪੀਓ ਨੇ ‘ਪ੍ਰੈਜ਼ੀਡੈਂਸ਼ੀਅਲ ਮੈਡਲ ਫਾਰ ਕਾਮਬੈਟਿੰਗ ਹਿਊਮਨ ਟ੍ਰੈਫਿਕਿੰਗ' ਐਵਾਰਡ ਨਾਲ ਸਨਮਾਨਿਤ ਕੀਤਾ ਹੈ। ਪਿਛਲੇ ਹਫਤੇ ਹੋਏ ਪੁਰਸਕਾਰ ਸਮਾਰੋਹ 'ਚ ਰਾਸ਼ਟਰਪਤੀ ਡੋਨਾਲਡ ਟਰੰਪ ਵੀ ਮੌਜੂਦ ਸਨ। ਇਸ ਖੇਤਰ 'ਚ ਦੇਸ਼ ਦਾ ਸਰਬੋਤਮ ਪੁਰਸਕਾਰ ਹਾਸਲ ਕਰਨ 'ਤੇ ਉਤਸ਼ਾਹਿਤ ਪਟੇਲ ਨੇ ਕਿਹਾ, ‘ਇਹ ਹੈਰਾਨ ਕਰਨ ਵਾਲਾ ਸੀ। ਮੇਰੇ ਮਾਤਾ ਪਿਤਾ ਭਾਰਤ ਤੋਂ ਆਏ ਸਨ। ਮੈਂ ਅਮਰੀਕਾ 'ਚ ਪੈਦਾ ਹੋਣ ਵਾਲੀ, ਮੇਅਰ ਨਾਲ ਕੰਮ ਕਰਨ ਵਾਲੀ ਤੇ ਫਿਰ ਵ੍ਹਾਈਟ ਹਾਊਸ 'ਚ ਪੁਰਸਕਾਰ ਹਾਸਲ ਕਰਨ ਵਾਲੀ ਆਪਣੇ ਪਰਵਾਰ ਦੀ ਪਹਿਲੀ ਮੈਂਬਰ ਹਾਂ।’ ਨਿਊਯਾਰਕ ਯੂਨੀਵਰਸਿਟੀ ਤੋਂ ਗ੍ਰੇਜੂਏਸ਼ਨ ਤੋਂ ਬਾਅਦ ਪਟੇਲ ਨੇ ਕਨੈਕਟਿਕਟ ਯੂਨੀਵਰਸਿਟੀ ਤੋਂ ਐਮ ਬੀ ਏ ਕੀਤੀ ਸੀ। ਸਾਲ 2015 'ਚ ਉਹ ਮੇਅਰ ਦਫਤਰ 'ਚ ਵਿਸ਼ੇਸ਼ ਸਲਾਹਕਾਰ ਦੇ ਅਹੁਦੇ 'ਤੇ ਨਿਯੁਕਤ ਹੋਈ ਸੀ। ਉਨ੍ਹਾਂ ਉਥੇ ਦੇਸ਼ ਦੇ ਚੌਥੇ ਵੱਡੇ ਸ਼ਹਿਰ 'ਚੋਂ ਮਾਨਵ ਤਸਕਰੀ ਖਤਮ ਕਰਨ ਲਈ ਸ਼ਾਨਦਾਰ ਕੰਮ ਕੀਤਾ। ਉਹ ਟਰਨਰ ਦੇ ‘ਐਂਟੀ ਹਿਊਮਨ ਟ੍ਰੈਫਿਕਿੰਗ ਪਲਾਨ' ਦੇ ਸੰਚਾਲਣ ਉਤੇ ਕੰਮ ਕਰ ਰਹੀ ਹੈ। ਪਟੇਲ ਨੇ ਯੂ ਐਨ ਦੇ ‘ਵਿਸ਼ਵ ਮਾਨਵਤਾਵਾਦੀ ਸੰਮੇਲਨ' ਨੂੰ ਵੀ ਸੰਬੋਧਨ ਕੀਤਾ ਸੀ।