ਨਵੀਂ ਦਿੱਲੀ, 19 ਅਕਤੂਬਰ (ਪੋਸਟ ਬਿਊਰੋ)- ਕੌਮੀ ਡੋਪਿੰਗ ਰੋਕੂ ਏਜੰਸੀ (ਨਾਡਾ) ਨੇ ਹਾਕੀ ਗੋਲਕੀਪਰ ਆਕਾਸ਼ ਚਿਤਕੇ ਉੱਤੇ ਪਾਬੰਦੀ ਸ਼ੁਦਾ ਪਦਾਰਥ ਲੈਣ ਦੇ ਦੋਸ਼ ਵਿੱਚ ਦੋ ਸਾਲ ਦੀ ਪਾਬੰਦੀ ਲਾਈ ਹੈ।
ਇਸ ਸਾਲ ਦੇ ਸ਼ੁਰੂ ਵਿੱਚ ਚਿਤਕੇ ਦਾ ਪ੍ਰੀਖਣ ਪਾਜ਼ੀਟਿਵ ਨਿਕਲਿਆ ਸੀ। ਇਸੇ ਤਰ੍ਹਾਂ ਵੱਖ-ਵੱਖ ਖੇਡਾਂ ਵਿਚਲੇ ਛੇ ਹੋਰ ਖਿਡਾਰੀਆਂ ਨੂੰ ਵੀ ਟੈਸਟ ਪਾਜ਼ੀਟਿਵ ਆਉਣ ਕਾਰਨ ਚਾਰ ਸਾਲ ਲਈ ਸਸਪੈਂਡ ਕੀਤਾ ਗਿਆ ਹੈ। ਆਕਾਸ਼ ਚਿਤਕੇ ਨੂੰ ਨਾਡਾ ਨੇ 27 ਮਾਰਚ ਨੂੰ ਵਕਤੀ ਤੌਰ 'ਤੇ ਸਸਪੈਂਡ ਕੀਤਾ ਸੀ ਅਤੇ ਅੱਠ ਅਕਤੂਬਰ ਨੂੰ ਆਖਰੀ ਸੁਣਵਾਈ ਮਗਰੋਂ ਡੋਪਿੰਗ ਰੋਕੂ ਪੈਨਲ ਨੇ ਉਸ ਉਤੇ ਘੱਟੋ-ਘੱਟ ਦੋ ਸਾਲ ਦੀ ਪਾਬੰਦੀ ਲਾਈ ਹੈ। ਚਿਤਕੇ ਦੇ ਟੈਸਟ ਵਿੱਚ ਪਾਬੰਦੀ ਸ਼ੁਦਾ ਐਨਾਬੋਲਿਕ ਸਟੈਰਾਇਡ ਨੋਰੈਂਡ੍ਰੋਸਟੇਰੋਨ ਪਾਇਆ ਗਿਆ ਸੀ, ਜੋ 27 ਫਰਵਰੀ ਨੂੰ ਬੰਗਲੌਰ ਵਿੱਚ ਸੀਨੀਅਰ ਹਾਕੀ ਟੀਮ ਦੇ ਕੈਂਪ ਵੇਲੇ ਹੋਇਆ। ਏਜੰਸੀ ਦੀ ਵੈਬਸਾਈਟ ਉਤੇ ਇਹ ਅੰਤਿਮ ਆਦੇਸ਼ ਅਪਲੋਡ ਕੀਤਾ ਗਿਆ ਹੈ, ਜਿਸ ਵਿੱਚ ਲਿਖਿਆ ਸੀ ਕਿ ਡੋਪ ਦੀ ਉਲੰਘਣਾ ‘ਜਾਣਬੁੱਝ ਕੇ ਨਹੀਂ ਕੀਤੀ ਗਈ ਸੀ’, ਕਿਉਂਕਿ ਉਸ ਨੇ ਸੱਟ ਕਾਰਨ ਦਵਾਈ ਲਈ ਸੀ।
ਚਿਤਕੇ ਤੋਂ ਇਲਾਵਾ ਹੋਰ ਖੇਡਾਂ ਦੇ ਛੇ ਖਿਡਾਰੀਆਂ ਉੱਤੇ ਡੋਪਿੰਗ ਰੋਕੂ ਜ਼ਾਬਤੇ ਦੀ ਉਲੰਘਣ ਦੇ ਕਾਰਨ ਚਾਰ ਸਾਲ ਲਈ ਪਾਬੰਦੀ ਲਾਈ ਗਈ ਹੈ। ਇਹ ਖਿਡਾਰੀ ਸਾਬਤ ਨਹੀਂ ਕਰ ਸਕੇ ਕਿ ਪਾਬੰਦੀ ਸ਼ੁਦਾ ਪਦਾਰਥ ਉਨ੍ਹਾਂ ਦੇ ਸਰੀਰ ਵਿੱਚ ਪਹੁੰਚਿਆ ਕਿਵੇਂ। ਇਨ੍ਹਾਂ ਵਿੱਚ ਪਹਿਲਵਾਨ ਅਮਿਤ, ਕਬੱਡੀ ਖਿਡਾਰੀ ਪ੍ਰਦੀਪ ਕੁਮਾਰ, ਵੇਟਲਿਫਟਰ ਨਾਰਾਇਣ ਸਿੰਘ, ਅਥਲੀਟ ਸੌਰਭ ਸਿੰਘ, ਬਲਜੀਤ ਕੌਰ ਅਤੇ ਸਿਮਰਜੀਤ ਕੌਰ ਸ਼ਾਮਲ ਹਨ। ਏ ਡੀ ਡੀ ਪੀ ਪੈਨਲ ਦੇ ਮੈਂਬਰਾਂ ਵਿੱਚੋਂ ਇਕ ਓਲੰਪੀਅਨ ਤੇ ਸਾਬਕਾ ਹਾਕੀ ਕਪਤਾਨ ਜਗਬੀਰ ਸਿੰਘ ਹੈ। ਸਾਰੇ ਖਿਡਾਰੀਆਂ ਕੋਲ ਇਸ ਪਾਬੰਦੀ ਖਿਲਾਫ ਅਪੀਲ ਕਰਨ ਲਈ ਤਿੰਨ ਹਫਤੇ ਦਾ ਸਮਾਂ ਹੈ। ਇਸ ਲਈ ਸੰਭਾਵਨਾ ਹੈ ਕਿ ਨਾਡਾ ਚਿਤਕੇ ਉਤੇ ਸਖਤ ਪਾਬੰਦੀ ਲਾਉਣ ਦਾ ਯਤਨ ਕਰ ਸਕਦਾ ਹੈ, ਜੋ ਉਸ ਭਾਰਤੀ ਟੀਮ ਦਾ ਹਿੱਸਾ ਸੀ, ਜਿਨ੍ਹਾਂ ਨੇ ਏਸ਼ਿਆਈ ਪੁਰਸ਼ ਚੈਂਪੀਅਨਜ਼ ਟਰਾਫੀ ਅਤੇ ਢਾਕਾ ਵਿੱਚ ਏਸ਼ੀਆ ਕੱਪ ਵਿੱਚ ਜਿੱਤ ਦਰਜ ਕੀਤੀ ਸੀ।